भांगरभूंय | प्रतिनिधी
नवरात्रां म्हळ्यार दुर्गा मातेचो उत्सव. तिका शक्तीचें रुप अशेंय म्हणटात. नवरात्रां म्हळ्यार धर्तरेर देव देवीचें आगमन. …. कालच्यान नवरात्रां सुरू जाल्यांत. ते निमतान विशेश लेख.
पुराय भारतांत चड आवडीचो आनी व्हड प्रमाणांत मनयतात तो उत्सव म्हळ्यार नवरात्रां. नवरात्रां म्हळ्यार ‘णव राती’. ह्या णव रातींक दुर्गे मातेच्या णव रूपांचे पूजन जाता. कांय कडेन णव राती म्हळ्यार नाचांचो उत्सव. नवरात्रां म्हळ्यार गरबा आनी दांडियाचो उत्सव. दर रातीं राज्यभर, गांवांनी आनी शारांनी उक्त्या सुवातेर जमून लोक ही परब मनयतात.
नवरात्रां म्हळ्यार दुर्गा मातेचो उत्सव. तिका शक्तीचें रुप अशेंय म्हणटात. नवरात्रां म्हळ्यार धर्तरेर देव देवीचें आगमन. नवरात्रां म्हळ्यार सुखाचो समृद्धीचो उत्सव. फुलां, हारांची, उजवातींची घमघमाट. दिव्यांची रोशणाय, एकारत, पंचारत, धुपारतीची आरस. नवरात्रांक जावन आसात जोडव्यांची रोशणाय.
आमच्या गोंयात नवरात्रां म्हळ्यार मखरांचो उत्सव. गोंयच्या खुपश्या फामाद देवळांनी मखरांचो उत्सव पळोवपाक मेळटा. जशें चवथीक गणपतीक मखरांत पळोवचो तशेंच नवरात्रांनी देव देवींक मखरांत पळोवपाची संद मेळटा. धोल, शामेळ, झांजीच्या तालार ही मखरां हालयतात. णवूय रातीं देवळांनी मखरां हालयतात. दर दिसा देव देवींचें एक वेगळें रूप पळोवपाक मेळटा. मखर धोलता तशें देवीक पळोवपाची मजाच वेगळी. त्या वेळार दिसपी देवीचे रूप सामकें मन भुलयणें आनी ओडलायणें. नवरात्राचें खाशेलें आकर्षण म्हळ्यार णव दिसांचे णव रंग. दर दीसा लोक नवरात्रांच्या रंगा प्रमाण त्या त्या रंगाचे कपडे घालतात.
रंग नव्याचे
रंग नवरात्रांचे
रंग खोशेचे
रंग परबेचे
खुशाल जावची जीण सगल्यांची
हेंच मागणे दर ऐकल्याचें
दिव्यांचो झगझगाट
भांगरा शिंगरां
फळाराचें ताट
पळोवचो सगळ्यांचो
नवरात्रांतलो थाट
सगल्यांक परबी
भरभरून उपाट.
– शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
