भांगरभूंय | प्रतिनिधी
अभियांत्रिकी, वैजकी, कायदो, आयटी ह्या सारक्या परंपरीक करियर निवडीचे सर्तींत, जायत्या मळार लोकां कडेन व्हड प्रमाणात दुर्लक्ष केलां. ह्या मळांनी फक्त भरपूर नोकरेची संद मेळटा इतलेंच न्हय जाल्यार उद्देजकते खातीर आनी आप-रोजगारा खातीर उत्कृश्ट मार्ग मेळटात. तंत्रगिन्यान, हवामान बदल, लोकसंख्या शास्त्रीय बदल आनी समाजीक-अर्थीक घडामोडी हांचे वांगडा उद्देग-वेवसाय विकसीत जातकच ही मळां लोकां खातीर म्हत्वाचे थारपाक लागल्यात.
शेती आनी शेतकी तंत्रगिन्यानाच्या उद्देजकतेचेर जायत्यो अर्थवेवस्था निंबून आसतात. आधुनीक शेती मळार तंत्रगिन्यानाचो वापर करून, सेंद्रीय शेती स्टार्टअप, एआय आनी आयओटी वापरून सुक्ष्म शेती, कृशी-प्रक्रिया उद्देग, शेतकी सल्लागार, वखदीवनस्पत लागवड, विदेशी फळां वा सेंद्रीय उत्पादन सारकिल्ल्या मळार वावर करूं येता. पिकाचेर नियंत्रण दवरपी ड्रोन ऑपरेशन्स आनी शेतकी वेवसाय वेवस्थापन भुमिका अशे नवे वाठार आसात. आपरोजगाराचे नदरेन पळयल्यार तरणाट्या उद्देजकांनी शेतकी उद्यानां, खाण-जेवणाची सांखळी वा डिजिटल प्लॅटफॉर्म तयार करूं येतात. निवळ आनी टिकावू अन्नाची मागणी वाडत आशिल्ल्यान एग्रीटेक हें मुखेल मळ थारता.
नवीकरणीय उर्जा हें आनीक एक मळ आसा आनी थंय मागणी वाडत आसा. पूण प्रशिक्षीत वेवसायिकांचो उणाव आसा. सौर आनी वाऱ्याची उर्जा स्थापन आनी देखरेख, उर्जा लेखापरिक्षण आनी सल्लागार, हरित बांदकाम आनी पर्यावरण-अनुकूल वास्तुकला, टिकावू उत्पादन नवनिर्माण, कोयर-ऊर्जा उद्देग वेवस्थापन इ. हांचे भोंवतणी करियर करूं येता. सौर ऊर्जा प्रकल्प वेवसाय सुरू करप, उर्जा सल्लागार सेवा दिवप वा जैवविघटनशील पॅकेजींग उद्देग सारकिल्ल्या पर्यावरण-अनुकूल स्टार्टअप तयार करप अशो शक्यताय लेगीत आसात.
जाण्ट्या लोकां खातीर भलायकी जतनाय आदार हो आनीक एक वाठार. आदार सेवा आनी एल्डरकेयर कमी प्रमाणांत मेळटात. वैजकी तंत्रज्ञ, घरगुती भलायकी सेवा पुरवणदार, वृद्ध लोकांची काळजी घेवपी तज्ञ, पुनर्वसन उपचारक, मानसीक भलायकी सल्लागार वा भलायकी म्हायतीशास्त्र तज्ञ म्हण वावर करूं येता. उद्देजकते कडेन पळोवपी लोकां खातीर घरगुती भलायकी सेवा एजन्सी, फिजियोथेरपी केंद्रां वा निरोगीपण समुपदेशन सेवा स्थापनकरप गंभीर समाजीक गरजो भागोवंक शकता.
कुशळ वेपार आनी तंत्रीक हस्तकला मळार सुतारकाम, प्लंबिंग, विद्युत काम, वेल्डिंग ह्या सारक्या वेवसायांक खूब म्हत्व आसा. प्रमाणीत इलेक्ट्रीशियन, वेल्डर, प्लंबर, ग्रीन कंस्ट्रक्शन स्पेशलिस्ट, थ्रीडी प्रिंटिंग आनी कस्टमफॅब्रिकेशन तज्ञ तशेंच रोबोटिक्स देखरेख तंत्रज्ञ म्हणून करियर संद आसा. दुरुस्ती वा देखरेख सेवा मळार स्वताचो रोजगार व्हड संद निर्माण करपाक शकता.
हातांनी तयार केल्ल्या उत्पादनांची मागणी हालिसाराक नेटान वाडत आसा. हँडलूम, ब्लॉक प्रिंटिंग, भरतकाम, मातयेचीं आयदनां, चामड्याचीं उत्पादनां, डिझायनर आनी परंपरीक चित्रकला, शिल्पकला हांचे मळार कुशळ आशिल्ले लोक स्वताचो रोजगार स्थापन करपाक शकतात. स्वताचो हो रोजगार म्हळ्यार वैयक्तीक ब्रँड वा ई-कॉमर्स प्लॅटफॉर्मांतल्यान उत्पाद निर्यात करपाचें रूप लेगीत घेवंक शकता.
पर्यावरण विज्ञान आनी पर्यावरणीय पुनर्स्थापन हो आनीक एक उच्च-संभाव्य पूण दुर्लक्षीत वाठार. पर्यावरणीय हानीक लागून संवर्धनवादी, सल्लागार आनी पर्यावरणीय पुनर्स्थापना तज्ञांची मागणी वाडटा. ह्या मळार संद म्हळ्यार पर्यावरणीय परिणाम मुल्यांकन तज्ञ, न्हंय आनी ओलसाणीचो पुनर्स्थापना तज्ञ, रानजीव संवर्धनवादी वा टिकावू पर्यटन मार्गदर्शक म्हणून काम करप हांचो आस्पाव जाता. उद्देजकतेच्या पर्यायां भितर पर्यावरणीय पर्यटन वेवसाय स्थापन करप वा स्वतंत्र पर्यावरणीय लेखा परिक्षण सेवा दिवप हांचो आस्पाव जाता.
अन्न तंत्रगिन्यान आनी पाककला नवनिर्माण हें एक मळ जंय अन्न फक्त रांदप न्हय जाल्यार विज्ञान, तंत्रगिन्यान, कला हांचो मेळ घालप. हातूंत अन्न सुरक्षा तज्ञ जावप, पोशण विकसक, वनस्पती आदारीत उत्पादन निर्मातो, आर-अँड-डी अन्न तंत्रज्ञ वा पाककला पर्यटन उद्देजक जावप हांचो आस्पाव जाता. कॅफे उगडप, खाण-जेवणाच्या उत्पादनांक लाँच करप, खाणां खातीर टिकावू पॅकेजींग विकसीत करप आपरोजगाराचे पर्याय आसात.
आयच्या डिजिटल जगांत शिक्षण तंत्रज्ञान (एडटेक) आनी कुशळटाय प्रशिक्षण फुलत आसा. शिक्षण ऑनलायन चलतना, परंपरीक शिकोवपा भायर ई-लर्निंग सामुग्री विकसक, वेवसायीक प्रशिक्षणा खातीर अभ्यासक्रम डिझायनर, डिजिटल ट्युटर्स अशा भुमिका मेरेन हे मळ विस्तारीत जालां. ऑनलायन अकादेमी सुरू करप, खाशेल्या कौशल्यांचेर लक्ष केंद्रीत केल्ल्या यूट्यूब चॅनलां वरवीं, करियर कोचिंग स्टार्टअपाचेर वा कुशळटाय-प्रशिक्षण प्लॅटफॉर्माचेर जायत्यो उद्देजक संदी मेळटात.
दायज संवर्धन आनी संस्कृती वेवस्थापनांत खास करून सांस्कृतीक पर्यटनाच्या मळार संवसारीक लक्ष वाडत वता तशी व्हड प्रमाणांत करियर क्षमताय आसा. संग्रहालय क्युरेटर, पुरातत्वीय संवर्धनवादी, सांस्कृतीक पर्यटन नियोजक, दायज महोत्सवांचे इव्हेंट मॅनेजर वा पुनर्स्थापना वास्तुकार हांचो तातूंत आस्पाव जाता. आपरोजगाराच्या मळार हेरिटेज हॉटेलां चलोवप, क्युरेट केल्ली सांस्कृतीक भोंवडी घडोवन हाडप वा कला संवर्धन स्टुडियो स्थापन करप हांचो आस्पाव जाता.
खेळां वेवस्थापन आनी साहसी पर्यटन नेटान वाडत आसा. आतां खेळ फक्त वेवसायीक खेळ खेळपा परस खूब पयस पातळ्ळ्यात. खेळां मानसशास्त्रज्ञ, पोशणशास्त्रज्ञ, साहसी खेळां प्रशिक्षक, मॅरेथॉन आनी ई-स्पोर्ट्स इव्हेंट आयोजक आनी फिटनेस आनी खेळां अकादमी उद्देजक हांचे खातीर संदी भरपूर आसात. साहसी खेळ कंपनीं, फिटनेस स्टार्टअप वा टॅलेंट स्कावटींग एजन्सी स्थापन करप स्वताचो रोजगार करूं येता.
हेर कोणाकूच दिसना अश्यो संदी वळखुपाक शकपी लोकांचो फुडार पर्जळीत आसा. दुर्लक्षीत मळां फक्त नोकऱ्योच न्हय जाल्यार फुडारपणाची भुमिका आनी उद्देगांची नवी व्याख्या करपाची तांक दिवपाक शकता. मळ खंयचेंय आसूं, आमी चौकटी भायर विचार करून ताचो लाव करून घेवपाक शकतात काय ना हो प्रस्न म्हत्वाचो.
डॉ. चिन्मय मधू घैसास
9823728640
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
