भांगरभूंय | प्रतिनिधी
हरियाणा, खबरां संस्था: आपले बायलेक दुसर्या दादल्या वांगडा गाडयेंत बशिल्ली पळोवन घोवाची तिडक मस्तकाक मारली. ताणें तिका धरून बेसबॉलाच्या बॅटान बडयली. हरयाणाच्या पंचकुला वाठारांत ही घडणूक घडली. पुलिसांनी ह्या प्रकरणांत घोवा आड गुन्यांव नोंद केला. हे घडणुकेचो व्हिडिओ सोशल मिडियाचेर व्हायरल जाल्या उपरांत ही घडणूक मुखार आयली. विशेश म्हळ्यार बायलेक तिचो घोव मारबडय करतना तिचे वांगडा आशिल्लो दादलो तिका सोडोवपा खातीर मुखार येनाशिल्ल्याचें व्हिडिओंत दिसता.
नेमकें कितें घडलें?
हरियाणाच्या पंचकुला वाठारांतलो एक व्हिडीओ बुधवारा सोशल मिडियाचेर व्हायरल जालो. एक व्यक्ती आपले बायलेक बेसबॉलाच्या बॅटान मारता अशें व्हिडिओंत दिसता. ती बायले एके गाडयेंत एका दुसर्या दादल्या वांगडा बशिल्ली तेन्ना घोवान येवन पयलीं बेसबॉलाच्या बॅटान ते गाडयेचो हारसो फोडलो. उपरांत बायलेक गाडयेंतल्यान भायर काडली आनी तिका बेसबॉल बॅटान बडोवपाक लागलो. तेन्ना बायल घोवाक मारूं नाका अशी ताचे कडेन मागणी करताली. मात घोवान तिचें कांयएक आयकनासतना तिका बडयत रावलो.
बायलेक घोव मार बडयत करता आसतना ती गाडयेंत ज्या दादल्या वांगडा बशिल्ल्या ताणें मदीं उलोवपाचो यत्न केलो. मात घोवान ताका पयस राव अशें सांगून बायलेक बडयत रावलो.
बायलेचेर दुबाव
घोवाक बायलेच्या चारित्र्याचेर दुबाव आशिल्लो अशी म्हायती मुखार आयल्या. आपले बायलेचे दुसर्या दादल्यां वांगडा संबंध आशिल्ल्याचो दावो घोवान केला. तशेंच व्हिडिओंत बायलेक मारतना घोवान हे आरोप केल्ल्याचें दिसता. हे विशीं पुलीस तपास करतात. बायलेन दाखल केल्ले कागाळीच्या आदाराचेर पुलिसांनी घोवा आड मारबडय करपाचो गुन्यांव दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
