भांगरभूंय | प्रतिनिधी
भांगरभूंय । प्रतिनिधी
मुरगांवः रेल्वे दपदरी मार्गा वयल्यान वेळसांव पंचायतीचे ग्रामसभेंत तापातापी जाली. वेळसावांत खण वेवसाय सुरू जावपाचो आसा ताचे वयल्यान बरोच वेळ वातावरण तापलें. वेळसांवच्या लोकांनी रेल्वे उदरगत निगमा वरलीं जावपी रेल्वे दोट्टीकरण करपाचो यत्न कांय फावट बंद उडयल्लो. तोच मुद्दो लोकांनी ग्रामसभेंत उपस्थीत केलो. ह्या प्रश्नाचेर तोडगो काडपा खातीर तांणी पंचायत मंडळाक सूचोवण्यो केल्यो.
रेल्वे दोट्टीकरणाच्या नांवार रेल्वे उदरगत निगम लोकांची जमीन बळकावपाचो यत्न करता असो आरोप ग्रामस्थांनी केलो. निगमाचे कामगार रेल्वे ट्रॅका कडेन वय घालपा खातीर येतात, सर्वे करपाचो यत्न करतात. लोकांक हें काम बंद उडोवचें पडटा. हाचेर उपाय काडपाची मागणी ग्रामस्थांनी केली.
वेळसांव वाठारांत खण वेवसाय सुरू जातलो अशें सांगतात. ते सुरू करचे पयलीं लोकांचे जे प्रस्न आसात ते सुटावे करचे पडटले. ते सुटावे जातात जाल्यार खण वेवसाय सुरू करपा खातीर आमी तयार आसात अशें कांय ग्रामस्थांनी सांगलें. खण वेवसाय एक फावट सुरू जालो म्हणटकूच लोकांक कोक्यार मारतात हो लोकांचो अणभव आसा. पंचायत मंडळान लोकांचे प्रश्न पयली सुटावे करून घेवन उपरांत खण वेवसायाचो विचार करचो अशें ग्रामस्थांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
