भांगरभूंय | प्रतिनिधी
पणजी : फाटल्या पांच वर्सांनी ८४२५ गोंयकारांनी भारतीय पासपोर्ट सरेंडर करून तांचें भारताचें नागरिकत्व सोडलें. हाचोच अर्थ म्हयन्याक सरासरी १४० जाल्यार दिसाक सरासरी ४ परस चड गोंयकारांनी भारतीय नागरिकत्व सोडलें. मुख्यमंत्री डॉ. प्रमोद सावंत हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे विशीं आमदार विजय सरदेसाय, कार्लुस फेरेरा, वेंजी व्हिएगस आनी क्रुझ सिल्वा हांणी तारांकीत प्रस्न हाजीर करून केल्लो.
जापेंत दिल्ले म्हायती प्रमाण, राज्य सरकारान परराष्ट्र मंत्रालयाच्या एफआरआरओ कडल्यान हे विशीं म्हायती मागयिल्ली. ते प्रमाण वर्स २०२१ त ९५४ गोंयकारांनी भारतीय नागरिकत्व सोडिल्लें. ताचे उपरांतच्या फुडल्या तीन वर्सांनी पासपोर्ट सरेंडर करप्यांचो आंकडो वाडतूच गेलो. २०२२त १२८५, २०२३त २०९४ गोंयकारांनी भारतीय नागरिकत्व सोडलें. २०२४त पांच वर्सांनी सगल्यांत चड म्हळ्यार २२९५ गोंयकारांनी भारतीय नागरिकत्व सोडलें.
जाल्यार २०२५त हो आंकडो उणो जावन १७९७ चेर पावलो
भारतीय नागरिकत्व सोडिल्ल्या वट्ट ८४२५ मदल्या सगल्यांत चड ८३७० जाणांनी पुर्तुगेज देशाचें नागरिकत्व स्विकारलें. उपरांत १८ जाणांनी युके, १२ जाणांनी कॅनडा, ९ जाणांनी यूएस, ४ जाणांनी जर्मनी, ३ जाणांनी रशिया, जाल्यार २ जाणांनी थायलंड ह्या देशाचें नागरिकत्व स्विकारलें. जाल्यार दरेकी मनशान कझाकस्तान, मेक्सिको, फ्रान्स, रोमानिया, टांझानिया आनी पोलंड ह्या देशांचें नागरिकत्व स्विकारलें. हे विशीं बायलो आनी दादले असो डेटा उपलब्ध नाशिल्ल्याचें जापेंत म्हणलें.
दोट्टी नागरिकत्वाक परवानगी ना
नागरिकत्व हो विशय केंद्र सरकाराचे अखत्यारींत येता. दुसर्या देशाचें नागरिकत्व स्विकारप हो मनशाचे वयक्तीक निवडीचो भाग. भारताच्या संविधानाच्या कलम ९ प्रमाण दोट्टी नागरिकत्वाक परवानगी नाशिल्ल्याचें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
