दिसाक सोरो पियेल्ल्या स ड्रायव्हरांचेर पुलिसांची कारवाय

भांगरभूंय | प्रतिनिधी

29 ड्रायव्हरांचेर वेगान गाडी चलयिल्ले खातीर कारवाय

पणजी: गोंय पुलिसांनी फाटल्या पांच वर्सांत दिसाक सरासरी स सोरो पियेल्ल्या चालकांचेर कारवाय केली. तशेंच पुलिसांनी दिसाक सरासरी 29 चालकांचेर गती मर्यादेचें उल्लंघन केल्ले खातीर कारवाय केली. वयल्या काळांत राज्यांत 1235 गंभीर अपघात जाल्ले. डॉ. प्रमोद सावंत हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे विशींचो विरोधी पक्ष फुडारी युरी आलेमांव हांणी अतारांकीत प्रस्न उपस्थीत केल्लो.

जापेंत दिल्ले म्हायती प्रमाण पुलिसांनी 2020 ते 2024 मजगतीं ‘ड्रंक अ‍ॅण्ड ड्रायव्ह’ म्हणल्यार सोरो पियेवन वाहन चलयतल्या 10 हजार 778 चालकांचेर कारवाय केल्या. हाचोच अर्थ म्हयन्याक सरासरी 180 जाल्यार दिसाक 7 सोरो पियेल्ल्या चालकांचेर कारवाय केल्या. वयल्या काळांत 2024 वर्सा सगल्यांत चड 5370 सोरो पियेल्ल्या चालकांचेर कारवाय केल्या. 2023 वर्सा 2060, 2022 वर्सा 1429, 2021 वर्सा 294 जाल्यार 2020 वर्सा 1625 जणांचेर कारवाय जाली.

गती मर्यादेच्या उल्लंघनाक लागून गंभीर अपघात वाडत आसात. हे खातीर पुलिसांनी 2020 ते 2024 मजगतीं गती मर्यादेचें उल्लंघन करपी (ओव्हर स्पिडींग) 52 हजार 148 जाणांचेर कारवाय केल्या. हातूंतल्यान पुलिसांनी सुमार 4.34 कोटी रुपयांचो दंड वसूल केला. 2024 वर्सा सगल्यांत चड 18 हजार 78 चालकां कडल्यान 1.81 कोटी रुपया दंड वसूल केला. 2023 वर्सा 13 हजार 461 चालकां कडल्यान 1.36 कोटी रुपया जाल्यार 2022 वर्सा 9294 चालकां कडल्यान 80.84 लाख रुपया दंड वसूल केल्ल्याचें जापेंत म्हणलां.

19 वाहन परवाने रद्द

विधानसभेंतल्या हेर एका प्रस्नाचे जापे प्रमाण पुलिसांनी 2022 ते 2024 मजगतीं 19 जाणांचे वाहन परवाने रद्द केल्यात. जाल्यार 72 जाणांचे परवाने निलंबीत केल्यात. वयल्या काळांत गंभीर अपघाताचे गुन्यांव आशिल्ले 38 जाण दोशी थारल्यात. जाल्यार 27 जाण निर्दोश सुटल्यात.

गोंयांत 62 अपघात वाठार

पुलीस तशेंच हेर खात्यांनी राज्यांत वट्ट 62 अपघात वाठार सुचीत केल्यात. हातूंत दोनूय जिल्ह्यांतले दरेकी 31 सुवातांचो आस्पाव आसा. उत्तर गोंयांत 14 अपघात प्रवण वाठार जाल्यार 17 ब्लॅक स्पॉट आसात. जाल्यार दक्षीणेंत 13 अपघात प्रवण वाठार जाल्यार 18 ब्लॅक स्पोट आशिल्ल्याचें जापेंत म्हणलां.