भांगरभूंय | प्रतिनिधी
जीप धनी संघटणेची मागणीः 8 कोटींचो घोटोळो उक्तो जाल्ल्याचो दावो
भांगरभूंय । प्रतिनिधी
फोंडें: रान खात्याची परवानगी नासतनाय गोंय पर्यटन विकास मंडळान दुदसागर घसघशाचेर वचपी पर्यटकां खातीर कावंटर सुरू करून 175 रुपया दर लागू केला. हे खातीर पर्यटकांचो आंकडो देंवला. आदले वरी वेवसाय चलचो हे खातीर गोंय पर्यटन विकास मंडळाचो कावंटर बंद करचो. पर्यटकांक सेवा दिवचे खातीर सुरू केल्ले वॅबसायटीचो गैरवापर करून सुमार 8 कोटी रुपयांचो घोटाळो उक्तो जाला. ते खातीर वॅबसायट परतून संघटणे कडेन घेवपाची प्रक्रिया सुरू करपाचो निर्णय आयतारा कुळ्यां जाल्ले दुदसागर टूर ऑपरेटर जीप धनी संघटणेचे साबार बसकेंत घेतलो.
दुदसागर टूर जीप धनी संघटणेचे अध्यक्ष निलेश वेळीप हांचे अध्यक्षते खाला आयतारा साबार बसका जाली. ह्या वेळार 400 परस अदीक जीप धनी हाजीर राविल्ले.
संघटणेचे आदले अध्यक्ष आनी आदले सचीव हांणी संघटणेच्या हेर वांगड्यांनी वॅबसायटींचो वापर करून बरी सुविधा दिवचे खातीर फोंडेंच्या नीता ट्रॅव्हल्स नांवाच्या आस्थापना कडेन कबलात केल्ली. ते खातीर संघटणेच्या हेर पदाधिकाऱ्यांक आदले अध्यक्ष आनी आदल्या सचिवान विस्वासांत घेवंक नाशिल्ले. ते वॅबसायटीचो वापर करचे खातीर नीता ट्रॅव्हल्स ह्या आस्थापना वतीन गोंय पर्यटन विकास मंडळा कडेन कबलात केल्ली. ते खातीर 2024 च्यान पर्यटकांक घसघशाचेर वचपा खातीर 275 रुपया शुल्क घेवपाक सुरवात जाल्ली. सध्याचे संघटणेच्या पदाधिकाऱ्यांनी मेळयल्ले म्हायती प्रमाण जमा जाल्ल्या सुमार 8 कोटी रुपयांतले गोंय पर्यटन विकास म्हामंडळाचे तिजोरेंत फक्त 34,30,440 रुपया जमा केल्यात. उरिल्ल्या पयशांचो हिशेब मेळनाशिल्ल्यान घोटाळो उक्तो जाल्ल्याची चर्चा साबार बसकेंत जाली. ह्या वेळार संघटणेचे आदले अध्यक्ष नी आदले सचीव हांचे कडल्यान नीता ट्रॅव्हल्स आस्थापना कडल्यान वॅबसायटीचो गैरवापर केल्ल्याचें लेखी पत्र घेवपाचो निर्णय घेतलो. ते प्रमाण आदले अध्यक्ष आनी आदल्या सचिवान लेखी पत्र अध्यक्ष निलेश वेळीप हांचे सुवादीन दिलें. गोंय पर्यटन विकास मंडळान सुरू केल्ल्या कावंटराक लागून पर्यटकांचो आंकडो देंवला तशेंच 8 कोटी रुपयांच्या घोटाळ्या विशीं मुख्यमंत्र्यांक कल्पना दिल्या. 2 ऑक्टोबराक पर्यटन मोसम सुरू जातलो. मुख्यमंत्र्यान ते आदीं बसका घेवन हे समस्येचेर उपाय काडचो, अशी मागणी जीप धनयांनी ह्या वेळार केली.
आपल्या जिवाक धोकोः निलेश वेळीप
घोटाळो उक्तो केल्ल्यान आपल्याचेर तशेंच घरच्यांचेर चेपण येता. कांय दिसां आदीं पत्रकाराक लेगीत लक्ष्य केल्लो. ते खातीर आपल्या जिवाक धोको निर्माण जाला. कुळेंच्या सगळ्या जीप धनयांचो आपल्याक तेंको आसा. तशेंच दुदसागर देवाचो लेगीत आशिर्वाद आशिल्ल्यान मोसम सुरू करतना पर्यटकांक बरी सुविधा दिवपाचो यत्न संघटणे वतीन करतले, अशें अध्यक्ष निलेश वेलीप हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
