दुदसागर फेस्टाविस्टा: गोंयची संस्कृताय, कला आनी उत्सवांचो उत्सव
भांगरभूंय | प्रतिनिधी
धारबांदोडें ः दुदसागर फेस्टाविस्टान अविस्मरणीय सांस्कृतीक नाच आनी लायव्ह सादरीकरण करून गोंयची संस्कृताय सादर केली. गोंय पर्यटन उदरगत म्हामंडळ (जीटीडीसी) आनी पर्यटन खात्यान नाताळाच्या दिसा 25 डिसेंबराक कुळेंच्या मेतावाडोच्या मैदानाचेर ही कार्यावळ आयोजीत केल्ली.
गोंय राज्य बागायती म्हामंडळाचे अध्यक्ष प्रेमेंद्र शेट, डॉ. गणेश गांवकार जीटीडीसीचे अध्यक्ष, गेविन डायस, महावेवस्थापक जीटीडीसी, लक्ष्मीकांत वायंगणकार, महावेवस्थापक जीटीडीसी, दीपक नार्वेकार, उपमहावेवस्थापक जीटीडीसी, संदीप गावस आनी हेर मानेस्त ह्या वेळार हाजीर आशिल्ले.
डॉ. गणेश गांवकार हांणी गोंयच्या भितरल्या वाठारांत पर्यटनाक चालना दिवपा खातीर आनी पर्यटन अणभव वाडोवपा खातीर दुदसागर फेस्टाविस्टा सारक्या उपक्रमांचें म्हत्व उक्तायलें.
गोंयची संस्कृताय आनी परंपरेक चालना दिवपाक ही कार्यावळ कशी म्हत्वाची आसा हाचेर प्रेमेंद्र शेट हांणी भर दिलो.
दुदसागर फेस्टाविस्टाक बँड 24 के, कशिश अँड बॉलीवूड बँड, डीजे अमीन आनी अहसान कुरेशीच्या विनोदी सादरीकरणान प्रेक्षकांक मोनेळ घालो. सूत्रसंचालक एमसी सेड्रिकाच्या सादरीकरणान महोत्सव आनीक रंगतदार जालो.
दाभाल किर्लपालच्या बाल सती आपमजत गटान दिवली नाच सादर केलो. कुळेंतल्या अवर लेडी ऑफ पियेटी विद्यालयाच्या विद्यार्थ्यांनी “सेव्ह द गर्ल चायल्ड” ह्या विशयाचेर एक मनभुलोवपी अभिनय सादर केलो. दीपक नार्वेकार हांणी मानेस्तांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
