भांगरभूंय | प्रतिनिधी
गाझा, खबरां संस्था : दुयेंतींचो जीव वाटावपा खातीर घरा वचनासतना अल शिफा हॉस्पिटलांतूच राविल्ल्या दोतोराक इस्राएलाच्या हवाई हल्ल्यांत मरण आयलां. ‘डेमोक्रेसी नाव’ ह्या दिसाळ्यान हे विशीं खबर दिल्या. ह्या दोतोराचें नांव हम्माम अल्लोह. मरणा आदीं दिल्ले मुलाखतींत, तांणी हॉस्पिटलांतल्यान भायर सरपाच्या इस्राएलाच्या आदेशांक विरोध केल्लो.
हे मुलाखतींत डॉ. अल्लोह हांणी सांगिल्लें, ‘हांव हॉस्पिटलांतल्यान भायर सरलो जाल्यार म्हज्या पेशंटांचेर कोण उपचार करतलो? ते प्राणी न्हय. तांकां योग्य वैजकी उपचार मेळपाचो अधिकार आसा. म्हज्या पेशंटांचो विचार करीनासनात फकत म्हज्याच जिविताचो विचार करपाक हांवें हें वैजकी शिक्षण घेवंक ना.’
ह्या हल्ल्यांत मरण आयिल्ल्या डॉ. अल्लोह हांचे वांगडी डॉ. बेन थॉमसन हांणी सांगलें, ‘डॉ. अल्लोह हांचे बापूय, मांव आनी भावाकूय इस्रायलाच्या हल्ल्यांत मरण आयलें. अल्लोह फाटल्यान घरकान्न, 4 आनी 5 वर्सां पिरायेचीं दोन भुरगीं आसात.
गाझाचें हें सगळ्यांत व्हडलें अल शिफा हॉस्पिटल आतां पुरायपणान बंद केलां. हवाई हल्ल्या वेळार ह्या हॉस्पिटलांतले बरेच दुयेंती मेल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
