दुर्बिणी बदला चिप्स ?

भांगरभूंय | प्रतिनिधी

नवो तारो, रांकेंत येवपी गिरे आनी हेर सैमीक चमत्कार पळोवपाक जुंता हावसाचेर खूब भुरगीं जमतालीं.

एका काळार राजधानी पणजेचो झेत आशिल्ली जुंता हावस इमारत मोडपाक पावल्या. तिच्या जाग्यार 11 मजल्यांची नवी इमारत येता खंय. गोंयांतलीं सगल्यांत उंच इमारत. थंय सरकारी कार्यालयां, विवेकानंद केंद्र, खगोलशास्त्रीय वेधशाळा (एस्ट्रोनोमिकल ऑब्जर्वेटरी) आशिल्ली. नवे इमारतींत फक्त वेवसायीक आस्थापनां आसतलीं. मात धक्को दिवपी गजाल भायर सरल्या ती म्हणल्यार मळबांतल्याे घडणुको पळोवपाची संद दिवपी, विद्यार्थ्यां मदीं विज्ञान किल्लत घालपी थंयचे वेधशाळेक खंय जागो आसचो ना! घडये थंय ‘नासा’चें केंद्र बी येतलें अशें कोणाकूय दिसतलें. ना. थंय तरणाटे पिळगेक नासोवपी कॅसिनो येता खंय!! जर हें खरें, जाल्यार फुडाराच्या पिळग्यांक धोक्याचें म्हणचें पडटलें. कॅसिनो बदला थंय विज्ञान केंद्र, वस्तुसंग्रहालय आनी वांगडा बऱ्यो 2-3 दुर्बिणी बसोवप शक्य ना? आराखड्यांत बदल करून आख्खो इकरावो मजलो विज्ञानाक भेट दिवं येता. कारण ताचे आमचेर मळबा इतले उपकार आसात. मागीर तो बल्ब जावं वा गाडी, मिक्सर जावं वा टिव्ही……!! हे वेधशाळे खातीर नवो जागो सोदपाचे यत्न बी चल्ल्यात? हय, जाल्यार तो जागो शाराचे मदीं आसचो, जंय विद्यार्थी सोंपेपणी येवपाक शकतले.
जुंता हावस ही स मजली इमारत इतिहासीक. 1966 त उबी जाली तेन्ना इतली उंच दुसरी इमारत गोंयांत नाशिल्ली. राज्याचे उदरगतीची ती कुरू. थंय पयलीं पुर्तुगेजांचे जुंता दो कोमर्सियो एक्स्टर्नो हे वेपारी संस्थेचो गुदांव आशिल्लो. नवें जुंता हावस (घडये नांव बदलत) नॅशनल बिल्डींग कन्स्ट्रक्शन काॅर्पोरेशन (इंडिया) लिमिटेड बांदता. सरकारान तांचे कडेन समजिकाय कबलातूय केल्या. इमारतीचो पुराय प्लान तयार आसा. म्हणटकच आतां थंय वेधशाळा जातली, हाची खात्री ना. हाचेर चंद्र, तारे, गिऱ्यांच्या मोगींचें मत कितें तें कळूंक ना. पूण हो वादाचो विशय थारचो न्हय. जुगारा परस ज्ञानाची पोंय आशिल्ली वेधशाळा चड म्हत्वाची.
खगोलशास्त्रीय वेधशाळा ज्ञान दिता, तर कॅसिनो नशिबाचो (तेंय ना मानपी लोक आसात) खेळ दाखयता, हें आमी विसरूंक फावना. खगोलशास्त्र मळबांतले गिरे दाखयता, पूण तें मनांत विचारांचें नवे तारेय पेटयता. विज्ञान समाजाक बरो फुडार दितलें, मात कॅसिनो खीणभर तिगपी पयसो दितलो. जंय दुर्बिणींतल्यान गिरे दिसतात, थंय तरणाट्यांच्या सपनांक उंच उडणां मारपाक पाखाटीं मेळटात. तेन्ना ताऱ्यांचो अभ्यास करपी पिळगी घडोवपाक जाय, नशिबाचेर खेळपी न्हय.
मळबा कडेन पळयलें जाल्यारूच समाज मुखार वतलो, जुगाराचेर नदर दवरल्यार भरकटत खंयचे खंय पावतलो. तेन्ना जो कोण विज्ञानाचो दिवो वाडोवन जुगाराचे दिवे पेटोवपाक सोदता, तो उदरगतीक चार पावलां फाटल्यान ओडटा. असल्या मोटवे दृश्टीच्या मनशाक कुशीक काडपाक जाय. गिराण, धुमकेतू, नवो तारो, रांकेंत येवपी गिरे आनी हेर सैमीक चमत्कार पळोवपाक जुंता हावसाचेर खूब भुरगीं जमतालीं. हेर लोकूय येताले. पर्सिव्हल नोरोन्हा हांणी ही वेधशाळा सुरू केल्ली. तिका लागून बऱ्याच विद्यार्थ्यांक विज्ञानाची, खगोलशास्त्राची गोडी लागिल्ली. सरकारी यंत्रणेन खरें म्हणल्यार आदले वेधशाळे परस अत्याधुनीक खगोलशास्त्रीय वेधशाळा पुराय मजल्याचेर सुरू करपाक जाय. थंय भुरग्यांच्यो पिकनिको हाडपाक जाय. विज्ञानकेंद्रा भशेन!
विज्ञानाच्या प्रसारा खातीर आशिल्ली वेधशाळा काडून थंय कॅसिनो सुरू करप ही समाजीक मुल्ल्यांची विटंबणा. वेधशाळेक लागून भुरग्याचें गिन्यान, विचारशक्त, उमळशीक वाडटा, मात जुगार म्हणल्यार फक्त मनोरंजन आनी पयश्यां भोंवतणी घुंवपी खेळ. जुंता ह्या पुर्तुगेज उतराचो अर्थ एकठांय बसून निर्णय घेवपी गट. वेधशाळेक जागो ना दिवपाचो निर्णय जाला. मात ती दुसरे कडेन व्हरपाचें बी थारलां जाल्यार बेगीन कितें तें करचें.