भांगरभूंय | प्रतिनिधी
भावंडांनो,
पावसाळो सुरू जाला. पावस कोणाक नाका? भुरग्यांक, जाणट्या-नेणट्यांक सगळ्यांक जाय जाय सो दिसता. मागीर ताणें मनशाच्या संवसाराची कितलीय वाट लांव. पुणून, तो सगळ्यांक जायच. तुमीय भावंडां ह्याच पावसाच्या येण्यान खोशी आसाट न्हय? वर्साक कांय दीस तुमकां ह्या पावसांत भिजपाची, खेळपाची, नाचपाची संद मेळटा न्हय? मागीर तुमी ती कशी सोडटलीं ? खरें न्हय म्हजें? मागीर पावसांत खेळटा आसतना तुमकां तुमच्या आई-बाबांचो मार खावचो पडटा ही गजाल वेगळी. भावंडांनो, पावसाचे दीस चालू आसतना मदींच तुमकां वोत जाय शें दिसता न्हय? आनी दोनूय एकाच वेळार मेळ्ळ्यार तुमी माकडाचें लग्न लायतात. पावस मदींच चार-पांच दीस खंयचे खंय नाच जालो जाल्यार तुमी.. उमेदीन सगळें विसरून.. मस्तेन जाय तशीं वागतात.. आनी ते वेळार मात, तुमी पावसाचे गैरहाजीरींत मेळयल्ली अमर्याद खोस तुमच्या आई-बाबांक नडूंक लागता. त्या मिश्रीत वातावरणांत दुयेंत पडटात. आनी उपरांत, तुमचे आई-बाबा वा तुमचीं घरचीं मनशां तुमचे खातीर..???
देखून सांगतां भावंडांनो, पावस आमकां जायच. सैमावरवी मेळपी हो पावस म्हणल्यार आमचें जिवीत. उदकाचें म्हत्व तें नासता तेन्नाच कळटा.. पुणून पावसांत भिजतना खास करून शाळेक, इश्कोलाक वतना भावंडांनो तुमी चड धोदोशी जावन पावसांत गुल्ल जावं नाकात. मनशाक जाल्ली चड खोशी केन्ना केन्नाताका घातक थारता. कशी काय म्हण्टात? भावंडांनो, हो पावस तरांतरांनी मनशाचेर संकश्टां हाडटा. ताच्यो खबरी तुमी दिसाळ्यांनी वाचतातूच. पुणून तुमच्या जिवाक धोको उप्रासपी घडणुको घडटात. देखून भावंडांनो, मुजरत सांगतां:
शाळेंत वतना, घरा कडेनस उकत्या सुवातांनी, भोंवतणी भाटांत, खेळां मैदाना कुशींक, वाटेवयल्या उदकाच्या खोल फोंडकुलां, फोंडाऱ्या सरी वचूं नाकात, वा खेळूं नाकात. खळयो, व्हाळ, न्हंयचे देगेर खेळूं नाकात, तळयो वा बांयांनी न्हवपाक वचूं नाकात. पावसान व्हाळ, न्हंयाच्यो देगो, धडो, फुगलेल्यो आसतात. तातुंतल्यान पावसाच्या दडकांनी उदक व्हांवून गेल्ल्यान तांची खोलाय वाडिल्ली आसता. तातुंतल्यान व्हांवपी उदकाचो नेटूय वाडटा विसरूं नाकात. तुमी उदका कडेन केल्ली मस्ती, उरफाटी तुमच्याच जिवार येवंक शकता आनी तुमच्या घरच्या मनशांक त्रासांत उडोवंक शकता.
भावंडांनो, पावसांत उक्ताडा वयलीं खाणां खांव नाकात. टिफीनांक घरचें खाण व्हरात. शाळेंत वतना रस्त्यावेल्यान वतना सामकीं कुशीच्यान वचूं नाकात. रस्त्याचे कुशीक उदक व्हांवून शेळो जाल्लो आसता. तुमी निसरून पडूंक शकतात. काळजी घयात. वाऱ्या वेळार खंयच्याय झाडां-रुखा पोंदा रावूं नाकात. वाऱ्यान झाडां- रुख मोडून पडपाची शक्यताय आसता देखून तुमी तुमचो जीव राखूंक जाय. तशेंच रस्त्यावयल्या फोंडकुलांनी उड्यो मारीत वचूं नाकात. थंय कंवचेची फुटिल्लीं आयदना वा तांच्यो कंवच्यो आसूंक शकतात ज्यो तुमच्यो पांयांक तोपूंन जखन वा घावे जावपाची शक्यताय आसता. पावसांत घावे बेगीन बरे जायनात. याद दवरात.
भावंडांनो, तुमकां खूब सांगन दिस्ता पूण शेवटाक इतलेंच सांगतां. पावसांत, उदकांत शिस्तीन वागात. कारण मस्ती आमकां सदांच घातक आसता. शिस्तूच आमकां राखूंक शकता आनी आमच्या वांगडा घरच्यांकय सुखी दवरूंक शकता. पावसा दिसानीं तुमी तुमच्या घरांत, घरच्यांसयत उमेदी वातावरणांत रावात. इतलेंच, बरें तर काळजी घेयात आं.
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
