भांगरभूंय | प्रतिनिधी
खबरां संस्था
कराचीः स्टार फास्ट बॉलर शाहीन आफ्रिदी धोपराक जाल्ले दुखापतीक लागून पाकिस्ताना खातीर खेळपाक शकचो ना. आशिया कप टी-20 सर्तीं पयलीं पाकिस्तानी क्रिकेट पंगडाक हो एक व्हड धपको बसला. इंग्लंडा आडचे माळेंत लेगीत तो खेळपाक शकचो ना.
येता त्या 28 ऑगस्टाक आशिया कपांतली पयली मॅच भारत- पाकिस्तान अशी जातली. ते उपरांत 4 सप्टेंबराक परत हे दोनूय पंगड दुसरे मॅचींत खेळटले. पाकिस्तान क्रिकेट बोर्डान शेनवारा एक निवदेन जारी करून शाहिनाचे दुखापतीची म्हायती दिली. ताका फीट जावपाक 4 ते 6 सप्तकां लागतलीं अशें बोर्डान म्हणलां. धोपराचो स्कॅन अहवाल आयले उपरांत तो खेळपाक शकचो ना हें स्पश्ट जालें.
शाहीन खेळपाक शकचो ना हाका लागून भारताचे पयले फळेंतल्या बॅट्समनांक थाकाय मेळटली. टी-20 आंतरराष्ट्रीयांत शाहिनात 70 टक्के मॅचींनी पयले ओव्हरीत विकेटी घेतल्यात, पोरूं टी-20 वर्ल्ड कपांतले मॅचींत ताणे पयले ओव्हरीत भारताच्या रोहीत शर्माची विकेट घेतिल्ली. ते उपरांत ताणे केएल राहुल आनी विराट कोहलीक आवट केल्लें. हे मॅचींत भारताक पाकिस्तानान 10 विकेटींनी हारोवन वर्ल्ड कपात भारता आड पयल्या जैताची नोंद केल्ली.
ऑक्टोबर- नोव्हेंबरांत ऑस्ट्रेलियेंत जावपी टी-20 संवसारीक करंड सर्ती पयलीं शाहीन फीट जातलो अशें पाकिस्तानी क्रिकेट बोर्डाच्या अधिकाऱ्यांनी सांगलें. आशिया आनी संवसारीक करंड सर्ती मजगतीं पाकिस्तान आनी इंग्लंड हाचे मदीं 7 मॅचींची टी-20 माळ जावपाची आसा. शाहीन तेन्ना खेळपा खातीर मेळचो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
