भांगरभूंय | प्रतिनिधी
नवी दिल्ली, खबरां संस्था ः दुकांनात कितेंय हाडपाक गेल्यार ते कागदांत बांदूंन दितात. खास करुन मिठाय वा खंयचेय खावपाचे पदार्थ. सद्या सणांचो हंगाम सुरू जाला. दर वर्सा सणाच्या दिसांनी खावपाच्या पदार्थांची मागणी कितलेशेच पटींनी वाडटा. अशे परिस्थितींत भारतीय अन्न सुरक्षा आनी मानक प्राधिकरणान (FSSAI) कांय म्हत्वाचीं मार्गदर्शक तत्वां जारी केल्यांत.
ह्या सणाच्या हंगामांत उक्त्या सुवातेर खाणां-जेवणाचे पदार्थ तयार करचे न्हय अशी शिटकावणी एफएसएसएआयन दुकानदारांक दिल्या. हाचे वांगडाच दुकानदारांक खाणांच्या दर्ज्याचेर खासा लक्ष दिवपाची सुचोवणी दिल्या.
दिसाळ्यांच्या कागदांनी खाणां पॅक करप टाळचें
अन्न नियंत्रक एफएसएसएआय हांणीय दुकानदारांक दिसाळ्यांच्या कागदांनी खाणां पॅक करुन दिवप टाळचें असो उलो मारला. हे विशीं म्हायती दितना एफएसएसएआयच्या अधिकाऱ्यांनी सांगलें, दिसाळ्यांत पॅक केल्लें जेवण जायत्या दुयेंसांचो धोको निर्माण करता. दिसाळीं भायर उक्तीं दवरतात, देखून जंतू नेटान वाडटात. तशेंच तातूंत वापरिल्ले शायेक लागून भलायकेक जायते त्रास जावंक शकतात. अशे परिस्थितींत दुकानदारांक पॅकिंग खातीर दिसाळें वापरप बेगोबेग बंद करपाचो सल्लो एफएसएसएआयन दिला. अशा खाणां-जेवणाच्या आयदनांचो वापर करपाचेर भर दिवपा खातीर दुकानदार आनी वेगवेगळ्या संघटनां वांगडा काम करतात, जाका लागून लोकांक सुरक्षीत अन्न मेळटलें अशेंय अन्न नियंत्रकान सांगलें.
भेसळीचेर खर नदर दवरतले
मजगतीं, एफएसएसएआयन सणाच्या हंगामा पयलीं देशभरांतल्या जायत्या मिठाय संघटनां कडेन बसका घेतल्या. हातूंत अन्न नियंत्रकान सणाच्या हंगामांत विकपाक येवपी गोड पदार्थांच्या दर्ज्याचेर खासा लक्ष दिवपाक सांगलां. सणाच्या दिसांनी दूद, तूप, चीज आदी पदार्थांचे सेवन खूब जाता. हाचे वांगडाच बाजारांत भरसण केल्ल्या दुदाचोय धोको वाडटा. अशे परिस्थितींत एफएसएसएआयन दुकानदारांक शुद्ध उत्पादनांचो वापर करपाचो सल्लो दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
