भांगरभूंय | प्रतिनिधी
मुख्यमंत्री डॉ. प्रमोद सावंत हांणी वांटलीं म्हामंडळां
मायकल, संकल्प, केदार हांची मंत्रीपदाची आस्त उणी
चंद्रकांत कवळेंकार हांकां पेझाद कला अकादमी
भांगरभूंय । प्रतिनिधी
पणजी : विधानसभा वेंचणूक आनी आमदारां मदल्या असंतोशाचे फाटभुंयेर मुख्यमंत्री डॉ. प्रमोद सावंत हांणी आदल्या आनी आतांच्या आमदारां सयत पदाधिकार्यांक म्हामंडळांचें वांटप केलें. काँग्रेसींतल्यान भाजपांत प्रवेश केल्ले मायकल लोबो, संकल्प आमोणकार (सिवरेज) आनी केदार नायक हांकां (जीटीडीसी) पेझाद म्हामंडळां मेळिल्ल्यान तांकां मंत्रीपद मेळपाची शक्यताय उणी जाल्या. रवी नायक हांच्या मरणान रितें जाल्लें मंत्रीपद तांचो पूत रितेश नायक वा पेझाद आमदाराक मेळपाची चर्चा आसा. पोटवेंचणुके उपरांतूच रित्या मंत्रीपदाचो निर्णय घेतले अशी खर शक्यताय आसा.
गोंयांत 13 डिसेंबराक जिल्हो पंचायत वेंचणुको जातल्यो. उपरांत फोंडें मतदारसंघा खातीर पोटवेंचणूक जातली. कांय नगरपालिकांच्यो वेंचणुको जाले उपरांत 2027 त विधानसभा वेंचणूक जातली. काँग्रेसींतल्यान भाजपांत आयिल्ल्या आमदारांचो असंतोश पयस करपा वांगडा आदल्या आमदारांचेंय समाधान करपाचो यत्न मुख्यमंत्र्यांनी केला. हातूंत परत रितें मंत्रीपद कोणाक मेळटलें? हे विशींचो सस्पेन्स कायम उरतलो, हाचीय खबरदारी डॉ. सावंत हांणी घेतल्या. मंत्रीपदा खातीर इत्सूक आशिल्ले संकल्प आमोणकार हांणी आदीं बालभवन अध्यक्षपद स्विकारपाक न्हयकार दिल्लो. तांकां आतां पेझाद अशें सिवरेज म्हामंडळाचें अध्यक्षपद दिलां. गणेश गांवकार सभापती जाले उपरांत रितें जाल्लें पर्यटन विकास म्हामंडळ (जीटीडीसी) अध्यक्षपद केदार नायक हांकां मेळ्ळां.
‘म्हजें घर’ येवजणे वरवीं डॉ. सावंत हे दरेका मतदारसंघाक भेट दितात. अर्जांचें वांटप करतनाच ते सरळ जनता तशेंच कार्यकर्त्यां कडेन संपर्क करतात. जिल्हो पंचायत वेंचणुके वांगडा येवपी विधानसभा वेंचणुकेचे तयारेचोय हो भाग.
चंद्रकांत कवळेंकार (केपें), दयानंद सोपटे (मांद्रें) आनी दयानंद मांद्रेंकार (शिवोले) हे फाटले विधानसभा वेंचणुकेंत हारिल्ले. चंद्रकांत कवळेंकार हांकां पेझाद अशें कला अकादमीचें अध्यक्षपद दिलें. तशेंच सोपटे हांकां बाल भवन, जाल्यार मांद्रेंकार हांकां एससी आनी ओबीसी वित्त महामंडळाचें अध्यक्षपद दिवन तांकां खूश केल्यात.
संघटनेंत म्हत्वाची भुमिका करपी सर्वानंद भगत हांकां खादी ग्रामोद्योगाचें उपाध्यक्षपद दिलां. आदीं सावन सरकाराक फाटबळ दिवपी आंतोन वाझ हांकां खादी ग्रामोद्योग म्हामंडळाचे अध्यक्षपद मेळ्ळें. गोविंद पर्वतकार हांचें शिक्षण विकास म्हामंडळ अध्यक्षपद कायम दवरलें. मंत्रीपदाचो त्याग करचो पडिल्ल्यान उबगल्ले आलेक्स सिक्वेरा हांची कायदो आयोगाच्या अध्यक्षपदार नेमणूक जाली. कायदो आयोगाचें अध्यक्षपद बरींच वर्सां जालीं रितें आशिल्लें. ताचेर आतां आदल्या मंत्र्यांची नेमणूक केली. मंत्रीपदा वयल्यान देंवयल्ल्या गोविंद गावडे आनी निलेश काब्राल हांकां मात कसलेंच पद मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
