भांगरभूंय | प्रतिनिधी
भांगरभूंय । प्रतिनिधी
धारबांदोडेंः गोंयकार कोंकणी लेखक आनी मोलेंचो सुपूत रामनाथ गजानन गावडे हांच्या ‘कथा एका संडासाची’ ह्या कोंकणी कथेच्या इंग्लिश अणकाराचो आंतरराष्ट्रीय पांवड्यार वावर आशिल्ल्या बुक कंपनीच्या ‘दी ग्रेटेस्ट इंडियन स्टोरीज एव्हर टोल्ड’ ह्या अरुणवा सिन्हा हांणे संपादीत केल्ल्या झेल्यांत आसपाव केला. हे खातीर गावडे हांचे साहित्यीक मळार तोखणाय जाता.
फाटल्या शंबर वर्सांतल्यो वेगवेगळ्या भारतीय भाशांतल्यो ज्यो उत्कृश्ट कथा आसात तांचो इंग्लिश भाशेंत अणकार जाला. तांतूतल्यो कांय कथा भारतीय सांस्कृती , सर्जनशीलताय, कल्पकताय आनी मनशाचे जिणेमूल्यां ह्या कसवटेचेर तज्ज्ञां कडल्यान निवडटात. गावडे हांच्या ‘कथा एका संडासाची’ ह्या बिंब म्हयन्याळ्यांत प्रसिद्ध जाल्ले कोंकणी कथेचो कोलकाता हांगची नामनेची अणकार विद्या पै हिणे 2014 वर्सा ‘टेल ऑफ ए टॉयलेट’ ह्या नावां इंग्लिश भाशेंत अणकार केल्लो. ताचे हे कथेच बरीच तोखणाय जाल्ली.
रामानाथ गावडे हांचे 6 कथाझेले, चार कादंबऱ्यो, भुरग्यां साहित्य, नाटकां अशें कोंकणी आनी मराठी साहित्य प्रकाशीत जालां. ताका केंद्रीस साहित्य अकादमी- भुरग्यां साहित्य, गोंय कला अकादमी, कोंकणी अकादेमी, कोंकणी भाशा मंडळ, साहित्य परिशद, कला आनी संस्कृती खातें, युवा संमेलन, मोहिती यादस्तीक पुरस्कार, फुंदासांव ओरिएंट अशे जायते पुरस्कार फावो जाल्यात. तांच्या जायत्या कथाचो वेगवेगळ्या भाशांतल्यान अणकार जाला. कांय कथाचो शिक्षणीक अभ्यासक्रमांत आसपाव जाला.
‘दी ग्रेटेस्ट इंडियन स्टोरीज एव्हर टोल्ड’ झेल्यांत रस्किन बोंड, महाश्वेता देवी, मुंशी प्रेमचंद, रवींद्रनाथ टागोर, अण्णाभाऊ साठे, खुशवंत सिंग, शशी थरूर, सिद्धिक आलम, अग्येया, वाईकोम मोहम्मद बशीर, शहनाज बशीर, मन्नू भंडारी, सुब्रमण्यम भारती, चलम, चंद्रा चट्टोपाध्याय, इस्मत चुघताई, मामांग दाई, विजयन देथा, धुमकेतू, के एस दुग्गल, ए एम गौतम, ममोनी रइसम गोस्वामी, करातुलैन हैदर, कल्की, कमलेश्वर, दामोदर मावजो, बामचरण मित्रा अशा दिग्गज कथाकारांच्या कथांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
