भांगरभूंय | प्रतिनिधी
बार्देश, साश्ट म्हालांत सगल्यांत चड प्रमाण
विधानसभेंतले लेखी जापेंतली म्हायती
अडेच हजारां वयर अर्ज उरल्यात पडून
भांगरभूंय । प्रतिनिधी
पणजी : गोंयांत जमनी तशेंच फ्लॅटांचे दर मळबाक तेंकले आसले तरी खरेदी, विक्रीचेर ताचो परिणाम जाल्ल्याचें दिसना. दिसाक सरासरी 70 सेल डीड (विक्री वेव्हार) जातात, अशी म्हायती विधानसभेंत विचारिल्ल्या प्रस्नाचे जापेंतल्यान मेळ्ळ्या. 2025 तर्सा गोंयांत 25 हजार सेलडीड जाल्यात. वर्साचे 365 दीस धरले जाल्यार दिसाक सरासरी 70 सेल डीड जातात. हातूंत फ्लॅट तशेंच जमनींच्या वेव्हारांचो आंकडो समसमान आसा.
आमदार कार्लुस फेरेरा हांच्या अतारांकीत प्रस्नाक कायदो मंत्री ह्या नात्यान मुख्यमंत्री डॉ. प्रमोद सावंत हांणी ही लेखी जाप दिल्या. बार्देस म्हालांत सगळ्यांत चड 6756 सेल डीड जाल्यात. हाचे उपरांत साश्ट म्हालांत 5693 सेल डीड जाल्यात. तिसवाडी म्हालांतल्या सेल डिडांची पुराय म्हायती दिवंक नाशिल्ल्यान आंकडो मेळना. धारबांदोडें म्हालांत सगल्यांत उणे म्हणल्यार 112 सेल डीड जाल्यात.
सेल डीड जावपाक बरोच वेळ लागता म्हूण सरकारान सेल डीड करपाची प्रक्रिया ऑनलायन केल्या. ऑनलायन अर्ज सादर करपा सयत शुल्क लेगीत ऑनलायन भरपाची सुविधा आसा. इतलें आसून लेगीत अॅपायंटमेंटाक लागून बरेच अर्ज प्रलंबीत आसात. 2025 त 25 हजार सेल डीड जाल्ले आसले तरीय अडेच हजारां वयर अर्ज तरेकवार कारणां खातीर प्रलंबीत आसात.
सेल डीड जावपाक वेळ लागता, अश्यो लोकांच्यो कागाळी आशिल्ल्यो. हाचे खातीर सरकारान अर्जा उपरांत क्वेरी काडून अर्जदाराक 7 दिसां भितर कळोवप सक्तीचें केलें. हे विशींची अधिसुचोवणी 31 डिसेंबर 2018 ह्या दिसा जारी जाली. अर्जांत क्वेरी काडले उपरांत मात अर्जदारान दुरुस्ती करप गरजेचें थारता.
वर्सभरांत सेल डिडा विशीं आदवोगादा कडल्यान फक्त दोन कागाळी आयल्यात. ह्या दोनूय कागाळींचेर चवकशी सुरू आसा. कागाळींचेर अजून मेरेन कारवाय जावंक ना, अशें जापेंत म्हणलां.
पणजे आनी भोवतणच्या वाठारात जमनीचे दर देड लाख चौ.मी. लेगीत आसा. पणजे फ्लॅटाचो दर 70 लाखां वयर आसा. मडगांवां जमनीचे दर 65 हजार चौ.मी. मेरेन आसा. गांवगिऱ्या वाठारांत लेगीत आतां दर 15 हजार चौ.मी. परस चड आसा. दर वाडत आसले तरी ताचो खरेदीचेर परिणाम जावंक ना.
म्हालवार जाल्ले सेल डीड
बार्देस 6756, पेडणें 614, दिवचल 2053, सत्तरी 552, मुरगांव 2535, फोंडें 1492, केपें 905, सांगें 321, धारबांदोडें 112, काणकोणां 259, साश्ट 5693.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
