भांगरभूंय | प्रतिनिधी
सुभाष फळदेसायः साकर ही ‘सायलंट किलर’ आशिल्ल्याचो दावो
भांगरभूंय । प्रतिनिधी
सांगें: दरेकल्यान आपले भलायकीची जतनाय घेवपाक जाय. फकत दुयेंस जाले उपरांतूच दोतोरा कडेन वचनासतना भलायकेची पूर्वतपासणी करून घेवपाक जाय. योग्य वेळार निदान जालें जाल्यार खूबशीं दुयेंसा बरीं जावपाक शकतात. ते खातीर दुयेंस आंगार काडूं नाकात. सरकारी भलायकी सेवेचो लाव घेयात. साकर ही ‘सायलंट किलर’ आसा, ताचे कडेन आडनदर करूं नाकात. दुसरें वैजकी म्हाविद्यालय सुरू करपाचे सरकाराचें यत्न चल्ल्यात, अशी म्हायती सांगेंचे आमदार सुभाष फळदेसाय हांणी दिली.
सांगेंच्या नेत्रावळी पंचायतींतल्या विचुंद्रे गांवांत उपभलायकी केंद्राचें उक्तावण मंत्री फळदेसाय हांचे हस्तुकीं जालें. ह्या वेळार ते उलयताले.
दुयेंतींक गांवांतूच भलायकी सुविधा मेळपाक जाय. ह्याच उद्देशान हें उपभलायकी केंद्र सुरू केलां. ताचो फायदो घेयात. आयज 40 वर्सां पिराये वयल्या 50 टक्के लोकांक गोडेमूत आसा. जिणेशैली, भायलें खावप- पियेवप हें ह्या फाटलें कारण. कुडीक व्यायाम जायना. हे फाटभुंयेर भलायकेची वेळावेळार तपासणी होच बरो मार्ग आसा, अशें फळदेसाय हांणी सांगलें. योग्य निदान आनी योग्य उपचार हाचेर लक्ष दिवचे, असो उलो तांणी गांवच्या लोकांक मारलो.
ह्या वेळार फळदेसाय हांणी आदले सरपंच भिकू कालमो हांचो फुलां तुरो दिवन भोवमान केलो.
गांवांत उपभलायकी केंद्राची सुविधा निर्मा जाल्ल्यान आपल्याक खोस जाता. ह्या उपकेंद्राचो लोकांनी पुराय लाव घेवचो, अशें सांगेंची भलायकी अधिकारी तुलसीममता काकोडकार हांणी सांगलें.
जांकां गोडेमूत आसा तांणी आपली साकर तपासून घेवची, जांकां रक्तदाब आसा तांणी तो तपासून घेवचो. दरेका म्हयन्याचे 11 तारखेक लसीकरण करतले. दरेका शुक्रारा ओपीडी सुविधा आसतली. तशेंच बुधवारा आयुर्वेदीक दोतोर उपलब्ध करून दिवचे खातीर आपूण यत्न करतली, अशें काकोडकार हांणी सांगलें.
आयुष्य़मान भव आनी एनसीडीएस शिबिरांत ह्या उपकेंद्रांत घेतले. जननी सुरक्षा येवजणेचो लाव घेवचे खातीर गुरवार बायलांनी फुडें येवचें, अशेंय काकोडकार हांणी मागलें.
सरपंच बुंदो वरक हांणी सांगलें, भलायकी सेवा गांवांत पावल्या, ताचो गांवच्या लोकांनी फायदो घेवन आपली भलायकी तंदुरुस्त दवरची. सरकारी भलायकी सेवेचो लाव घेवन दरेका दुयेंसाचेर जैत जोडात.
ह्या वेळार उपसरपंच फ्रान्सीस मास्कारेन्हस, पंच रजनी गांवकार, राखी नायक, उमेश गांवकार, सुभाष वेळीप, भिकू कालमो हाजीर आशिल्ले. डॉ. सुषमा देसाय हांणी सुत्रसंचालन केलें जाल्यार रजनी गांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
