भांगरभूंय | प्रतिनिधी
पणजीः गोंय वैजकी म्हाविद्यालयांत सुरू जाल्ल्या सुपर स्पेशॅलिटी मेडिकल विभागांतली सेवा सामान्य दुयेंती खातीर फायदेशीर थारता. गोंयांत फाटल्या वर्सा 1 लाख 18 हजार 338 दुयेंतींक ह्या विभागांतल्या वेगवेगळ्या सेवांचो लाव मेळ्ळा. हाचो अर्थ म्हयन्याक 9,861 दुयेंती आनी दिसाक सरासरी 324 दुयेंती ह्या विभागांतल्या सेवांचो लाव घेतात. ही म्हायती अर्थीक सर्वेक्षण अहवाल 2024-25 वयल्यान मेळटा.
अहवाला प्रमाण सुपर स्पेशॅलिटी सेवांनी मुखेलपणान हृदयविज्ञान (काळजा संबंदीत), मूत्रपिंड (मूत्रपिंड आनी हेर), नेफ्रोलॉजी (मूत्रपिंड), तंत्रिका तंत्र (तंत्रिका तंत्र), तंत्रिका शस्त्रक्रिया, प्लास्टीक सर्जरी, ऑन्कोलॉजी (कॅन्सरा संबंदीत), अंतःस्रावी विज्ञान (हार्मोन), बालरोगविज्ञान (भुरग्यांचेर शस्त्रक्रिया), सीव्हीटीएस, आयव्हीएफ आनी हेर सेवांचो आस्पाव जाता. लाव मेळिल्ल्या वट्ट दुयेंतींतले 16,430 दुयेंती गोमेको हॉस्पिटलांत दाखल जाले. उरिल्ले 1 लाख 1 हजार 908 बाह्यरुग्ण (ओपीडी) आशिल्ले.
अहवाला प्रमाण वट्ट दुयेंतींतले सगळ्यांत चड दुयेंती 29,816 जाणांनी हृदयविज्ञान विभागांत सेवा घेतिल्ली. हाचो अर्थ दर दिसा सरासरी 81 दुयेंतींक ताचो फायदो जातालो. 19,436 दुयेंतींक नेफ्रोलॉजी विभागांतल्यान सेवा मेळ्ळी. वैजकी ऑन्कोलॉजी खात्या कडल्यान 18,371 दुयेंतींक सेवा मेळ्ळी. 15,896 दुयेंतींक मेडिकल युरोलॉजी विभागांतल्यान सेवा मेळ्ळी. 20,272 दुयेंतींक न्यूरोलॉजी आनी न्यूरोसर्जरी विभागांत सेवा मेळिल्ली. प्लास्टीक सर्जरी खात्या कडल्यान 8 हजारां परस चड दुयेंतींक सेवा मेळ्ळी.
2645 जाणांनी वांझपणाचेर घेतले उपचार
अहवाला प्रमाण वयल्या काळांत 2,645 जाणांनी वांझपणाचेर उपचार घेतल्यात. हे खातीर सुपर स्पेशॅलिटीच्या असिस्टेड रिप्रोडक्टिव्ह टेक्नॉलॉजी (ART) विभागांत आयव्हीएफ आनी हेर उपचार पद्दती वापरतात. जाल्यार बालरोग शस्त्रक्रिया विभागांत 3,554 ल्हान दुयेंतींचेर उपचार जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
