भांगरभूंय | प्रतिनिधी
सुलेमान प्रकरणाची चवकशी आतां अर्थीक गुन्यांव विभागाच्या अधिक्षका वतीन
भांगरभूंय । प्रतिनिधी
म्हापशें: जमीन हडप प्रकरणांत अटक केल्लो सिद्दीकी उर्फ सुलेमान खानाक गुन्यांव फांट्याचे कोठडेंतल्यान पळून वचपाक मजत केल्लो दुबावीत आयआरबी कॉन्स्टेबल अमीत नायक हाका शेनवारा पणजी न्यायालयान जामिनाचेर सोडलो. पूण ह्या प्रकरणांतलो मुख्य दुबावीत सुलेमान अजून पुलिशेक मेळूंक ना.
मजगतीं, सुलेमानाक पळून गेल्ल्या प्रकरणाची अर्थीक गुन्यांव विभागाच्या अधिक्षका वतीन चवकशी सुरू केल्या. सुलेमान पळून गेल्यार आठ दीस जाले. ताका सोदपाक गुन्यांव फांटो आनी गोंय पुलिशेचे दोन पंगड कर्नाटकांत आनी हैदराबादांत गेल्यात. पूण सुलेमान अजून तांच्या हाताक मेळूंक ना.
सुलेमान 13 डिसेंबराक अमीत नायकाचे मजतीन गुन्यांव फांट्याच्या रायबंदरा वयले पुलीस कोठडेंतल्यान पळून गेल्लो. अमीत नायक हाणें ताका हुबळींत सोडिल्ल्याचें नायक हाचे चवकशेंतल्यान कळिल्लें. ते उपरांत तो हुबळींतल्यान हैदराबादाक गेल्ल्याचें उक्तें जाले उपरांत गोंय पुलिसांनी हुबळी सयत हैदराबादांत ताचो सोद सुरू केला, पूण अजून मेरेन तो पुलिशेक मेळूंक ना. तातूंत अमीताची न्यायालयान जामिनाचेर सुटका केल्या. ते खातीर पुलीस खात्यान ह्या प्रकरणाची अर्थीक गुन्यांव फांट्याचे अधिक्षक अर्शी आदील हांच्या फुडारपणा खाला शुक्रारच्यान चवकशी सुरू केल्या. अधिक्षक आदील हांणी ह्या प्रकरणांत गुन्यांव फांट्याच्या पुलिसांची पडताळणी सुरू केल्या.
सुलेमानाक जमीन हडप प्रकरणांतल्या विशेश चवकशी पंगडान (एसआयटी) अटक केल्ली. तांचेच कोठडेंतल्यान तो पळून गेला. अशें आसतनाय गुन्यांव फांट्याच्या पुलिसांचीच खात्यान चवकशी सुरू केल्ल्यान पुलिसां कडल्यान प्रस्न उपस्थीत केल्यात.
अमीत नायकाची सुनावणी बंद दारा आड
सिद्दीकी उर्फ सुलेमान खान प्रकरणांतलो दुबावीत अमीत नायक हाची पणजी प्रथमश्रेणी न्यायालयान शेनवारा सशर्त जामिनाचेर सुटका केली. 25 हजार रुपयांची हमी आनी तितलेच रकमेचो हमीदार, गरजे वेळार चवकशी अधिकाऱ्यां मुखार हाजीर रावप आनी हेर अटी न्यायालयान जामीन मंजीर करतना घातल्यात. ही सुनावणी न्यायालयांत बंद दाराआड जाली. ह्या वेळार पोरणें गोंय पुलिसांनी न्यायालया मुखार आपले तीन म्हणणें अर्ज सादर केले. दुबाविता वतीन अॅड. कौतीक रायकार हांणी युक्तीवाद केलो.
हजरत अलीच्या जामिनाचेर फाल्यां सुनावणी
सुलेमानाक हुबळींतल्यान हेर सुवातेर पळून वचपाक मजत केल्लो दुबावीत हजरतसाब बवन्नवर उर्फ हजरत अली हाणें जामिना खातीर पणजी न्यायालयांत अर्ज दाखल केला. त्या अर्जाचेर सोमारा सुनावणी जातली.
सुलेमान पळून वचपांत पुलिसांचीच चूकः तानावडे
सुलेमान खान गुन्यांव फांट्याचे कोठडेंतल्यान पळून वचपाक शंबर टक्के चूक पुलिसांची आसा. ह्या चुकींचो सोद पुलिसांनी घेवपाक जाय. सुलेमानाक बेगिनात बेगीन अटक करपाचे यत्न चल्ल्यात. ताका बेगिनूच अटक करतले, अशें राज्यसभा खासदार तशेंच भाजप प्रदेशाध्यक्ष सदानंद शेट तानावडे हांणी शेनवारा पत्रकारां कडेन उलयतना सांगलें.
पुलिसांनी उपस्थीत केल्ले प्रस्न
सुलेमान पळून गेलो त्या दिसा पुलीस कोठडेचेर फक्त दोनूय गार्डांची नेमणूक ड्युटी मास्तरान कोणाच्या आदेशा वयल्यान केल्ली? पुलीस मॅन्युएला प्रमाण दर दिसा गार्ड ड्युटीचेर तीन कर्मचाऱ्यांची नेमणूक करप हो नेम आसतनाय ह्या प्रकरणा वेळार हो नेम कित्याक मोडलो? सुलेमान पळून वचपाच्या प्रकरणांतलो कागाळदार तशेंच गुन्यांव फांट्याचो पुलीस हवालदार सर्वेश कांदोळकार हाकाच सेवेंतल्यान कित्याक निलंबीत केलो?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
