भांगरभूंय | प्रतिनिधी
– ‘समुद्र से समृद्धी’ मोहिमेचें उक्तावण
– चीप ते शीप भारतांतूच जावपाक जाय
– उदरगती खातीर आत्मनिर्भर जावप होच उपाय
भांगरभूंय | प्रतिनिधी
भावनगर : देशाचे उदरगती खातीर दुसर्यांचेर पातयेवप कोंताक पडचें ना. आत्मनिर्भर जावप हो एकूच उपाय आसा, चीप ते शीप मेरेन सगले भारतांतूच निर्माण जावपाक जाय, अशें प्रधानमंत्री नरेंद्र मोदी हांणी सांगलें. भावनगर गुजरात हांगा केंद्र सरकारान आयोजीत केल्ल्या ‘समुद्र से समृद्धी’ मोहिमेच्या उक्तावणा वेळार ते उलयताले.
ह्या वेळार माचयेर गुजरातचे मुख्यमंत्री भुपेंद्र पटेल, पोर्ट्स शिपींग वॉटरवेज मंत्री सर्बानंद सोनोवाल, राज्यमंत्री शंतनू ठाकूर आनी हेर मानेस्त आशिल्ले.
मोदी हांणी गुजरातांतल्या दर्या वाठारांतल्या 33,600 कोटींचे उदरगतीच्या प्रकल्पांची बुन्याद घातली. देशांत दर्यादेग वाठारांत बंदर, बोट बांदणीचे नदरेन 75 हजार कोटींची कामां जातलीं.
प्रधानमंत्र्यान आत्मनिर्भरतेची गरज परतून उक्तायली. ‘आयज भारत ‘विश्वबंधू’ हे भावनेन मुखार वता. संवसारांत आमचो व्हडलो दुस्मान ना. आमचो सगळ्यांत व्हडलो दुस्मान म्हणल्यार हेर देशांचेर आमचें अवलंबित्व. हो आमचो सगळ्यांत व्हडलो दुस्मान आनी आमी मेळून भारताच्या ह्या दुस्मानाक हारोवंक जाय. परकी परावलंबित्व जितलें चड तितलें देशाचें अपेस व्हडलें. संवसारीक शांतताय, स्थिरताय आनी समृध्दी खातीर संवसारांतली सगळ्यांत चड लोकसंख्या आशिल्ल्या देशान आत्मनिर्भर जावंक जाय. आमी दुसऱ्याचेर निंबून रावले जाल्यार आमचो आत्मसन्मान इबाडटलो. 1.4 अब्ज देशवासीयांचो फुडार आमी हेरांचेर सोडूंक शकनात,’ अशें प्रधानमंत्र्यान सांगलें.
फुडले पिळगेक धोको निर्माण करून भारताचे उदरगती खातीर आमी हेर देशांचेर निंबून रावपाक शकनात अशें, प्रधानमंत्र्यान मुखार सांगलें. “शंबर दुख्खांचेर एकूच वखद आसा, आनी तें म्हणल्यार आत्मनिर्भर भारत,” अशें ताणें म्हणलें. अमेरिकेचे अध्यक्ष डोनाल्ड ट्रम्प हांणी बदल करपाची घोशणा केल्या उपरांत वाडपी हुस्क्याचे फाटभुंयेर प्रधानमंत्री मोदी हांणी हें विधान केलां.
देशाक जाल्ल्या लुकसाणेक काँग्रेस जापसालदार
भारता कडेन आत्मनिर्भर जावपाची तांक पयलीं सावन आसा. मात, काँग्रेस सरकारांनी यत्नूच केलें ना. देशाक जाल्ले लुकसाणीक ते जापसालदार आसात, अशें मोदी हांणी म्हणलें.
स्वदेशी घेतात, स्वदेशी विकात
स्वदेशी घेयात स्वदेशी विकात असो सल्लो मोदी हांणी दिलो. ते खातीर सगल्यांनी आत्मनिर्भर भारताचोच विचार करचो, असो उलोय तांणी मारलो.
सगल्यांचे सेवेक येतल्यो देशी बोटी
विवीध वस्तूंच्या दर्या मार्गार भाड्याच्या बोटींक भारत कोटयांनी रुपया मोडटा. फुडें अशें जावचें ना. भारत आत्मनिर्भर जातलोच, वयल्यान दुसर्या देशांचे सेवेकूय बोटी आसतल्यो, अशेंय मोदी हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
