‘दुसरे वादळ’ मुद्दाम वाचात

भांगरभूंय | प्रतिनिधी

अभिनय करपाचोच तांचो निर्णय आशिल्लो आनी कॅन्सरांतल्यान बरो जातकच तांणी ‘हिमालयाची सावली’ ह्या नाटकांतल्यान रंगमाचयेर परतून पावल घालें.

नाटक पळोवपी जावं, नाटकांत काम करपी रंगकर्मी जावं, तुमी शरद पोंक्षे हें नाव, तांचें काम पळयलां आसतलेंच.
टीव्ही माळो तशेंच मराठी सिनेमांतल्यान ते आमकां दिसतात. तशे नाटका भितरुय दिसतात. नथुरामाचे भुमिके खातीर ते चड लोकप्रीय जाले. पोंक्षे कितें वेगळें करता, असो प्रस्न तुमकां पडला आसतलोच. नथुरामाची भूमिका करतना तांकां प्रचंड विरोध सोंसचो पडलो. त्या भायर तांकां कॅन्सरा सारकें दुयेंस जालें. तातूंतल्यान ते भायर सरले. ‘हिमालयाची सावली’ हें नाटक करून आतां ते परत नथुरामच्या भूमिकेत सगळ्यांक दिसले. हालींच ते दोन प्रयोगां खातीर गोंयांत पाविल्ले. तांणी तीन पुस्तकां बरयल्यांत. त्या पुस्तकाचेर तांची सय घेतना थोडें उलोवपाची संद मेळ्ळी. वांगडा भोवमानेस्त वामन भाटेबाब लेगीत आशिल्लो.तांणी आपल्या पुस्तकांच्या फुडाराच्या कार्यावळींचो मुद्दाम उल्लेख केलो.
पोंक्षे हांचीं जीं तीन पुस्तकां आसात, तीं म्हळ्यार ‘मी आणि नथूराम’.हाच्यो तेरा आवृत्यो आयल्यात. आनी ‘दुसरे वादळ’ हाच्यो पांच आवृत्यो भायर सरल्यात. हाचो अर्थ त्यो वाचकांक आवडल्यात. मुद्दाम तीं तिनूय पुस्तकां घेतलीं आनी एका दमान वाचून सोंपयलीं. तातूंतली सगळ्या पुस्तकांचो अणभव हो स्वतः लेखकाचो अस्सल आसा. ‘दुसरे वादळ’ ह्या पुस्तका विशीं मुद्दाम सांगूंक जाय. खरें म्हणल्यार कॅन्सरा सारकें दुयेंस जालें जाल्यार निश्चित मनीस गडबडटा. ताका कितें करूं तें सुचना आनी तातूंत तो मानसीक नदरेन काबार जाता. पूण पोंक्षेन ह्या दुयेंसाचेर जैत तर जोडलेंच, खेरीज आपल्या अणभवाचेर पुस्तक बरयलें, जाचो उपेग हेरांक जावं शकता.
अभिनय करपाचोच तांचो निर्णय आशिल्लो आनी कॅन्सरांतल्यान बरो जातकच तांणी ‘हिमालयाची सावली’ ह्या नाटकांतल्यान रंगमाचयेर परतून पावल घालें. आतां तो कॅन्सरा वयले आपले अणभव सांगपाची कार्यावळ करता. तशेंच ‘गप्पा टप्पां’ भितर आपले भूमिकेचो प्रवास सांगता. ‘दुसरे वादळ’ ह्या पुस्तकांत ताणें सकारात्मक नजर दवरतना कांय गजाली सांगतना कॅन्सरा सारकीं दुयेंसा म्हळ्यार सोयरे अशी कल्पना फुडें केल्या. तो म्हणटा, काय सोयरे च्या घेतात आनी घरा वतात. कांय सोयरे मात तुमका सोडीनात, इतलेच न्हय तर वांगडाच व्हरतात, पूण हांवें ह्या कॅन्सर नांवाच्या सोयऱ्याक परतून धाडलो. हें पुस्तक आमचे खातीर समुपदेशना सारको वावर करता.
सकारात्मक नजर आसची हें आमी आयकतात खरें, पूण तशी वेळ आयली जाल्यार गडबडटात. पोंक्षे आपल्या पुस्तकांत सांगतात की जें कितें संकश्ट आसा तें स्वीकारपाक शिकत जाल्यार मागीर ताचेर उपाय आमकां मेळूं शकता. आमकां संकश्ट आयलें काय डिप्रेशन येवपाची शक्यताय न्हयकारुंक येना. म्हूण खंयचें संकश्ट तुमी पचोवं शकतात, पूण तें स्वीकारपाचीय तयारी जाय. पोंक्षे हे सावरकरवादी विचार सगळ्यां मेरेन पावोपाचें काम करतात. तांणी सावरकरां वयलीं सगळीं पुस्तकां वाचल्यांत. ‘माझी जन्मठेप’ हें पुस्तक तांणी परतून वाचलें आनी मनान विचार केलो की जर इल्ल्याश्या कुडींत हाता- पायांक साखळदंड अशे स्थितीन हो देश स्वतंत्र जावपाक इकरा वर्सां काडटा तर म्हाका वर्सभर काडपाक कितें? असो विचार केलो, खेरीज सगळे उपाय केले. हातून सगळ्यो पॅथी, वांगडा धार्मिकूय पॅथी करपाक ते फाटीं रावूंक नात. हिंदुत्व विचाराचो तांणी सदांच फाटपुरवण केली. ह्याच विशयाचेर ते उलयतात.
सोशल मीडियाचेर लेगीत ते स्पश्ट उलयतात, ताचे खातीर ते विरोध लेगीत सोंसतात. नथुरामाच्या वेळार एका राष्ट्रीय पक्षाच्या कार्यकर्त्यांनी तांकां नाका शेवट केलो, पूण तांणी हे परिस्थितींत लेगीत ‘मी नथुराम बोलतोय’ चे प्रयोग अर्दकुटे सोडूंक नात वा करूंक ना, अशें जालें ना. हातूंत तांचो आत्मविश्वास दिसता. आपुण अभिनय फाट्यांनुच वतलों, अशें आदीं पसून मनान दवरून तांणी पावल घालें. बेस्ट भितर नायलाजान नोकरी केली. ती तांणी कांय वर्सांनी सोडली. ते काय लेखक न्हय, पूण परिस्थितीक लागून लेखणी हातांत घेतली. कोरोना काळांत आमकां तुमकां घरा भायर वचपाक मेळनासलो, त्या काळान जशें आमचें भरपूर वाचन जालें, तशे काय जाणांनी लेखणी हातांत घेतली. पूण पोंक्षेन लेखणी घेतली ती कॅन्सरा सारकें दुयेंस बरें जातकूच, आपलो अणभव सांगपाक. संकश्ट आयलें की आपुण तें कशें पयस करपाचें, ही नजर कशी आसची, हें ताचें पुस्तक आमकां सांगता. तेन्ना मुजरत तांचें ‘दुसरे वादळ’ पुस्तक वाचात आनी मागीर हेर दोन पुस्तकां कडेन वचात.

रामदास केळकार
9822583275