भांगरभूंय | प्रतिनिधी
कोणाचेय पुरस्कार, भोवमान वा नामना दुसऱ्याच्या दोळ्यांत भरता तेन्ना दुस्वास जल्माक येता. ताचेर नियंत्रण दवरप गरजेचें. कारण दुस्वास दुस्मानकायेंत रुपांतरीत जावंक फावना.
दुस्वास, नसाय,मत्सर, हे सगळे एकेच माळेंतले मणी. सगळ्यांचे गूणधर्म सारकेच. दुस्वास
हो मनशाच्या सभावांतलो एक भाग. जंय तुळा जाता थंय म्हजे परस दुसऱ्याचें बरें असल्या चिंतनान कांय प्रमाणांत दुस्वास तयार जाता. नाजूक नात्यांत तिसरो मनीस भितर सरता तेन्ना आपल्या प्रिय व्यक्तीक हिसकावन घेवपाची असुरक्षीतायेंतल्यान भिरांत दिसता तेन्ना दुस्वास निर्माण जाता.
आर्विलो काळ म्हणल्यार सर्तीचें युग, जेन्ना कोण खंयच्याय मळार फुडें पावता तेन्ना फाटल्यान आशिल्ल्या मनशाक फुडें वचपी मनशा विशीं दुस्वास जाता आनी जशी जशी सर्त वाडत वता तसो तसो दुस्वास वाडत रावता.
दुस्वास म्हणल्यार असुरक्षीततायेची भावना. दुस्वास सान भुरग्यांमदींय आसता. आवयच्या मांडयेर दुसरें भुरगें बसलां वा न्हिदिल्लें पळवंन भुरगें अस्वस्थ जाता आनी आपल्या हक्कांचेर नियंत्रण दवरपाक आवय कडेन रडत धांवता. कारण भुरग्याल्या मनां भितर असुरक्षीतताय निर्माण जाल्ली आसता. भायल्यान कोणाचीय बेसबरी तोखणाय करपी मनांतल्यान दुस्वास करतात, मागीर खेळां, शिक्षण, राजकारण, वेवसाय, कार्यालय, साहित्य, नाट्य, सिनेमा, हेर मळार आसूं दुस्वासी आसताच आसता.
सर्तीच्या काळांत दुस्वासातल्यान एकामेकाले पांय ओडपाची सर्त चालुच आसता, दुस्वास मनशाच्या स्वभावाचो एक भाग आशिल्ल्यान साहित्यीक मळ ताका आडवाद ना. साहित्यीक मळार लेखक वा कवीचें यश हेरां दोळ्यांक खुपता. जें कांय प्रमाणांत सभावीक आसता. कोणाचेय पुरस्कार, भोवमान वा नामना दुसऱ्याच्या दोळ्यांत भरता तेन्ना दुस्वास जल्माक येता. ताचेर नियंत्रण दवरप गरजेचें. कारण दुस्वास दुस्मानकायेंत रुपांतरीत जावंक फावना. दुस्वास सभावीक, पूण कितलो आसूंक जाय, ताचें प्रमाण वाडलें जाल्यार कांय अघटीत वायट गजाली घडूंक शकतात.
चड करून निरशेलेपणांतल्यान दुस्वास निर्माण जाता. रामायण आनी महाभारत हांच्या निर्मिती फाटलें दुस्वास हें मुखेल कारण आशिल्लें. “दुस्वास केन्नाच हुंवाराच्या उदका सारको आसूंक फावना. हुंवार विध्वंसक आसता देखून दुस्वासाक काळजांत सुवात दवरूंक फावना”. हें बरोवंक आनी वाचपाक बरें दिसलें तरी प्रत्यक्षांत आपणावप कठीण, कारण दुस्वास मनश्याल्या रगतांत उण्या चड प्रमाणांत रुजला, पूण दरेकल्यान आपलो मत्सर नियंत्रीत करपाची गरज आसा.
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
