भांगरभूंय | प्रतिनिधी
म्हापशें, प्रतिनिधी ः पर्वरी पुलिसांनी दुचाकी आनी देवळांत चोरी करपी टोळी उक्तडार हाडली. तांचे कडल्यान चार लाखांच्यो चार दुचाकी जप्त केल्यात. ह्या प्रकरणांत ललित वायंगणकार (19, सडये, शिवोले) सयत 17 वर्सां पिरायेच्या नेण्ट्या भुरग्यांक अटक केल्या. जाल्यार ह्या टोळयेतले आनीक दोग जाण फरारी आसून पुलिस तांचो सोद घेतात.
धुळेर म्हापशें रावपी आनी मुळ महाराष्ट्रांतलो नेण्टो दुबावित आरोपी 16 जानेवारीक जाल्ल्या मयडे पुलार हांगाच्या श्री रवळनाथ देवळांत चोरी केल्ले प्रकरणांत ताचो संबंद आशिल्ल्याचें उक्तें जाले उपरांत ताका म्हापशें पुलिसांच्या ताब्यांत दिल्लो. पर्वरींतल्या पीडीए कॉलोनींतल्यान 19 जानेवारीक रातीं 1.10 वरांचेर सौरभ नांवाच्या तरणाट्याची जीए 04 पी 5100 क्रमांकाची देड लाखाची बुलेट मोटारसायकल चोरून व्हेली. पुलिसांनी चोरीचो गुन्यांव नोंद करून चवकशी सुरू केल्ली. वाठारांतल्या सीसीटीव्ही फुटेज आनी हेर म्हायतीचेर आदारुन पुलिसांनी दुबावितांची वळख करून घेतली.
दुबावीत आरोपी खानापूर-बेळगांव वाठारांत लिपून आशिल्ल्याची म्हायती मेळ्ळ्या उपरांत पुलीस पंगडान थंय वचून दुबावीत आरोपी ललित आनी ताच्या नेण्ट्या वांगड्याक अटक केली.
दुबावितां कडल्यान वट्ट चार लाखांच्यो चार दुचाकी जप्त केल्यो. तातूंत कागाळदाराची रॉयल एनफील्ड बुलेट मोटारसायकल, म्हापशेंतल्यान चोरून व्हेल्ली केटीएम ड्यूक, अस्नोडाच्यान चोरून व्हेल्ली एप्रिला स्कुटर आनी सावंतवाडीतल्यान चोरिल्ली यामाहा मोटारसायकल हांचो आस्पाव आसा.
पुलीस अधीक्षक अक्षत कौशल, उपअधीक्षक विश्वेश कर्पे आनी निरिक्षक राहुल परब हांच्या फुडारपणा खाला उपनिरिक्षक मंदार परब, सीताराम मळीक, अरुण शिरोडकार, सचिन शिरोडकार, हवालदार महादेव नायक, आकाश नावेलकार, आनी विराज मळीक हांचो आस्पाव आशिल्ल्या पंगडान ही कामगिरी केली.
मजगतीं, ही दुबावीत टोळी नेण्टे आसतना सावन चोरी करपाचे गुन्यांव करतात. हाचे आदीं हे टोळयेक हणजुणा पुलिसांनी म्हाल येरादारी रिक्शा आनी ट्रकांची बॅटरी चोरपाच्या प्रकरणांत अटक करून ताब्यांत घेतिल्ले. बंदखणींतल्यान आनी सुदारणा केंद्रांतल्यान सुटले उपरांत दुबावीत परतून चोरी करपाक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.