भांगरभूंय | प्रतिनिधी
खबरां संस्था
सिडनीः दुसरे वनडेंत ऑस्ट्रेलियेन जैता खातीर वेस्ट इंडिजाक 259 धांवड्यांचे लक्ष्य दिलें मात हेजलवूड आनी ऍबोटान दरेकी तीन विकेटी घेवंन वेस्ट इंडिजाक 175 धांवड्यांत गुठलावन पंगडाक 83 धांवड्यांनी जैत मेळोवन दिलें. पयली वनडे ऑस्ट्रेलियेन 8 विकेटीनी जिखल्ली. केसी कार्टी (40), शाय होप (29), रोस्टन चेस (25) आनी अल्झारी जोसेफ (19) सोडल्यार वेस्ट इंडिजाचे बाकीचे बॅट्समन खेळपट्टेर तिगले नात. 43.3 ओव्हरींत तांचो डाव सोपलो. तीन मॅचीहें हे माळेंत ऑस्ट्रेलियेन 2-0 अशी आघाडी घेतल्या.
टॉस जिखून वेस्ट इंडिजान पयली फिल्डींग करपाचो थारायलें. ऑस्ट्रेलियेन आपल्या डावांत 50 ओव्हरींत 9 आवट 258 धांवड्यो केल्यो. अश्टतासी शॉन ऍबोटान 63 बॉलांत एक सको आनी चार चौक्यांनी सगल्यांत चड 69 धांवड्यो केल्यो. मॅथ्यू शॉर्ट हाणे 55 बॉलांत 41 धांवड्यो केल्यो. वेस्ट इंडिजाच्या गुडाकेश मोतीन 28 धांवड्यांत 3 विकेटी घेतल्यो. रोमारियो शेफर्ड आनी अल्जारी जोसेफान दरेकी 2 विकेटी घेतल्यो.
ऑस्ट्रेलियेची टॉप ऑर्डर कोसळ्ळी. आपली पयली आंतरराष्ट्रीय मॅच खेळपी ओपनर जॅक फ्रेजर 10, जोश इंग्लिस 9, कॅमरून ग्रीन 30 आनी स्टीव स्मिथ 5 धांवड्यो करून आवट जाले. ऍबोट आनी मथ्यू शॉर्टान डाव साल्वार केलो. लाबुशेन (26), अॅरोन हर्डी (26) आनी सुदरलंड (18) हांणी पंगडाक अडेंजशें मेरेन व्हेले.
वेस्ट इंडिजाची सुरवेक सावंन घसरगुंडी जाली. 105 धांवड्यांत त्याचो अर्दो पंगड आवट जालो. कार्टी, होप, चेस आनी जोसेप सोडल्यार बाकीचें बॅट्समन ऑस्ट्रेलियेच्या बॉलिंगे सामकार तिगले नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
