भांगरभूंय | प्रतिनिधी
वास्को: शालेय जिणेंत विद्यार्थ्यांनी दुचाकी, चारचाकी, वाहन परवानो आसले बगर वाहनां चलोवची न्हय. 18 वर्सां पुराय जाले उपरांत आनी वाहन परवानो मेळ्ळे उपरांतूच वाहनां चलोवचीं. वाहन चलयतना येरादारी नेमांक खरपणान पाळो दिवचो अशें आवाहन वास्कोचे येरादारी पुलीस निरिक्षक शैलेश नार्वेंकार हांणी केलें.
सड्यार दीपविहार उच्च माध्यमीक विद्यालयाच्या विद्यार्थ्यांक येरादारी नेमां विशीं मार्गदर्शन करतना नार्वेंकार उलयताले. तांणी विद्यार्थ्यांक येरादारी नेमां विशीं विवीध म्हायती दिली.
18 वर्सां पुराय जावचे पयलीं परवानो नासतना वाहन चलयल्यार आनी ताचेर दंडात्मक कारवाय जाली जाल्यार ताका 25 वर्सां उपरांतूच परवानो मेळटलो. तशेंच त्या सान पिरायेच्या वाहन चालकाक अपना घरांत रावचें पडटलें. तेच बरोबर ताच्या पालकांक तीन वर्सांची बंदखण, 25 हजार रुपयांचो दंड जावंक शकता.
वाहन अपघातांत सान पिरायेच्या वाहन चालका कडल्यान एखाद्याक मरण येत जाल्यार त्या चालकाक लाखांनी रुपयांची लुकसाण भरपाय दिवची पडटली. तशेंच बंदखण लगीत जातली अशी म्हायती तांणी दिली.
वाहन चालकान वाहन लयतना स्वताची आनी हेरांची सुरक्षा सांबाळपाची गरज आसा. ते खातीर गतीर नियंत्रण दवरचें. सोरो पियेवन वाहन चलोवचें न्हय. दुसऱ्या चालकाक आडखळ जातली अशें वाहन चलोवचें न्हय. येरादारी सिग्नलाचे नेम पाळचे. हॅल्मेटाचो वापर करचो. हेर नेमूय पाळचें अशें आवाहन नार्वेंकार हांणी केलें.
ह्या वेळार विद्यार्थ्यांक येरादारी विशीं म्हायती दिवपी व्हिडिओ पुलीस शिपाय गिरीश म्हाड्डोळकार हांणी दाखयलो. विद्यालयाच्यो शिक्षिका प्रा. मारिया डायस हांणी येवकार दिलो, जाल्यार प्रा. सुनील शेट हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
