दिसाळीं ई माध्यमांत वतना

भांगरभूंय | प्रतिनिधी

लोकमान्य टिळकांची व्रत पत्रकारिता आयज नासली तरी तिसऱ्या म्हाझुजाची सावळी संवसाराचेर आसतना पत्रकारिता म्हत्वाची आसा. ते नदरेंतल्यान अंदूंचो राष्ट्रीय पत्रकारिता दीस म्हत्वाचो. प्रेस कौन्सील आॅफ इंडियाच्या स्थापनेचो हो दीस.
दिसाळीं आनी इलेक्ट्राॅनीक माध्यमांतल्या पत्रकारांक एकठांय हाडपी हो दीस. आमी सगल्यांनी एकवटीत जावन देशाच्या सार्वभौमत्वाची राखण करुया. प्लास्टिक नाका, नोकरे पासत पयशे दिवं नाकात असो उलो मारुया. झूज नाका, शांतीकाय, सवस्तकाय जाय होच आमचो मंत्र, तुमी तो आपणायतले अशी आस्त आसा.
पत्रकारितेंत जावपी बदल (चेंजिंग नेचर आॅफ प्रेस) हो विशय अंदूंच्या राष्ट्रीय पत्रकारिता दिसाचो मध्यबिंदू. ह्या विशयाचेर देश पांवड्यार भासाभास जातना प्रेस कावन्सील आॅफ इंडिया मिडिया कावन्सील आॅफ इंडिया करपाची, माध्यमा विशींचे कायदे सुदारपाची मागणी करुया.
देशांतलीच न्हय गोंयांतलीय सगलीं दिसाळीं इलेक्ट्राॅनीक माध्यमांत पावल्यांत. आमच्या देशाच्या संविधानाच्या अमृत महोत्सवी वर्सांत तीन ज्येश्ठ (अणभवान आनी पिरायेन) पत्रकारांचे वाडदीस मनयले. दोन पणजेंत, एक दिवचले. नवप्रभा दिसाळ्याचे आदले संपादक सुरेश वाळवे, आॅफिशियल मिडियाचे सतीश नायक, नवप्रभा दिसाळ्याचे गुरुदास सावळ ह्या तीन पत्रकारांची पत्रकारिता कशी आशिल्ली? तांच्या तिगांचें नातें कसलें? एकामेकांक सांबाळून घेवपाचें. त्या नात्याक आयजय वेंर आयिल्ली ना, हाचे मुखारूय ती येवची ना हाची जतनाय घेवपा पासत आमी एकामेकां कडेन उलयतात, वाॅट्सअॅपांतल्यान, मोबायलार. सतीशबाब, वाळवे सर, सावळबाब हांचे पत्रकारितेक सलाम. सतीशबाब, 6 मार्चाक जल्मल्ले, 6 आॅक्टोबराक वाळवे सर, 12 आॅक्टोबराक सावळबाब. तिगूय नवप्रभा दिसाळ्यांतल्यान उंचायेर पावले. नवप्रभांतल्यान सतीश भायर सरतना रिते जाल्ले सुवातेर सावळबाब आयले. ती काणी, ते दीस गोंयांत सध्या गाजपी दुबावीत “जाॅब स्कॅम” चे न्हय, सोंपेंपणान नोकरी मेळपाचे, कश्टाचे. भांगराचे न्हय गोंयचे हें भांगरभुंयेंत भांगर (शेतकाम) पिकोवपाचे.
माफ करात दिसाळीं इलेक्ट्राॅनीक माध्यमांत पावलीं, सावळबाब ई गोवन वार्तांतल्यान दिसतात. हांव भांगरभूंय दिसाळ्यांत दिसतां, ई पेपरार रंगीत, दिसाळ्यांत काळ्या धव्या रंगांत. भांगरभूंय हें लोकभाशेंत लोकांचो आवाज जालां हें तुमकां खबर आसा? नवप्रभा वरीच. नवप्रभान एक रकाद धाडलो सगल्यांक बी प्रुडंट, शाॅर्ट अॅण्ड स्वीट, (ल्हान आनी सकारात्मक) पत्रकार शाणो, शिटूक, सादूर, दूरदर्शी आसचो, मता परस अचूक खबरेंतल्यान.
अचूक खबरो दिवपाचें आव्हान दिसाळीं ई माध्यमांत वतना आमचे मुखारआसा. अचूक खबरो दितना कसलीं तत्वां पाळचीं? हें दिसाळीं आनी माध्यमाच्या धनयांनी, संपादकांनी थारावपाचीं आसतात. तीं खबराकारांक कळ्ळीं तर ते तिगतात नाजल्यार ते हेवटेन तेवटेन उडयो मारतना तांचे कदेल दुसरे ओडून व्हरतात.
सावळ, सतीश हांची पत्रकारिता उडयो मारपाची न्हय, थिरायेची. थिरायेंतल्यान तांणी विश्वास दिलो आनी त्या विश्वासाच्या बळग्यार आमी फुडें गेलीं.
भारतकार गोविंद हेगडे देसाय हांची 169 वी जयंती तर नवप्रभाचे आदले संपादपी लक्ष्मीदास बोरकार हांची अंदूं जल्मशती. भारतकार आनी लक्ष्मीदासबाबांचीं पोस्टाचे स्टॅम्प (तिकिटां) काडपाची गरज आसा.
माफ करात, तेन्नाची पत्रकारिता वेगळी आनी आतांची भोवमाध्यमी पत्रकारिता वेगळी. सानुल्या लेखांची, बातम्यांची. अचूक सानुली बातमी, लेख दितना अचकीत आडमेळीं येतात, चूक जाल्या अशें सांगपी एकलो, एकली आसता. स्पश्टीकरण वाॅट्सअॅपार, वॅब पानार धाडात अशें सांगपाची धिटाय तेन्ना खबरांकाराक दाखोवची पडटा. खबराकार थंयच संपादक, फोटोग्राफर, व्हिडियोग्राफर जातात. केन्ना केन्नाय संपादक हालीं फोटोग्राफर, व्हिडियोग्राफर, खबराकार जातात, तेन्नाच जाती कातीच्यो वणटी कुशीक पडटात. गरजे वेळार मातयेचो वास घेत आयजय बातमेक वाट दाखोवपी वाळवे सर, सतीशबाब, सावळबाब आमचे मदीं आसात. गरज पडल्यार तुमकां आमकांय ते मार्गदर्शन करतात, करतले. समाजमन वळखुपी तेन्नाची पत्रकारिता, वीस वीस वर्सां एकाच दिसाळ्यांत रावतल्याक ती दिसता. धर्म अधर्म पोटांत दवरून, जाती कातीच्यो वणटीं मोडून संपादकांनी कॅबिनाचे भायर येवन वावर केला. तांची दिका आतांच्या पत्रकारांनी धरपाकच जाय अशें न्हय पूण तत्वां पाळचीं.
स्वातंत्र्य झूज, गोंय मुक्ती उपरांतच्या राजकी पत्रकारितेचें एक पर्व सावळबाब हांणी अभिमन्यू जावन चक्रव्यूह पुस्तकांतल्यान मांडलां. फुडल्या राष्ट्रीय पत्रकारिता दिसा मेरेन पत्रकारितेंतलीं विखुरिल्लीं आनीकय पानां जोडिल्लीं दिसतलीं.
दिसाळीं ई माध्यमांत वतना भांगरभूंय – लोकभाशेंतलें कोंकणी दिसाळें आनी प्रुडंट मिडिया उंचायेर वतना वाचप्यांक चलो प्रुडंट म्हणचेंच पडटलें. प्रुडंटा कडेन वचपाक ई बशीय आसात, त्या ई बशींचो बरो उपेग केल्यार येरादारीची कोंयडी फोडूंक येता. दिसाळीं ई माध्यमांत वतना दिसाळ्यांक ब्रेक्रींग न्युजाचो फुडलो वांटो, मत पत्रकारिता करची पडटली मुखेल विशयाक धरून.
प्रुडंट मिडियांत रात दीस बातम्यो वाचपी अस्तुरेचें रंग, रुप पळेतात काय तांणी दिल्ल्यो खबरो आयकतात? तांकांय बातम्यो हाडूंक, बरोवंक येतात, कागदार बरयनासतना, मोबायलार कंपोज करून घेनासतना. अणभवीच पत्रकार तें करूंक शकतात देड दोन दसकां पत्रकारितेंत रावले उपरांतच. गिन्यान, वळख, शिक्षण, तंत्रगिन्यान अणभवा परस आयज गरजेचें जालां.
कायद्याचे जाणकार, ज्येश्ठ, वरिश्ठ पत्रकार पत्रकारिता कायद्यांक वेगळ्या मार्गार व्हरूंक शकतात. संसदेच्या दोन सभाघरांनी अणभवी पत्रकार आसात, संस्कृत आनी इंग्लीशींतले जाणकार. माध्यमां आनी दिसाळ्यांनी रात दीस वावुरिल्ल्यांनी एकठांय आयल्यार फुडली पांच दसकां उरतलीं. बळिश्ट पत्रकारिता कायदे देशाक मेळटले. एके तिरायताचे नदरेन कायद्यां कडेन, माध्यमां कडेन पळोवन, मुखार आयिल्लीं प्रकरणां तपासून, अभ्यास करून.
सर्तींत हजार, लोकांचो विश्वास दिवपी पांच धा अशी ई माध्यमांची काणी. एके काणयेचे दीसभर तिस्त्यो करून दिसाळीं ते ई माध्यमा मेरेन सांगप, धाडप कळोवप, बरोवप अणभवी पत्रकारांकच कळटा.
टावन हाॅल मुख्यमंत्र्यां खातीर, प्रदेश प्रवक्त्यां पासत बांदपी पत्रकार राहूल कन्वल, तांकां घडोवपी ज्येश्ठ पत्रकार राजदीप सरदेसाय दिसाळीं, माध्यमां, उद्देगपतींची गणितां मांडूंक शकतात.
गणीत कसलें मांडपाचें? फुडाराचें? कितल्या वर्सांचो फुडार? जांचे कडेन इंग्लीश, मराठी, हिन्दी, उर्दू, कन्नड, भाशेंतलीं माध्यमां, दिसाळीं आसात तांकां गोंयांत कोणे हाडले? माध्यमांतल्यान रियल इस्टेट, खणीं मेरेन पावतना कसिनो, हाॅटेल वेवसायांत ते वच्चे ना? आपली प्रतिमा सांबाळटले? उत्सवाची? समाजकारणाची? तेच फाल्यां देशाचे प्रधानमंत्री जाल्यार….. ?

सुहासिनी प्रभुगांवकार
9881099260