भांगरभूंय | प्रतिनिधी
आयज 10 डिसेंबर. संवसारीक मानवी हक्क दीस. मानवी हक्कां विशीं जागृताय करपाक, व्यक्तींक आनी समाजाक फुडारा पासत बरो तयार करपाक, सशक्त करपाक मनयतात. मानवी हक्कांची पुराय शक्त आमकां जाय आशिल्ल्या संवसारांत वचपाचो मार्ग म्हूण आपणावन आनी ताचेर विस्वास दवरून आमी चड शांत, समान आनी सहसंवेदनशील जावंक शकतात.
ह्या मानवी हक्क दिसा आमी मनीस हक्क आपणावपाचे मार्गाचेर लक्ष केंद्रीत करीत तर बऱ्या खातीर प्रतिबंधात्मक, संरक्षणात्मक आनी परिवर्तनकारी शक्त म्हणून म्हत्वाची भुमिका बजावपाक शकतात. मानवी हक्कांचो परिणाम सगळ्यांचेर, दर दिसा जाता. आमचे हक्क, आमचो फुडार हांचेर जाता.
आमच्या देशांत अपंगत्व आशिल्ल्यो व्यक्ती, बायलो, अर्थीक आनी समाजीक नदरेन फाटीं उरिल्ले वर्ग, लिंगीक विविधतायेचे लोक आनी हेर दुबळे वर्ग चड करून मानवी हक्कांचे उल्लंघनाचे बळी थारतात. गोंयांत लेगीत आंतरराश्ट्रीय मानवी हक्क दीस मनोवपा खातीर भौशीक कार्यावळी जातात. थंय अपंगत्व आशिल्ल्या व्यक्तींक हाजीर रावपाक प्रवेशसुलभता आसा काय ना हें पळोवपाची तकालस कार्यावळ घडोवन हाडपी मानवी हक्क राखणदार अधिकारिणी लेगीत घेनात, हो आमचो वायट अणभव. हाचे सारको विरोधाभास दुसरो आसा?
आमकां खरेंच मानवी हक्कांची काळजी आसा काय असो प्रश्न पडटा. अपंगत्व आशिल्ल्या व्यक्तींच्या मानवी हक्कांच्या हुस्क्यां विशीं आमी कितलेशे संवेदनशील आसात काय?…
देखून मानवी हक्कांचें म्हत्व आनी गंभीरताय मान्य करपाक, नकारात्मक रूढीवाद आनी चुकीचे समजुतींक आडावून धोरणां बदलपाक आनी मानवी हक्कां खातीर जागतीक चळवळीक परतून उर्बा दिवपाक, कृती करपाक, सगळ्यांक प्रेरणा दिवपाक, जागृताय निर्माण करपाक आमकां हो दीस एक व्हड संद आसा.
संवसारभर दर वर्सा 10 डिसेंबराक मानवी हक्क दीस मनयतात. मानवी हक्कांची सार्वत्रिक घोशणा ह्या दिसा जाली. ह्या म्हत्वाच्या दस्तावेजांत मनीस म्हणून दरेकल्याक मेळपाक जाय आशिल्ले अविभाज्य हक्क- हे सगळे दर एकल्याक वंश, रंग, धर्म, लिंग, भास, राजकी वा हेर मत, राश्ट्रीय वा समाजीक मूळ, मालमत्ता, जल्म वा हेर दर्जो हांचो विचार करिनासतना मेळूंक फावो.
हें घोशणापत्र संयुक्त राश्ट्रांच्या आमसभेन पॅरिसांत 10 डिसेंबर 1948 दिसा जाहीर केल्लें आनी तातूंत पयलेच खेपे सार्वत्रिकपणान राखण दिवपाचे मुळावे मनीस हक्क सांगल्यात.
“सगल्या लोकां खातीर आनी सगळ्या राश्ट्रां खातीर सादारण साध्यतायेचो मानक” म्हूण, हो दस्तावेज आंतरराष्ट्रीय, राष्ट्रीय, आनी थळाव्या कायदे आनी धोरणां खातीर एक जागतीक नकासो आनी टिकावू उदरगती खातीर 2030 वर्साच्या अजेंडेचो एक मुळावो आराखडो मानतात.
ह्या दिसाचो विशय
‘आमचे हक्क, आमचो फुडार, सध्या (आयचे घडयेक)’ हो ह्या वर्साचो विशय म्हणल्यार आमचे दिसपट्टे जिणेंत मनीस हक्कांचें म्हत्व आनी प्रासंगिकता मान्य करपाचो उलो. दुस्वास पातळावपी उलोवपा आड उलोवन, चुकीची म्हायती दुरुस्त करून आनी चुकीचे म्हायतीचो प्रतिकार करून धारणा बदलपाची संद आमकां मेळटा.
मानवी हक्क दीस मनोवन आमचे सरभोंवतणच्या लोकांच्या, खासा करून दुबळ्यांच्या हक्कां पासत वावुरपाचो विचार पातळावंया. आमी समाज म्हणून हें करीना जाल्यार दुबळ्यांचे/ अक्षम लोकांचे मानवी हक्क कागदार आनी पुलीस, न्यायसंस्था, प्रशासन आनी हेर अधिकारिणींच्या फायलींनीच उतरले.
प्रकाश वामन कामत
9422443093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
