भांगरभूंय | प्रतिनिधी
मात तें स्वताच ह्या प्रकरणांतलें गुन्यांवकार जाल्ल्यान ताचेर विस्वास दवरप काय ना, हो.
हिंदू धर्मग्रंथांनी बोध घेय सारके श्लोक आसात. भगवद् गीतेंत तर शिकपा सारकें खूब. ‘यदा यदा हि धर्मस्य ग्लानिर्भवति भारत। अभ्युत्थानमधर्मस्य तदात्मानं सृजाम्यहम्।’ म्हणल्यार, जेन्ना – जेन्ना धर्माक ग्लानी येता आनी अर्धम वाडटा, तेन्ना तेन्ना हांव (देव) स्वताक प्रकट करतां. ‘कर्मण्येवाधिकारस्ते मा फलेषु कदाचन।’ म्हणल्यार फक्त कर्म करप होच तुमचो अधिकार, फळाची आशा धरप न्हय. देखून फळाचो हुस्को करिनासतना कर्म करीत राव. बृहदारण्यक उपनिषद सांगता. वायट काम केल्यार ताचें फळ मेळटाच मेळटा, जो बरें काम करता तो बरो जाता, वायट काम करता तो वायट..! लोकांक हें खबर आसा. ह्या श्लोकांचेर तांची श्रद्धा, भक्ती आसा. ताचेर कोण टिका करीत जाल्यार तांच्यो भावनाय दुखवतात, मात तांचो श्लोकांचेर विस्वास नासतलो. नाजाल्यार ते ताच्या उरफाटें वागचे नाशिल्ले. समाजीक जिणेंत भ्रश्टाचार कितलो खोल मेरेन रिगला, तें नोकरे खातीर उमेदवार लाखांनी रुपया दितात, तें भायर सरतकच कळटा. म्हणजे पयशे घेवपी आनी दिवपी फळाची अपेक्षा धरूनच कर्म करतात, वायट काम केल्यार वायट फळ मेळटा हो विचार खुंटयाळ्याक लावन ते वायट कामांय करतात. दुर्जनांचो नाश करपाक हांव स्वताक प्रकट करता, अशें देवान म्हणलां तरीय कांय लोक देवाक भियेनासतना दुर्जन जातात. म्हणल्यार दुश्ट, वायट कामां करपी!
पुजा नायकान आयज अचकीत येवन दोन सरकारी अधिकारी आनी एका मंत्र्याचें नांव घेतलें. मात तें स्वताच ह्या प्रकरणांतलें गुन्यांवकार जाल्ल्यान ताचेर विस्वास दवरप काय ना, हो यक्षप्रस्न. पुलिसां सामकार आपणें अधिकाऱ्यांचीं नांवां घेतिल्लीं, अशें तें सांगता. आपले मोबायल फोन पुलिसांनी जप्त केल्यात. तातूंत ह्या प्रकरणा कडेन संबंदीत दोन व्हिडियो आनी बरीच म्हायती आसा, असो दावोय तें करता. ह्या सगल्याचो तपास जावंक जाय. सीम कार्डांनी ती म्हायती सांपडूं येता! आपणाक लोक घरा येवन त्रास करतात म्हूण आपूण पत्रकारां मुखार आयलां. आमचो णव जाणांचो गट पयशे एकठांय करतालो. तांकांय अटक जाल्ली. तीं मुखार येवन उलोवपाक तयार नात, अशेंय तें म्हणटा. खरें म्हणल्यार सगल्यांचीच पुलिसांनी चवकशी करूंक जाय आशिल्ली. 613 जाणां कडल्यान 17 कोटी 68 लाख रुपया घेतल्यात. ताची योग्य पद्धतीन नोंद आसतलीच. रोख दिल्ले काय चेकान? कोणाच्या नांवान काडिल्ले? पयशे दिवप्यांचीं नांवांय तपास यंत्रणेन सोदचीं. कारण कसल्याय कामा खातीर लांच दिवप, वशिलो लावप हो गुन्यांव. लांच घेवपी दोशी, तितलोच ती दिवपीय दोशी. पयशे घेवन खंय 80 जाणांक कामाक लायल्यांत. तांचींय नांवां कळपाक नाका?
काँग्रेसीचे आमदार कार्लोस फरेरा हे वकील. पुजा सांगता, त्या वर्स 2019 तें 2022 काळांत भाजपा सरकारान मंत्रीमंडळांतल्यान काडिल्ल्यान ढवळीकार मंत्री नाशिल्ले, अशें फरेरा सांगतात. मागीर पुजा तांचेर आरोप कसो करता? काय ताका तो कोणे करपाक सांगला, असो प्रस्नूय फेरेरान केला. ह्या पुराय प्रकरणाची पुलीस तपासणी 30 नोव्हेंबर मेरेन जातली. उपरांत खरें कितें, नेमके कोण घुस्पल्यात तें लोकां सामकार येवचें. पुजान जांचीं नांवां घेतल्यांत तेच दुबावीत काय आनीक कोण आसात, तेंय कळटलें? मात, ह्या प्रकरणांत जी उलाढाल जाल्या, ती पळयल्यार दुर्जनांचो आंकडो वाडत आसा, ह्या दुबावाक बळगें मेळटा. पयलींय ते आशिल्ले. दुर्जनाची गंधी विष्ठेचिया परी। देखोनियां दुरी व्हावें तया… अशें संत तुकाराम म्हणटात. पूण कांय लोक तांचे पसून पयस वच्चें सोडून लागीं लागीं वतात आनी एक दीस. स्वताच दुर्जन जातात. कलियूग आयलां म्हणटात तें खरें!!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
