भांगरभूंय | प्रतिनिधी
खबरां संस्था
इंदूरः भारतान जैता खातीर दिल्ल्या 400 धांवड्यांच्या आव्हानाच्या चेंपणा खाला ऑस्ट्रेलियन पंगड दुसऱ्या वन-डेत पुरायपणान चेंपलो आनी तांका 99 धांवड्यानी भारताक शरण येवचें पडलें. पयल्यो दोन विकेटी 9 धांवड्यांत पडल्या उपरांत पावस आपल्याक लजेक घालपी हारी पसून वाटावतो अशी आस्त ऑस्टेलियन पंगडाक आशिल्ली. मात पावसा उपरांत खेळ सुरू जाल्या उपरांत डाव साल्वार करपाची तांच्या बॅट्समनाची आस्त भारताच्या बॉलरांनी फळादीक जावपाक दिली ना. तीन वन-डे माळेचे हे माळेंत भारतान 2-0 अशी निर्णायक आघाडी घेतल्या.
फास्ट बॉलर प्रसिद्ध कृष्णा, उपरांत स्पीनर आर आश्वि्न हाणी आपली कमाल दाखोवन ऑस्ट्रेलियन पंगडाक वरचड जावपाक दिलें ना. मात 28 वी ओव्हर चालू आसतना अॅबोट आनी हजेलवूड हें शेंपूट वळवळत आशिल्लें. पूण महम्मद शमी आनी रवींद्र जडेजान तांका अशे बॉल घातले आनी भारताक व्हडलें जैत मेळोवन दिले. डेव्हीर वॉर्नर (53), लॅबोचेन्ग (27) कॅमेरॉन (19) हाचे बगर ऑस्ट्रेलियन बॅट्समन भारताच्या बॉलरांक तोंड दिवपाक शकले नात.
भारताच्यो 399 धांवड्यो
पयले वन-डेंत ऑस्ट्रेलियेक सहज हारोवपी भारतीय पंगडान इंदूरचे दुसरे वन-डेंत आपल्या डावांत 5 आवट 399 धांवड्यो करून ऑस्ट्रेलियेक जैता खातीर 400 धांवड्यो करपाचें हातासपाक जायना अशें आव्हान दिलें. कॅप्टन स्टिव्हन स्थिथान टॉस जिखून भारताक पयलीं खेळपाक सांगपाचो निर्णय ताका बरोच म्हारग पडलो. शुभमन गील आनी श्रेयस अय्यर हांच्या उपरांत सूर्यकुमार यादवान ऑस्ट्रेलियन बॉलिंगेची करड काडली.
399 ही वन-डेंतली भारताची ऑस्ट्रेलिये आड आतां मेरेनची सगल्यांत व्हडली धांवस्ख्या. हाचे पयलीं भारतान फाटल्या नोव्हेंबरांत बंगळुरून ऑस्ट्रेलिये आड सगल्यांत चड 383 धांवड्यो केल्ल्यो भारताच्या बॅट्समनांनी ऑस्ट्रेलियेच्या बॉलरांक सामके धुवलें अशें म्हणपाक जाता. हाचे पयलीं इंदूरांत भारतान वेस्ट इंडिजा आड 2011 वर्सां वन-डेंतली सगल्यांत चड 5 आवट 418 धांवड्यो केल्ल्यो. भारता खातीर ओपनर शुभमन गील आनी श्रेयस्स अय्यर हांचे तुफानी शेंकडे जाल्यार केएल राहुल आनी सूर्यकुमार यादवान अर्दशेकडे केल्ल्यान भारताक चारशें धांवड्या मेरेन पावप शक्य जालें.
शुभमन गिलान 97 बॉलांत 6 चौके आनी 4 सक्यांनी 104 आनी श्रेयस अय्यरान 90 बॉलांत 11 चौके आनी 3 सक्यानी 105 धांवड्यो केल्यो. कॅप्टन केएल राहुलान 38 बॉलांत 3 चौके आनी 3 सक्यांनी 52 धांवड्यो केल्यो. मदले फळेंतल्या सूर्यकुमार यादवान प्रेक्षकांनी सामकी बरी मनरिजवण केली. ताणे फकत 37 बॉलांत 6 चौके आनी 6 सक्यांनी सणसणीत नाबाद 72 धांवड्यो केल्यो. रवींद्र जडेजा 13 धांवड्याचेर नाबार रावलो. ताणी 24 बॉलांत 44 धांवड्यांची भागिदारी केली. ताणी निमण्या पांच ओव्हरींत 54 धांवड्यो केल्यो. ऑस्ट्रेलिये वतीन कॅमेरून ग्रीनान दोन विकेटी घेतल्यो. जोश हेझलवूड, शॉन अॅबॉट आनी अॅडम झाम्पान दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
