दीपाली मेहता खून प्रकरणांत आरोपीची निर्दोश सुटका

भांगरभूंय | प्रतिनिधी

पणजी: काब दी राम हांगा दीपाली मेहता (20) ह्या तरणाटेच्या खून प्रकरणांत दक्षीण गोंय जिल्हो आनी सत्र न्यायालयान दिल्ली जल्मठेपेची ख्यास्त मुंबय उच्च न्यायालयाच्या गोंय खंडपिठान रद्द केल्या. आरोपी विजेंद्र उर्फ चेतन आरोंदेकार हाची निर्दोश सुटका केल्या. हे विशींचो आदेश न्या. भारती डांगरे आनी न्या. निवेदिता मेहता ह्या दोन वांगडी न्यायपिठान दिला.

आरोपी चेतन आरोंदेकार आनी दीपाली मेहता हे लागींचे इश्ट आशिल्ले. 23 डिसेंबर 2016 दिसा चेतन आनी दीपाली हीं दोगांय काब दी राम दर्यादेगेर भोंवपाक गेल्लीं. त्या वेळार त्या दोगांय मदीं वाद जालो. त्या वादांतल्यान चेतन हाणें दीपाली मेहताचो गळो अंदूंन खून केलो. खून केले उपरांत आरोपी चेतन हाणें थंयच्यान पळ काडलो. ह्या प्रकरणांत कुंकळ्ळी पुलिसांनी गुन्यांव दाखल करून 24 डिसेंबर 2016 दिसा चेतनाक अटक केली. उपरांत पुलिसांनी ह्या प्रकरणांत मडगांवच्या दक्षीण गोंय जिल्हो आनी सत्र न्यायालयांत आरोपपत्र दाखल केलें.

ह्या प्रकरणाची सुनावणी घेवन तेन्नाचे अतिरिक्त सत्र न्यायाधीश व्हिन्सेंट डिसिल्वा हांणी दीपाली मेहताच्या खून प्रकरणांत आरोंदेकाराक दोशी थारायलो. न्यायालयान ताका जल्मठेपेची ख्यास्त, तेच बराबर 50 हजारांचो दंड दिलो. दंड भरलो ना जाल्यार दोन वर्सांची सादी कैद अशी ख्यास्त दिली. ह्या निवाड्याक आरोपी विजेंद्र उर्फ चेतन आरोंदेकार हाणें मुंबय उच्च न्यायालयाच्या गोंय खंडपिठांत आव्हान दिलें. ह्या प्रकरणांत आरोंदेकार हांचे वतीन अ‍ॅड. रोहन देसाय हांणी युक्तीवाद करून तो निर्दोश आशिल्ल्याचो दावो केलो.

ह्या प्रकरणांत न्यायालयान दोनूय बाजू आयकून घेतले उपरांत आरोंदेकाराक दिल्ली जल्मठेपेची ख्यास्त रद्द केली, आनी आरोपी विजेंद्र उर्फ चेतन आरोंदेकार हाची निर्दोश सुटका केली.

अ‍ॅड. रोहन देसाय हांणी केल्ले युक्तीवाद

ज्या मोबायल क्रमांकाचो संदर्भ आरोपपत्रांत दिल्लो तो मोबायल क्रमांक आरोपीच्या नांवार नाशिल्लो.

सदर मोबायल जप्त करपाक पुलिसांक अपेस आयलें, तशेंच तो सांपडलोय ना.

आरोंदेकार आनी दीपाली हांकां निमाणें एकठांय पळयिल्ल्या सिद्धांता विशीं त्रुटी आशिल्ल्याचो दावो केलो.

आरोंदेकार आनी दीपालीक एकठांय पळयिल्ल्या साक्षिदारा कडेन पुलीस कशे पावले हे विशीं त्रुटी आशिल्ल्याचो दावो केलो.