दुर्बळ घटकां कडेन नमळायेन वागात

भांगरभूंय | प्रतिनिधी

पुलीस म्हासंचालकः दक्षीण गोंय मुख्यालयाक भेट

भांगरभूंय । प्रतिनिधी

मडगांवः फाटल्या कांय दिसांत कोलव्यां बायलेक मारपेट केल्ल्याचो आरोप, लोटलेच्या अपघाता विशीं दुबावीत कारवाय, पुलिसांचें निलंबन हे फाटभुंयेर पुलीस म्हासंचालक जसपाल सिंग हांणी दक्षीण गोंय मुख्यालयाक भेट दिली. समाजांतल्या दुर्बळ घटकां कडेन नमळायेन वागात असो सल्लो तांणी गोंय पुलिशेक दिलो. तेचवरी कांय वेळा घडणुको प्रोफेशनली कश्यो हाताळच्यो हाचे विशींय तांणी सुचोवण्यो केल्यो.

मडगांवच्या दक्षीण गोंय पुलीस मुख्यालयांत दक्षीण गोंयांतले सगळ्या पुलीस स्टेशनांचे पुलीस निरिक्षक आनी उपअधिक्षक हांची पुलीस म्हासंचालकान बसका घेतली. हे बसके उपरांत तांणी सांगलें, देशांत 1 जुलयच्यान नवे कायदे लागू जाल्यात. नव्या कायद्यांची अंमलबजावणी करतना पुलीस दळाक येतात त्यो आडखळी आनी ताचेर उपाय येवजण हांचेर हे बसकेंत चर्चा केली. विधानसभा अधिवेशन बेगिनूच जावपाचें आसा, तातूंत पुलीस खात्या कडेन संबंदीत प्रस्न विचारतात. तांकां योग्य आनी आंकडेवारी सयत जापो दिवच्यो, अश्यो सुचोवण्यो केल्यात.

गुन्यांवकारी नियंत्रणांत

दक्षीण गोंयांत फाटल्या दिसांनी अपघात वा हेर अश्यो कांय घडणुको घडल्यात. त्या प्रकरणांक प्रोफेशनली कशे हाताळचे, हे संबंदांत मार्गदर्शन केलां. एक- दोन अपघात जाल्ले, त्या प्रकरणांत खूबशे प्रस्न निर्माण जाताले. तातूंत वैजकी अधिकाऱ्यांची मजत घेतली. गोंयांतली गुन्यांवकारी नियंत्रणांत आसा. तातूंत आनीक उणाव कसो करपाचो हाचेर पुलीस खातें काम करता. समाजांतले दुर्बळ घटक, बायलो, भुरगीं, दिव्यांग, ज्येश्ठ नागरीक हांचे वांगडा पुलिसांनी कशे वागचे, हे विशीं सुचोवण्यो केल्यात.

खात्याचे कांय प्रस्ताव सरकारा कडेन प्रलंबीत

दर्यादेगे वयले सुरक्षेचेर लक्ष दितात. दर्यादेग सुरक्षा विभागाक नवे तरेच्यो हाय डेन्सिटी पॉलिअ‍ॅथलीन विवीध पुलीस स्टेशनांक बोटी दिल्यात. गोंयांतल्या पुलीस स्टेशनांची हेर वाठारां कडेन तुळा केली जाल्यार व्हड प्रमाणांत गाडयो दिल्यात. पूण एक गाडी पर्यायी आसची हे खातीर यत्न चल्ल्यात. गोंय सरकारा कडेन कांय प्रस्ताव पडून आसात. ते मंजूर जाले उपरांत जीं व्हड पुलीस स्टेशनां आसात, तांकां एक चड गाडी उपलब्ध करून दितले, अशें डीजीपी जसपाल सिंग हांणी स्पश्ट केलें.