भांगरभूंय | प्रतिनिधी
आदल्या तेंपार वाड्या- वाड्यार गोरवांचें 2-3 तरी गोठे दिसताले. मात, फाटल्या 25 वर्सांनी हो आंकडो देंवला. आतां पारंपरीक शेतकारांनी पसून गोरवां पोसप सोडून दिलां. तरीय दुसरे वटेन दुद वेवसाय मळाचेर 50- 100 गोरवांचें फार्म सुरु करपी शेतकारांची नवी पिळगी, नवगिरेस्त तरणाटे दिसतात. ही थाकाय दिवपी गजाल. गोंयची लोकसंख्या दिसान दीस उणी जायत आसा. चडशे गोंयकार सुशिक्षीत. बरी नोकरी, वेवसाय करतात. म्हणटकच कश्टाचीं कामां करप तांणी सोडून दिलां. अर्थीक स्थिती घटमूट आशिल्ल्यान तीं करपाची तांकां तशी गरजूय ना. मात, ही मानसिकताय बदलपाची व्हडली संद आमचे मुखार आसा. खाणां करपाच्या मळार आतां गांवांगावांनी बायलां स्वताच्या पांयांचेर उबीं रावल्यांत, तशे दादलेय उबे रावपाक शकतात. सरकाराच्या मतान, गोंयांत दूद वेवसायांत आमी लाखांनी रुपया जोडपाक शकतात. सध्या गोंयांत फावो तितलें दूद उत्पादन जायनाशिल्ल्यान शेजराच्या राज्यांतल्यान दूद येता. ते जोडून वतात. कितले?…. उणेच एक कोटी रुपया. तेय बी दर दिसा. आमी म्हयन्याक पंचवीस कोटीच धरुया! हाचे वयल्यान गोंयांत दूद विक्री आनी दुदाचे जिनस विकून जोडपाक कितलो वाव आसा, ताची फक्त कल्पना करची. वयल्यान गोरवां पोसपाच्या वेवसायाक सरकारी खातीं पुराय पालव दितात.
गोंय पर्यटन राज्य आशिल्ल्यान, तशेंच गोंयकार सुखवस्तू आशिल्ल्यान हांगा भायले- भितरले लोक मोडपाक आयकनात. पूण गोंयकारांक जाय, तें सगलें भायल्यान येता. आमी ते विकत घेतात. तो पयसो त्या- त्या राज्यांनी वता. गोंयच्या शेतकारांक फक्त दूद विकून भायल्या कंपन्यां कडल्यान पयसो मेळटा. बाकी व्हडलोसो फायदो ना. सहकार मंत्री सुभाष शिरोडकार म्हणटात, हें अशेंच चालू रावलें जाल्यार गोंयकारांक आनी गोंयाक ताचो फायदो कितें? सहकार चळवळ (दुदाचे बाबतींत) घटमूट करप हो हाचेर एकमेव उपाय. सुशिक्षीत तरणाट्यांनी लज नासतना डेरी वेवसायांत येवंक जाय. आमी लागता ती मजत करपाक तयार आसात.
सहकार मंत्री म्हणटात तें खरें. सहकार चळवळ घट करपाक जाय. पूण ती दुबळी कशी जाली? कोण जालो पडमूर? खाल्ल्या पानार हळशीक करप्यांक कितें ख्यास्त बी जाली व्हय? कर्नाटक, महाराष्ट्रांत सहकार चळवळ जशी फुल्ली, तशीच हांगा फुलची अशी अपेक्षा ना. पूण, आमी फायद्यांत येवपाक कितें अडचण आसा? गोवा डेरीक खंय 14 कोटींचें लुकसाण जालां. ते खातीर नव्या संचालक मंडळान सरकारा कडेन मजतीचो उलो मारला. कदंब म्हामंडळाक करतात, तशीं मजत सरकारान केलीय जाल्यार गोवा डेरी वयर काडपाक बरोच घाम गळोवचो पडटलो. कारण दिसाळ्यांनी फाटीं आयिल्ल्यो खबरो. कांय बुकल्यांनी दुदा वयली साय (फायदो) चाटून चाटून खाल्या खंय. आतां ते दोळें धांपून सु्स्त पडल्यात. वताक शेकपी ह्या दोन पायांच्या बुकल्यांचे शेंपडेक बरो चुरचुरीत दाग दिवपाचें धाडस सहकार खातें करीत? दुदाचें मळूच न्हय, तर राज्यांतल्या सगल्याच मळांचेर चलतना बुकले, घुशी गिद, लांडगे, खेतीं आपटतात. तातूंतल्या थोड्यांकूच ख्यास्त जाल्या.
गोवा डेरीच्या नव्या मंडळान 2019- 20 वर्सांचें आॅडिट सुरू केलां. 2021-22 चेंय जातलें. पूण अर्थिक परिस्थिती सामकी नाजूक आसा, अशें नवे अध्यक्ष राजेश फळदेसाय हांचें मत. तांकां डेरी जाग्यार हाडपाक रातदीस जागें रावचें पडटलें. प्रशासकीय काळांत डेरीक सगल्यांत चड लुकसाण जालां, असो तांचो दावो. तो कित्याक जालो, ताका जापसालदार कोण, तें गोंयकारां मुखार येवं दी. दोन म्हयन्यां पयलीं खबरो आयल्यात. ताची उजळणी जावं दी, तीय बी पुराव्यां सयत. गोवा डेरीच्या दुदाची विक्री 40 हजारांचेर पाविल्ली, ती आतां 48 हजारांचेर पावल्या. फेब्रुवारी मेरेन 70 हजार लीटर दूद विकपाची मोख दवरल्या. शक्य आसा. पूण ते खातीर सहकार खातें आनी मुख्य म्हणल्यार गोंयकारांनी तेंको दिवचो पडटलो. सगल्यांत पयलीं डेरी मंडळान गिरायक, दूद वितरक, शेतकार हांच्यो कितें समस्या आसात, तें जाणून घेवचें पडटलें. गोंयांत दुदाचे विक्रेक खूब वाव, जाय फक्त घेवपाक संदीचो लाव. शेतकार आनी गोवा डेरी तो घेतले आनी राज्यांत धवी क्रांती करतले, अशी आस्त बाळगुपाची?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
