दी नेमो, कर विक्रारी

भांगरभूंय | प्रतिनिधी

म्हजे आवयचें एक पालुपद आसतालें: खरें उलयल्यार जेवचें वता. सामकें खरें तिचें.

गोंय. दोनूच अक्षरांचें एकूच भांगराचें राज्य. आज फुटकें आलुमीन लेगीत कोणूय चड मोलाक घेत, पूण न्हय हें ‘भांगर’! कारण, त्या भांगराचें आज रेबें जालां.
हय! आमची भांगराची भूंय. देव देवतांची. माड माडयांची. दुदां, तुपां जंय व्हांवतालीं थंय आज रेबें व्हांवता, आनी त्या रेब्याची गुठ्ठाण सोंसूं नजं जाता. आमचो कामधंदो, वेपार, उद्देग, नातींगोतीं हांगा आसात म्हणून हांगा रावचें पडटा नाजाल्यार सिंगापूरा सारकिल्या सर्गांत स्थायीक जावप शंबर पटींनी परवडलें. पूण आपली भूंय आनी आपलीं मनशां सोडून वचप कशेंच पुटवना.
हडफड्यां जी घडणूक घडली तिचे विशीं आकांताळी माहिती भायर आयल्या. अजून येता. गोंयांत इतले night club चलतात हें म्हज्या राज्याक तरी खबर नाशिल्लें. कांय वर्सां फाटीं मनोहर पर्रीकाराच्यो तोखणायो सांगतना एकल्यान म्हणलें, “तूं जाणा, तो एका discothequeत वचून आयलो.” म्हणलें, मागीर ताणें कितें केलें? ताचेर तो तोंडांत चणे कोंबिल्ले भशेन ओगो पडलो. पर्रीकार IIT शिकिल्लो मुख्यमंत्री आशिल्लो. म्हज्या triple gold medalist इंजिनियर भावाक उद्देशून आवय केन्नाय अस्वडीं म्हणी, “जाणा मरे, शिकलो म्हणून गिन्यान येना.” खरें तिचें. हे चवथी मराठी शिकिल्ले म्हजे आवयचे बोल.
आज आमी त्या disco पसून बरेच पयस आयल्यात. आमी night clubनी रमल्यात. आमी सोऱ्यांत आनी sexत बुडल्यात. आमी रेब्यांत बुडबुडटात. गोंयकार भाजपाच्या रेब्यांत बुचबुचतात. थंय दुडवांच्या राशींचीं साळकां फुलतात.
एका रात क्लबाक उजो लागलो. जो फोगाचो एक ‘बाण’ वयर मारिल्लो ताणें लिडलिड्या पाश्टाक उजो पेटयलो. इतिहास परतून सांगिना. नांव व्हडलें. Birch Romeo Lane. हो night club दोग लुथरा भाव चलयताले. माशेलांतलो रात कालो बी आयकल्लो पूण रात क्लब केन्नाच आयकूंक नाशिल्लो. भांगराळ्या गोंयांत अशें घडत हाची सुलूस गोंयच्या CMक मात लेगीत आसची ना. CM म्हणजे आमचो Common Man. ताका कित्याक पडलां ह्या रात क्लबांचें? तो बावडो आपल्या पोटा फाटल्यान.
कोण तरी कात्रिना ही खाजागास्तानांतली (पयलींच्या USSRतली) नाचपीण अर्दनागडी जावन नाचता आनी ल्हेंवटे पर्यटक तो ‘शो’ रुचीन चाखतात. त्या क्लबाक कसलेच तरेचें लिसेंस नाशिल्लें. कसल्याच कायद्याक पाळो दिनासतना चलपी ह्या (आनी असल्या सगल्या) रात क्लबांक वयल्यांची (आनी वयल्यान सकयल्यां मेरेनची) कृपा आनी आशिर्वाद सहऽऽज मेळटा. हाचें कारण Vit M1 आनी Vit M2. हीं दोन व्हिटामिनां म्हणजे Money आनी Muscle. खंयचेच फार्मासींत मेळनात. तीं भारतांतले एकेच फार्मासींत मेळटात. ते फार्मासीचें नांव Farmácia Política!!
भ्रष्टाचारान पंचायतीं साकून मंत्र्यांचे कचेरे मेरेन सग्गलें प्रशासन पोखरलां. भितरल्यान वाळटींनी पोखरिल्लें प्रशासन बरगेलां. खिळखिळ्ळां. तें खंयच्याय खिणाक कडकच्च घोऽऽ जावं येता. प्रशासनान जीव सोडलो जाल्यार आमी कोणाच्या तोंडा कडेन पळोवपाचें?!
कोण तरी लुथरा भाव दिल्लीच्यान काळो पयसो घेवन गोंयांत येतात. तांचे ‘रातकिडे’ पयलीं भारतांत कीर्र कीर्र करीत आशिल्ले. गोंय तांकां सामकें सोंप्पें आनी सवाय सांपडलें. आमचे मंत्री आनी अधिकारी पयश्यांक ल्हेंवटे. लुथरांक चरपाक हें मळ सामकें पाचवेंचार आनी अचळय मेळ्ळें. दरेक मंत्री आनी अधिकारी पयश्यांक केन्ना घांस मारीन म्हणून बाशींग धोंपराक बांदुनूच राविल्लो आसता.
Prudentच्या Head-onत प्रमोद आचार्यान विचारिल्ल्या प्रस्नांचेर मायकल लोबाची दोन फावटीं वाचाच बसली. गची आंवुळ्ळी. जाच्या मनांत कांय नासता तो स्पश्टपणान उलयता वा बरयता. तूं जर चोर वा भ्रश्ट आसशी जाल्यार तुका दर एक प्रस्न बाण कसो तोपतलो; तुजी जापूच नासतली. तेंच ह्या कळंगूटेच्या आमदाराचें जालें. हें सरकार हप्त्यांचेर चलता काय कितें ह्या प्रस्नाक ताचें तोंड धरलें. तो साप्प ओगो पडलो.
गोंय पुर्तुगेजाचे सत्ते सकयल आशिल्लें तेन्नाच्यान आनी उपरांत स्वतंत्र जावन आज मेरेन चवसठ (64) वर्सां हो स्तंभलेखक सगलें बारीकसाणीन तेळीत आयला; प्रस्न विचारीत आयला. पुर्तुगेजा काळार राज्य बरें चलतालें अशें म्हणीत जाल्यार म्हाका अराष्ट्रीय म्हणटले. म्हणूं. आज ते राष्ट्रवादी (?) लिपून कित्याक भोंवतात? म्हजे आवयचें एक पालुपद आसतालें: खरें उलयल्यार जेवचें वता. सामकें खरें तिचें. सत उलोवपी मनीस ह्या समाजाक तरी नाकासो दिसता.
सिंगापूरची एक गजाल परतून सांगतां. एक गोंयकार पान- मसाल्याचो डबो घेवन तांच्या विमानतळार देंवलो. तो तपासून येसर हाका थंयच detain केलो. अर्द वरान चीनी, तमीळ आनी इंग्लीश भाशांतल्या माफीच्या पत्रा सयत ताका डबो परतो मेळ्ळो. दुसरें, तांच्या एका मंत्र्याक जोडी भायल्या पयश्यांनी फ्लॅट घेतलो म्हणून भितर उडयलो. आनी आमी सिंगापूराचे भोंवडे उपरांत पुलिसांचो गणभेस बदलून तांकां ‘बँडमास्टर’ करून सोडले.
गोंयांत येवपी दर एका पर्यटकाचें सामान तपासचें अशें हांवें 1990 वर्सा पयलीं त्याच सिंगापूरवादी मुख्यमंत्र्याच्या काळांत स्तंभांत बरयिल्लें. 35 वर्सां उलगलीं. सग्गलें जैसे थे. आनीक घुंवळे वखदां, आनीक कायद्या भायल्यो वस्तू गोंयांत आयल्यो. हांगा Sunburn नांवाची ‘मस्ती’ आयली. त्या आयोजकांनी सरकाराचे कोटी बुडयले. तरी प्रशासकांक कसलीच परवा ना, कारण प्यून धरून वयर मेरेन सगल्यांचीं बोल्सां गच्च भरतात. काल खोंपींत रावपी मनीस आज आलिशान बंगल्यांत रावता. सगल्यांनीच रावचें पूण चोरयेंतल्यान मेळिल्ल्या पयश्यांनी न्हयच न्हय!
परतून आरपोरा वचुया. थंयचो एक पाद्री कांय वर्सां फाटीं पणजे मेळिल्लो. ताणें म्हणलें, “हे सोगले आरे पोरा, आरे पोरा मुणटाय. तें ओडफोडें मुरे.” खरें ताचें. हडफडें ह्या नांवाचें पुर्तुगेजींत Arpora जाल्लें तें अजून बदलपाचें पुर्तुगेजाचे अवशेश नश्ट करूंक सोदपी मुख्यमंत्र्याच्या नशिबांत ना! सरकार म्हजें आयकुचेंच ना, पूण नागरिकांक तरी जाग्रूत करुया म्हणून ह्यो कांय सुचोवण्यो:

1. मुळांत बिगर कोंकणी मनशांक कसलेच तरेचो धंदो हांगा करूंक मेळूंक फावोना. 2. परवानगी दितातूच तेन्ना धनी धरून सगल्यांच्यो पासापोर्ती सरकारान चावयेंत दवरच्यो. 3. दिसाक जितली उलाढाल जाता तिचे शंबर पटींनी पयशे सरकारा कडेन Fixed Depositच्या रुपान दवरचे. दिसाक धा (10) लाखांची उलाढाल जाता जाल्यार 1000 लाखांची (10 कोटींची), म्हणजे म्हयन्याक 300 कोटींची (3 अब्जांची) FD सरकारा कडेन उरूंक जाय. हें जालें एका म्हयन्याचें. दुसरो म्हयनो सुरू जावचे पयलीं दुसरी FD सरकाराक मेळूंक जाय. 4. दर्यादेगेर, मिठागरांत, बी कितेंच बांदूंक मेळचें ना. Shack लेगीत. 5. परवानगी दिवपी अधिकारिणीच्यान चवकशी समितींत आसूं नजं. थंय “जापसालदार/ विस्वासपात्र नागरीक समिती” नेमात.
   आतां ह्या लेखाचो माथाळो पळोवया. पुंडलीक सगूण नायक हो शिरोडेंचो मगोचो पयले विधानसभेंतलो आमदार. उपरांत तो भलायकी खात्याचे जिपीचो चालक. ताका कोण तरी अधिकारी यादपत्र (memo) दिवन सतावंक लागलो खंय. पूण तो भियेनासतना म्हणी: “दी नेमो, कर विक्रारी.” म्हणजे, कितलेय memo दिवन जरी inquiry (विक्रारी) केली तरी आपूण तुका भियेना.
   तशेंच, आतां कितलीय जरी चवकशी केली तरी हती पादे पादे फूऽऽस्स जावपाचें…!!!

दामोदर घाणेकार
8459998914