भांगरभूंय | प्रतिनिधी
नवी दिल्ली, खबरां संस्था: देशभरच्या रस्तो सुरक्षा उपाय येवजण्यांची गंभीर दखल घवन सर्वोच्च न्यायालयान सोमारा राज्य सरकार, केंद्र शासीत प्रदेश आनी भारतीय राष्ट्रीय महामार्ग प्राथिकरण (एनएचएआय) अश्या जायत्या जाणांक निर्देश दिले. तातूंत हॅल्मेटाचो वापर, चुकीच्या मार्गावेल्यान वाहन चलोवप, असुरक्षीत ‘ओव्हरटेकींग’, खर एलईडी लायटींचो वापर, ताबड्यो-निळ्यो लायटी, आनी भोंगे (हुटर) हांची अनधीक्रुत विक्री आनी गैरवापर आडावपा खातीर उपाय काडपाचे निर्देश दिल्यात.
रस्ते, येरादारी आनी महामार्ग मंत्रालयान ‘2023 वर्सा देशांतले रस्ते अपघात’ हातूंतल्यान आंकडो प्रसिद्ध केलो. हातूंत रस्तो अपघातांत 1,42,890 जाणांक मरण आयलां. हो आंकडो वाडतूच आशिल्ल्याचें अधोरेखीत केलें. देशभरांतल्या अपघातांत 35 परस चड रस्त्यार चलत वतल्यांक मरण आयलां. तशेंच हॅल्मेट वापरूंक नाशिल्ल्यान 54 हजारां परस चड दुचाकीन चालक/प्रवाशांक मरण आयिल्ल्यांचो आंकडो केंद्र सरकारान दिल्लो. हाची दखल घेवन न्यायमुर्ती जे. बी. पारडीवाला आनी न्यायमुर्ती के. व्ही. विश्वनाथन हांच्या खंडपीठान उपाय येवजण्यांचे निर्देश दिल्यात.
अस्थिरोगतज्ञ डॉ. एस. राजशेखरन हांणी 2012 वर्सा हे विशीं याचिका दाखल केल्ली. सुनावणे वेळार वाहनांचेर तांबड्यो-निळ्यो फ्लॅशिंग लायट्स आनी बेकायदेशीर हॉर्नांचेर जप्ती, बाजारांत कारवाय आनी दंड घेवन हाका पुरायेन बंदी घालची, अशे आदेश न्यायालयान दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
