दुयेंसांचेर संशोधन जायच

भांगरभूंय | प्रतिनिधी

णेंशैली बदल्ली काय दुयेंसां फाटल्यान लागतात. आमी गोंयकार 40 वर्सां पयलीं रातचीं णव म्हणल्यार जेवून हांतरूणार पडटाले. आयज चडशे लोक साडे इकरा पयलीं न्हिदनात. सांजच्या साता पयलीं जेवन साडेआठ मेरेन न्हिदपी गोंयकार आसात, अशें म्हणटात. पूण ते मेजकेच. गोंयकार तशे भलायकेचे बाबतींत जागृत. हांगा पावला- पावलांचेर दोतोर, हाॅस्पिटलां आसात. तरीय फाटल्या कांय वर्सां सावन कॅन्सर, किडणी, गोडेंमूत आनी हेर गंभीर दुयेंसांचें प्रमाण वाडलां. गोडेंमूत आनी रक्तदाब (प्रेशर) तर लागीं लागीं सगल्याच गोंयकारांक सतायता, अशें म्हणल्यार अतिताय थारची ना. थोड्यांक हे वखदां उत्पादकांचे डावपेच दिसतात. मात हाका चड जापसालदार आमची बदलिल्ली जिणेंशैली आसा, हें मान्य करचेंच पडटलें.
गोंयकारांक जावपी गंभीर दुयेंसां, रोगांचेर अभ्यास, संशोधन करपाचे उपक्रम चालीक लावपाचें सरकारान थारायलां. टाटा मेमोरीयल हॉस्पिटल आनी ऑक्सफर्ड विद्यापीठ हांचे मजतीन भलायकी खातें हो अभ्यास करतलें. उपरांत भलायकेचें धोरण आंखप सोंपें जातलें. दुयेंसांचें प्रमाण, ताचीं कारणां कळटलीं. दुयेंसां जावचीं न्हय, हे खातीर उपाय घेवपाक मेळटले. ते नदरेन निधीचीय तजवीज करपाक मेळटली. फक्त संशोधनूय न्हय, तर कॅन्सराचेर देशांतल्या आघाडेच्या हाॅस्पिटलांनी मेळटात, ते उपचार गोंयांत मेळपाक जाय. ते नदरेन भलायकी खात्याचे यत्न चालू आसात. हें काम जाता तितले बेगीन जावप गरजेचें. वैजकी शिबिरां वरवीं खात्यान कॅन्सराचे दुयेंती सोदपाचो यत्न केला. तातूंत तांकां यशूय मेळ्ळां. गोवा कॅर्स उपक्रमा खाला सुरवातेक वाळपय, सांखळे, मडगांव, काणकोणां आनी दर्यादेग वाठारांतल्या लोकांचे रक्ताचे नमुने घेतले. हेर चांचण्योय करतले. मागीर ताचेर अभ्यास करून निश्कर्श काडटले. हें संशोधन पुराय भारतांत जाता. म्हणटकच भारतीयांच्या दुयेंसां विशीं एक आराखडो, डाटा तयार जातलो.
कॅन्सराचें सगल्यांत चड प्रमाण आसा केरळांत. अर्थांत हे णव वर्सां पयलींचे आंकडे. थंय 1 लाख लोकां फाटल्यान 135.3 दुयेंती मेळिल्ले. मिझोरामांत कॅन्सर जावन सगल्यांत चड लोकांक मरण आयिल्लें. केरळ, मिझोरामा फाटल्यान हरियाणा, दिल्ली, कर्नाटक आनी आमच्या गोंयचो नंबर लागता. दोतोरांच्या मतान, गोंयांत ह्या शेंकड्याचे सुरवेक 50 ते 70 वर्सां पिराय गटांतले कॅन्सर दुयेंती मेळटाले. मात फाटल्या 15- 20 वर्सांच्या काळांत 20 ते 40 वर्सां पिरायेचे पसून कॅन्सर दुयेंती मेळ्ळ्यात. कोलोन (आंतकड्यांचो) कॅन्सर आदल्या तेंपार पिरायेच्या साठी उपरांत जातालो. आतां 30- 35 वर्सांचे दुयेंती सांपडपाक लागल्यात.
हें दुयेंस चुकीचे जिणेंशैली खातीर जाता, अशें दोतोरांक दिसता. तरी तें अनुवांशिकतायेक लागून जाता काय, हाचो अभ्यास जावंक जाय. कारण पणजो, आजो, बापूय, पूत, नातू हांचे मदीं कांय दुयेंसां समान आसात, अशेंय दिसून आयलां. हें कशें टाळप ताचेर वैजकी विज्ञान संशोधन करतलेंच, पूण जिणेंशैली बदलप आमच्या हातांत आसा. जिबेर ताबो दवरीत जाल्यार अर्दी दुयेंसां, समस्या ना जातल्यो…. आनी ही गजाल शिस्तबद्ध गोंयकाराक पसून कठीण दिसता.टिव्ही, सोशल मिडिया, नोकरी हाका लागून रातचें उसरां न्हिदप जाता. आमी दिसान दीस पश्चिमी जिणेंशैलीचे भकीक पडत आसात. ताण, तणाव, हुस्क्याक लागून प्रतिकार शक्तीचेर वायट परिणाम जाता आनी ती उणी जाली काय दुयेंसां जावपाक वेळ लागना. ताण उणो करपाक बरे छंद, व्यायाम, संगीत, वाचन हांचो फायदो जाता. बऱ्या मनशां कडेन इश्टागत वाडोवपाक जाय, सदांच कामांत घुस्पून रावपाक जाय. म्हणटकच ताण वाडना. खाण- जेवण वेळार जाय. दनपारचीं दोन, रातचीं धा हो जेवपाचो वेळ न्हय. ब्रह्म म्हुर्तार (फांतोडेर 4 ते 5.30 चे मदीं) उठप बरें खंय, पूण रातचो देडा- दोनाक न्हिदप्याक हें शक्य आसा? जेवणांत पालेभाजयो खावपाक जाय, ताजें अन्न जेवंक जाय. पूण, भायर खाणावळींनी ताटांत पडटा तें जेवप्यांचो आंकडो वाडला, ताचोय वायट परिणाम भलायकेचेर जाला. रातपाळी करप्यांक वेळार जेवप, न्हिदप शक्य नासता, पूण हेर लोकूय आतां मनाक येता तशें वागपाक लागल्यात. ताचे फाटलें कारण म्हणल्यार सोशल मिडिया. जाण्टे सोडात, आतां भुरगीं पसून वराचीं वरां मोबायल फोन घेवन बसपाक लागल्यांत. दिसाक पांच ते सात वरां पसून मोबायल पळोवपी भुरगीं आसात. हाकाच लागून फुडाराक दोळ्याचीं दुयेंसां वाडूं येतात, मानसीक भलायकी इबाडू येता. तांंकां मार्गार हाडपाचें शिवधोनू उखलपाची जापसालदारकी आतां पालकांची. मात ते खातीर तांकां स्वताच्या हातांतलो मोबायल फोन पयलीं कुशीक दवरचो पडटलो. समाजांतल्या जाणकारांनी जिणेंशैली बदलपाच्या वावराक लागचें. विज्ञानीक दिश्टीकोनांतल्यान सगल्यांनीच यत्न केल्यार हें शक्य आसा. ते खातीर आमकां पयलीं सगल्याच वेसनांचेर नियंत्रण दवरचें पडटलें.