भांगरभूंय | प्रतिनिधी
मुख्यमंत्री: फोटोजर्नलिस्ट असोसिएशनाचो वर्धापन दीस दबाज्यान
पणजी: फोटूपत्रकार कांय प्रसंगांनी आपलो जीव घाताक घालून फोटू काडटात. ह्या फोट्याक दिसाळ्यांत बरी सुवात मेळत जाल्यार आपल्या कामाचें चीज जाल्ल्याची धादोशी उक्तायतात अशें डॉ. प्रमोद सावंत हांणी सांगलें. संवसारीक फोटोग्राफी दिसा निमतान पणजेंत फोटोजर्नलिस्ट असोसिएशन गोवा हांच्या 18व्या वर्धापन दिसा निमतान ते उलयताले.
गोंयचे पत्रकार तशेंच फोटूपत्रकारांच्यो विवीध मागण्यो आमच्या सरकारान पुराय केल्यात. हातूंत ई बायक, कॅमेरा, लॅपटॉप अशा साबार येवजण्यांचो आस्पाव आसा अशेंय तांणी ह्या वेळार सांगलें.
संघटणेचे कार्यावळींत फोटो प्रदर्शनां विशीं तांणी म्हणलें, प्रदर्शनांतल्यान गोंयचो सांस्कृतीक चेरो दाखोवपाचो यत्न फोटूपत्रकारांनी केलो. मुख्यमंत्र्यांनी फोटूपत्रकारांचें अभिनंदन केलें.
कार्यावळीक जेश्ठ फोटूपत्रकार गणादीप शेल्डेंकार, सतीश कुंकळ्ळेंकार आनी अंकुश नायक हांचो मुख्यमंत्र्यां हस्तुकीं भोवमान जालो.
कार्यावळीक विरोधी पक्ष फुडारी युरी आलेमांव हांणी फोटूपत्रकारांनी नव्या भुरग्यांक आपल्या कार्यांत वांटेकार करून घेवप तशेंच तरणाट्यांनी फोटूपत्रकारितेंत येवप गरजेचें आशिल्ल्याचें सांगलें.
फोटूपत्रकार आपल्या एका फोट्यांतल्यान पुराय विशयाची गंभीरताय दाखोवन दितात. ताका लागून कांय फोटे घडणुकेची म्हायती दिवन वतात अशें आमदार गोविंद गावडे हांणी सांगलें.
फोटोजर्नलिस्ट असोसिएशना वतीन घेतिल्ल्या सर्तींचीं इनामां ह्या वेळार भेटयलीं.
शालेय विभाग: पयलो पुरस्कार जैतिवंत- श्रेयश पी सुधीर, (फेरीलँड हायस्कूल) दुसरो- शूभ तारी, (बाल भारती विद्यामंदीर, रायबंदर) तिसरो- फॅबिझा परेरा, (पोपजॉन xxiii हायस्कूल, केपें)
पयलें उमेद वाडोवपी इनाम- रुबेन एस्तेबिरो, (डोना लिओनोर मेमोरियल हायस्कूल, पर्वरी) दुसरें- नील बिस्वास (केशव स्मृती हायस्कूल, आल्त दाबोळी)
उक्त्या गटांत पयलो पुरस्कार: ओमकार गावडे, फोंडें. दुसरो- अंशिका नायक, पीर्ण बार्देस, तिसरो- ज्युलियस आल्फ्रेड फर्नांडीस, उसकय.
पयलें उमेद वाडोवपी: अनील पी. दुसरें- देवेश पार्सेकार, शिवोली हांकां फावो जालें.
मुख्यमंत्री डॉ. प्रमोद सावंत हांचे हस्तुकीं जैतिवंतांक इनामां भेटयलीं. कार्यावळीचें सुत्रसंचालन गणेश शेटकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
