भांगरभूंय | प्रतिनिधी
कट्टर (पोरण्यां, भायर उडोवपाच्या जोत्याकूय हें उतर वापरतात.) मनीस म्हणल्यार, जो आपले विचार बदलूंक शकना आनी तो विशयूय बदलचो ना. हीं उतरां इंग्लंडाचे आदले प्रधानमंत्री विन्स्टन चर्चिल हांची. राजकी फुडारी म्हणटकच तांचे बगर आनीक कोणाक हें चड बरें खबर आसचें ना. कट्टरपंथी, कडवे सगल्याच धर्मांनी, देशांनी पयलीं सावन आशिल्ले, आसात आनी फुडाराकूय आसतले. सुवार्थ, लाचारी, हुजरेगिरी, धर्मांधताय, जातीवाद, अहंकार अशीं जायतीं कारणा हाका जापसालदार आसात. गोंयांत मात असलें सहसा दिसनाशिल्लें. मात हालींच्या वर्सांनी कसल्याय कारणां वयल्यान लोक उलोवपाक, सोशल मिडियाचेर बरोवपाक लागल्यात. दुसऱ्यांच्यो भावना, श्रद्धा दुखोवपाक लागल्यात. मागीर एकमेकां आड पुलीस कागाळी, निशेध सभा, आंदोलनां. पूण, टिका करपी आपलेच मनीस आसतात तेन्ना ही श्रद्धा पाशाणा परस घट जाता आनी विरोधी विचारसरणेचे आसल्यार सामकी उंचाबळून येता. हीं धोंगीपणा आयज चाटये पावलाक दिसपाक लागल्या. धर्मीक असहिश्णुताय ही उदरगत आनी लोकशाये खातीर सामकी घातक. ती सोंपोवपाक सगल्यांनीच एकठांय यत्न करपाक जाय. कारण भितरले भितर खदखदपी हें जाळमूख केन्ना फुटत तें सांगपाक येना! हातूंत सगल्यांचो गोबर जातलो, हें सगल्यांनी गाठीक घट बांदचें.
ईद ए मिलाद मिरवणुकी वयल्यान पक्ष, संघटणांचें दावें गळ्यांत घाल्ल्या समाजविद्वाट्यांनी प्रेशीत मुहंमद पैंगबर हांचे विशीं आक्षेपार्ह विधान केलें. म्हापश्यां ईदा खातीर केल्ली लायटीची रोशणाय काडटना एक बायल वायट उतरां उलयलीं. प्रकरण पुलिशेंत पावतकच तिणें माफी मागली. प्रेषिताच्या आड जाल्ले कमेंट जुझे इनासिओ रॉड्रिग्ज, राज मॅक, आयुर्वेद गोवा, जगदीश नायक, ऋषिकेश एम. ह्या अकांवटां वयल्यान जाल्यात अशें पुलीस कागाळेंत म्हणलां. हातूंतले कांय कमेंट संबंदितांनी डिलीट केल्यात. मॅक हाका पुलिसांनी ताब्यांत घेतला. जुझे हो इंग्लंडाक रावता. पूण सगल्यांक अटक करपाचो हावेस पुलिसांनी उक्तायला. ह्या वेळार हें प्रकरण कोणे ताणून धरूंक ना, पूण दर खेपे अशें जातलेंच हाची खात्री दिवंक मेळचीना. कमेंट करप्यांनी मतींत दवरूंक जाय, की सोशल मिडिया अकांवट उक्तो केलो काय तुमी नेमको खंय बसून संगणक वा मोबायल फोन वापरला, तो कोणाच्या नांवार आसा, वेळ, जागो…. हें सगलें नोंद जाता. ताचे वयल्यान तपास यंत्रणांक दोशी व्यक्तींक धरपाक मेळटा. पूण हें खबर आसूनय बरेच जाण कोणाचेरूय बेधडक कमेंट करतात. आपलो फुडारी, संघटणा, पक्ष आपल्याक वाटायतलो हाची तांकां खात्री आसता. मात कांय फावटी दोशी व्यक्तीक एकसुरो सोडून ‘शबै शबै भौजनसमाज’ ह्या नाटकांतल्या पात्रां भशेन सगले एकेक करून फाटले फाटी नाच्च जातात. सगल्या अतिशाण्या नेटिझनांनी हें घट मतींत दवरल्यार बरें.
धर्मीक दुस्वासाक लागून लोक एकामेकांक अविस्वासान पळयतात. गुंतवणूक, पर्यटन, शिक्षण, रोजगाराचेर न्हयकारत्मक परिणाम जाता. दंगल पसून जावं येता. ताका लागून धर्म, जातीं मदीं संवाद जावंक जाय, शाळांनी सहिश्णुताय, भावपण, एकचाराचीं मुल्यां शिकोवपाक जाय. सोशल मिडियाचेर फट, दिशाभूल करपी, दुस्वासी पोस्ट घालप्यांक अटक जावंचीच, पूण 25 ते 50 हजार रुपया दंडूय जावचो. कायद्यांत तशी तरतूद ना जाल्यार ती करप समाज हिताचें. पुलीस आनी हेर सरकारी यंत्रणांनी तो आवडटो काय नावडटो तें पळयनासतना कारवाय करपाक जाय. जापसालदारकेन बरोवप, उलोवप आयज गरजेचें जालां. सोशल मिडियाचेर सरकार, धर्मीक संघटणांनी एकचाराची मोहीम चलोवपा जाय.
भायल्यांनी येवन गोंय इबाडलें अशें आमी सदांच म्हणटात, पूण धर्मीक दुस्वास, असहिश्णुताय पातळावपांत आमच्याय कांय भावांचो हात दिसता, ही धोक्याची गजाल न्हय??
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
