भांगरभूंय | प्रतिनिधी
पणजीः सध्या गोंयांत दिसपट्टी सुमार १०,६०० घरगुती एलपीजी सिलिंडराचे वाटप जाता आनी वाटपाचे हे प्रमाण हालींच्या भू-राजकी घडणुकां पयलीं आशिल्ल्या आंकड्या इतलेंच आसून सध्याची गरज भागोवपाक फावो तितलो सांठो आसा. सरकारी तेल कंपन्यांनी घरगुती एलपीजी वितरणाक प्राधान्य दिलां. सिलिंडर वितरण थारायिल्ल्या वेळापत्रका प्रमाण सुरू आसा, अशें सरकारी क्षेत्रांतल्या तेल कंपन्यांचे राज्यस्तरीय समन्वयक मधुरेंद्र के. पांडे हांणी सांगलें.
गोंयांत पट्रोल, डिझेल आनी एलपीजी सिलिंडर हांची उपलब्धता सध्याची मागणी पुराय करपा करपाक शकता अशें राज्यांतल्या तेल विपणन कंपन्यांनी दिल्ल्याचें पांडे हांणी एका पत्रकांत सांगलां.
ह्यो कंपन्यो पुरवणीच्या परिस्थितीचेर बारीक नदर दवरून आसात आनी पुरवण सुरळीत करपाक तशेंच वाटपाक गती दिवपाक पावलां उखल्ल्यांत. पुराय राज्यांत इंधन पुरवण सेगीत सुरू आसा. पुरवणेंतली स्थिरताय तिगोवन दवरपा खातीर राज्य सरकार आनी जिल्लो प्रशासना वांगडा समन्वय सुरू आशिल्ल्याचे पांडे हांणी स्पश्ट केलें.
गिरायकांनी एसएमएस, मिस्ड कॉल वा आयव्हीआरसच्या माध्यमांतल्यान सिलिंडर बुक करचो. तशेंच, पात्र लावार्थ्याकच वाटप जावचे हे निश्चीत करपा खातीर ’डिलिव्हरी ऑथेंटिकेशन कोड’ (DAC) वापरपाचो सल्लो पांडे हांणी दिला.
केंद्र आनी राज्य सरकार रांदपाच्या इंधनाचो पर्याय म्हणून पाईप्ड नॅचरल गॅसीक (पीएनजी) उर्बा दिता. पणजी, मडगांव आनी फोंडा हांगा पीएनजी सेवा उपलब्ध आसा. गिरायक ’गोवा नॅचरल गॅस प्रायव्हेट लिमिटेड’ (उत्तर गोंय) आनी ’इंडियन ऑईल अदानी गॅस प्रायव्हेट लिमिटेड’ (दक्षिण गोंय) हांच्या ऑनलायन पोर्टलचेर वचून नोंदणी करपाक शकतात, असो उलो पांडे हांणी मारला.
स्थलांतरीत कामगार आनी तात्पुरत्या राबितो करून रावपी पत्याचो पुरावो नाशिल्ल्या विद्यार्थ्यां खातीर, खंयचेंय सरकारी फोटो आशिल्लें वळखपत्र आनी एक प्रतिज्ञापत्र दिल्यार अधिकृत वितरकांकडे ५ किलोचे ’फ्री ट्रेड एलपीजी’ सिलिंडर विकते घेवपाक शकता, अशी म्हायती पांडे हांणी दिली.
पुरवण नियमीत दवरपा खातीर तेल कंपनी एलपीजी वितरकांची तपासणी करीत आसात. साठवणूक आनी काळोबाजार आडावपा खातीर राज्य सरकार आनी जिल्हा प्रशासन तपासणी मोहीम राबयता. आतां मेरेन गोंयांत प्रशासनान ३०५ धाडी मारून गैरप्रकार जाल्ल्या प्रकरणांत कारवाय केल्या, अशी म्हायती पांडे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
