भांगरभूंय | प्रतिनिधी
भारत आनी आसियान वांगडी राश्ट्रांच्या नौदळान दक्षीण चीन दर्यांत 7 आनी 8 मे दिसा झुजाचो अभ्यास केलो.
भारता भायर फिलीपीन्स, इंडोनेशिया, सिंगापूर, मलेशिया, थायलंड, ब्रुनाय आनी व्हिएतनाम ह्या देशांनी तातूंत वांटो घेतिल्लो. ह्या सगळ्या देशांक मेळून ‘आसियान’ चोंबो, गट वा समूह अशें म्हण्टात. ह्या गटांतलो मुखेल देश म्हळ्यार भारत. उरिल्ले देश ल्हान आनी दुबळे. भारतानूच फुडाकार घेवन हो पंगड स्थापन केल्लो. आशियेंतल्या ल्हान आनी तुळेन दुबळ्या देशांक फकत अर्थीक आनी लश्करी मजत दिवप हो ताचो उद्देश आसाच, पूण इंडो- पॅसिफिक वाठारांत चीनाच्या वाडटे दादागिरीक शह दिवप, होय ताचो हेत आसा. तेच खातीर हो झुजा अभ्यास. अर्थांत हातूंत कांयच नवें ना, संवसारभर असो झुजाचो अभ्यास चालूच आसा. पूण ह्या झुजाच्या अभ्यासाक लागून चीनाच्या xx क सदचे भशेन उजो पेटलो.
ह्या झूज अभ्यासा वेळार चीनान हेरगिरी केल्ल्याचो दावो आसियान देशांनी केला. हे सुवाते सावन फकत 50 किलोमीटर अंतराचेर चीनी तारवां वतालीं आनी चीनी झुजारी विमानांय उडटालीं. चीनान सदचे भशेन हें न्हयकारलां आनी आमी हेरगिरी करूंक ना, आमचीं हीं नौदल तारवां न्हय तर वेपारी तारवां, असो दावो केला. मात, चीनाचो हो दावो चुकीचो हें सांगपाक जाणकारांची गरज ना.
चीनाच्या तोंडांत एक गजाल आनी पोटांत दुसरी गजाल आसा हें संवसार जाणां. इंडो- पॅसिफिक वाठारांत वर्चस्व गाजोवप हें चीनाचें सपन. तें भारताक लागून पुराय करपाक मेळना, हें चीनाक खबर आसा. देखूनच दक्षीण आशियांतल्या ल्हान देशांक आनी इंडो- पॅसिफिक वाठारांतल्या देशांक चीन साम- दाम- दंड- भेदा वरवीं आपले कडेन वळोवंक सोदता. ते खातीर तांणी अब्जांनी रुपया रीण दिवन जायते देश आपले दावणेक बांदल्यात.
आयज श्रीलंका जे परिस्थितींत आसा ताकाय चीन जापसालदार. चीनान श्रीलंकेक फारीक करूंक जावचें ना इतलें रीण दिलें आनी ताचे बदला श्रीलंकेच्या बंदरांचेर ताबो मेळयलो. श्रीलंकेचें हंबनटोटा बंदर तर चीनान गिळ्ळां आनी थंयच्यान दक्षीण आशिया आनी इंडो -पॅसिफिक वाठाराचेर तें नदर दवरून आसा. तो ह्या बंदराचो उपेग गुप्तचर कामा खातीर करता. श्रीलंके प्रमाण चीनान नेपाळ, भूतान, बांगलादेश, पाकिस्तान, म्यानमार ह्या देशां कडेनय तेंच धोरण चालीक लायलां. पूण, चीनाच्या ह्या चेपणाक आसियान देश अजून बळी पडूंक नात. चीन आनी फिलीपीन्स हांचे मदीं दर्या वेल्यान वाद आसा. चीन आपले दर्या हद्दींत बेकायदेशीर अतिक्रमण करता म्हूण फिलीपीन्सान आंतरराष्ट्रीय न्यायालयाचीं दारां धाडायल्यांत.
चीनाचो हो दर्या वेलो वाद फकत फिलीपीन्सा कडेन न्हय तर हेर आसियान देशां कडेनय आसा. चीन सदांच ह्या ल्हान देशा आड गुंडगिरी करता, देखून ती थांबोवपा खातीर हे ल्हान देश भारता कडेन आशेन पळयतात. भारतूय ह्या देशांक जाय ती मजत दिता, देखूनच चीन ह्या आसियान गटा कडेन वाकडे नदरेन पळयता. आसियान देशांक भारत बळगें दिता म्हणूनच इंडो- पॅसिफिक वाठारांत चीनाचे दादागिरीक चाबूक बसला.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
