भांगरभूंय | प्रतिनिधी
भारताची दीपा कर्माकर हिणें ताश्कंद शारांत जाल्ले आशियायी वस्तादपण सर्तींत भांगरा पदक जिखून इतिहास घडयलो. हे सर्तींत भांगरा पदक जिखपी ती भारताची पयली जिम्नॅस्ट थारली.
हाचे पयलीं 2015त दीपान तेच सर्तींत कांश्या पदक जिखिल्लें. तिणें सरासरी 13.566 अशी कामगिरी करून भांगरा पदक जोडलें. दक्षीण कोरियाची किम सून ह्यंग हिका रुप्या पदक (13.466) जाल्यार ज्यो क्योंग बियोल हिका कांश्या पदक (12.966) फावो जालें.
मजगतीं, दीपा 2016त जाल्ले ऑलिम्पिकांत वांटेकार जावपी भारताची पयली जिम्नॅस्ट थारिल्ली. रियोंत जाल्ले ऑलिम्पिकांत तिका चवथी सुवात फावो जाल्ली. तिका पदक चुकलें आसलें तरी हे कामगिरीक ती पुर्ण भारतांत प्रसिद्ध जाल्ली.
2014त जाल्ले राष्ट्रकूल सर्तींत तिणें पदक जिखिल्लें. त्या वेळार राष्ट्रकूल खेळां सर्तींत जिम्नॅस्टिकांत पदक जिखपी ती भारताची पयली बायल खेळगडी थारिल्ली. तशेंच 2018त एफआयजी आर्टिस्टीक जिम्नॅस्टीक वर्ल्ड चॅलेंज कप सर्तींत भांगरा पदक जिखपी ती पयली भारतीय बायल खेळगडी थारिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
