भांगरभूंय | प्रतिनिधी
चुकीच्या मार्गान येवपी पयश्यांत समाधान नासता, प्रामाणीकपण जपपाक जाय, हें घरांत, शाळांनी शिकोवपाचो वेळ आयला.
फाटल्यो खबरो चाळून पळोवच्यो. वास्को शोरुमांत काम करपी तरणाट्यान बेकायदेशीर पद्दतीन गाडयो विकून 12 लाख आपल्या खात्यांत वळयले. फोंड्यां वस्ती विकपाच्या दुकानांत दोन बायल कामगारांनी 1 कोटी 14 लाखांच्या भांगराच्या वस्तींची अफरातफर केली. वास्को कंपनीक 6 कोटी 9 लाख रुपयांक फटोवपी 8 वर्सां उपरांत सांपडलो. काकोडेंच्या तरणाट्याचे कारनामे तर भायर सरतूच आसात. विशाखापट्टणमांत एकल्यान इश्टीणीचे तीन कुडके केले. होंडा 24 वरां चलपी जुगार अड्ड्याचेर 52 हजार जप्त. णव जाणांक धरले. कोरगांवां, मयां भावाचो भावाचेर, चुलत भावाचेर हल्लो…..! ह्या घडणुकांनी पयसो ही समान गजाल आसा. पयश्यां खातीर वा पयसो वापरून हीं कर्मां घडल्यांत. इस्टेट दुसरें कारण. गोंयांत झटपट गिरेस्त जावपाची सर्तूच लागल्या. ताचे हे बळी!
गोंयांतूच न्हय, तर पुराय देशभर दिसपी ही प्रवृत्ती. हुस्को करपा सारकी. सगलेच रातयां गिरेस्त जावंक सोदतात. कित्याक तर दर दिसा खावपा- पिवपाचेर, मजा मारपाचेर दुडू मोडपाक मेळचे म्हूण. प्रामाणीकपणान वेवसाय, नोकरी करून जोडल्यार कोणाक हरकत आसपाची गरज ना. मात थोडे बेकायदेशीर मार्ग आपणायतात आनी एक दीस फोंडांत पडटात. किंग मोमोची ‘खाओ, पिओ, मजा करो’ची राजवट पांच दिसांची. पूण ती वर्सयभर भोगूंक मेळची अशें दिसपी गोंयकार आसात. चंगळवाद शांत मनशाकूय आवडूंक लागला. ‘इझी मनी’न कायदेशीर, बेकायदेशीर कामांची रेशाच पुसल्या. हो सोंपेपणी मेळिल्लो पयसो केन्नाच तिगना. ताचें मोल खूब फावटी प्रतिश्ठा वगडावन दिवचें पडटा. निमाणी उरता ती फक्त लज. (अर्थांत ती आसल्यार) पश्चातापूय जाता. पूण तो मेरेन उशीर जाल्लो आसता. शाॅर्टकटान मेळिल्लो पयसो जिणेक लांब वळण लायता, हें फट न्हय.
भ्रश्टाचार, गैरप्रकाराची प्रवृत्ती वाडपाची खूब कारणां आसात. म्हारगाय हें एक. घरखर्च, शिक्षण, भलायकी, खाण- जेवण सगलेंच म्हारग. ह्या अर्थीक चेपणाक लागून दुडू जोडपाक बरेच जाण दोन नंबरचो मार्ग आपणायतात. गुन्यांवूय करतात. पूण म्हारगाय हें एकूच कारण न्हय. कारण सगलेच लोक गुन्यांव करिनात. म्हारगे जिणेशैलीची सर्त वाडल्या. तें चेपणूय आसता. सिनेमा, सोशल मिडिया…. सगलेच कडेन लक्झरी लायफ दिसता. म्हारग फोन, कपडे, गाडी हाका स्टेटस मानतात. प्रामाणीकपण, सादेपण, हुशारी हाका किंकोत करपी लोक वाडत आसात. खंयच्याय मार्गान आलायती जोड करपी, धूर्त, रोमियो, पयसो मोडपी, आपल्याक वेळ दिवपी मनीस आतां सगल्यांकूच आवडूंक लागला. मेहनत करून जोडप्यांचो आंकडो देंवता. झटपट यश, पयसो हें आयचें ध्येय. ‘कांय जावंचें ना, मागीर पळोवया, पुलीस, मंत्री वळखीचो आसा.’ ही मानसीकता कायद्याची भिरांत उणी करता. आदल्या तेंपार प्रामाणीकपण म्हणल्यार अभिमान दिसतालो. आयज कितले पयशे, मालमत्ता, गाडयो आसात, कितले दुडू मोडटा, ताचेर मनशाचें मोल थारता. वयर ज्या घडणुकांचो उल्लेख केला, त्यो म्हणल्यार विस्वासाचो गैरवापर, झटपट पयसो मेळोवपाचो मोह. आडेचो पयसो मेळ्ळो काय मागीर सोहमा सारके तरणाटे चलयां फाटल्यान जाळें घेवन भोंवतात…. आनी तांकां चलयो मेळटातूय बी!
संस्कार हे रक्तांतूच आसपाक जाय वा परिस्थितीक लागून ते घडपाक जाय, हें खरें. पूण उपदेशवजा संस्कार ल्हानपणा सावन भुरग्यांचेर करप बरें. फक्त उलोवन न्हय, तर कृतींतल्यान. चुकीच्या मार्गान येवपी पयश्यांत समाधान नासता, प्रामाणीकपण जपपाक जाय, हें घरांत, शाळांनी शिकोवपाचो वेळ आयला. पयसो म्हणल्यारूच यश हें समीकरणूय बदलूंक जाय. प्रामाणीक मनशांक समाज तकलेर घेवन नाचतलो, मान दितलो तेन्नाच ही इझी मनीची, शाॅर्टकट मार्गान यश मेळोवपाची प्रवृत्ती उणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
