भांगरभूंय | प्रतिनिधी
रेस्टॉरंण्ट, हॉटेल वेवसायिकांची मागणी
सिलिंडरा खातीर सामान्य लोक रांकेंत
घरगुती सिलिंडर उपलब्ध : मुख्यमंत्री
भांगरभूंय । प्रतिनिधी
मडगांव/पणजी/पेडणें : मडगांव सयत दर्यादेग वाठारांतले हॉटेल आनी रेस्टॉरंण्ट वेवसायिकांक गरजेचो सिलिंडर मेळनाशिल्ल्यान दोन दिसांनी वेवसाय तात्पुरतो बंद करचो पडटलो, अशें कांय जाणांनी सांगलें. घरगुती सिलिंडरा खातीर एजन्सीचे भायर अजून रांको दिसता. दिसाक उण्यांत उणो एक तरी गॅस सिलिंडर दिवचो, अशी मागणी रेस्टॉरंण्ट, हॉटेल वेवसायिकांनी केल्या.
देशभरांत सिलिंडरांचो उणाव जाला, गोंयांत लेगीत वेवसायीक सिलिंडर मेळना. हाचो व्हड परिणाम रेस्टॉरंण्ट, हॉटेल वेवसायाचेर जाता. पर्यटनाचेर लेगीत हाचो व्हड परिणाम दिसता. मडगांवां सयत दक्षीण गोंयांतले रेस्टॉरंण्ट आनी हॉटेल वेवसायीक हुस्क्यांत पडल्यात. कांय कडेन ह्या आस्थापनांनी काम करपी कर्मचाऱ्यांच्या नोकऱ्यांचेर लेगीत परिणाम जावपाची शक्यताय आसा.
गोंय सरकारान उण्यांत उणो एक सिलिंडर दरेका रेस्टॉरंण्टाक उपलब्ध करून दिवपाची गरज आसा. हॉटेल, रेस्टॉरंण्ट वेवसायिकांनी सिलिंडर मेळना हे खातीर आस्थापनां बंद केल्यार ताचो परिणाम फक्त पर्यटकांचेर जावचो ना जाल्यार थंय काम करपी कर्मचाऱ्यांचेर लेगीत जातलो. कर्मचाऱ्यांची रावपाची, जेवणाची आनी पगाराची वेवस्था लेगीत वेवसायिकांक करची पडटा. इंडक्शन हो पर्याय जावपाक शकना, कारण ताचेर व्हड आयदनां दवरपाक मेळना. तेच वांगडा विजेचे दर लेगीत वाडल्यात. दिसाक 20 ते 25 हजारांचो मार रेस्टॉरंण्ट वेवसायिकांक बसतलो, अशें दक्षीण गोंय हॉटेल असोसिएशनाचे अध्यक्ष दीपक पै हांणी सांगलें.
पुरवणदारांचेर लेगीत जातलो परिणाम
हॉटेल आनी रेस्टॉरंण्टाचो वेवसाय वेवसायीक सिलिंडर मेळनाशिल्ल्यान बंद करपाचो वेळ आयल्यार ताचो मार तांकां भाजी, नुस्तें, मास, पाव अशे गरजेचें साहित्यांची पुरवण करपी वेवसायिकांक लेगीत बसतलो. खूबशे बेकरी उत्पादक हॉटेल आनी रेस्टॉरंण्टांक पावाची पुरवण करतात. तांचेर परिणाम जातलो, घडये उत्पादन उणें करपाची वा बंद दवरपाचो वेळ येवपाक शकता, अशें मत ऑल गोवा बेकर्स असोसिएशनाचे सचीव कोन्सेसिओ डिकॉस्टा हांणी उक्तायलें.
घरगुती सिलिंडर उपलब्ध आसात
मुख्यमंत्री : वेवसायीक सिलिंडराचो विशय बेगीन सुटावो जातलो
पणजी : घरगुती गॅस सिलिंडर उपलब्ध आसात आनी वेवसायीक सिलिंडरांची समस्या जाल्या. लोकांनी भियेवपाची गरज ना. हो विशय बेगीन सुटावो जातलो, अशें मुख्यमंत्री डॉ. प्रमोद सावंत हांणी स्पश्ट सांगलां.
बिरेस्तारा विधानसभेच्या अधिवेशनाचे सुरवातेकच विरोधकांनी गोंयांत उप्राशिल्ल्या गॅस सिलिंडराच्या उणावा वयल्यान बोवाळ घालपाक सुरवात केली.
एक म्हजी गॅस येवजण येवपा आसा काय म्हूण लोकांमदीं भंय जाला. पुराय गोंयभर हो विशय पेटला. लोक सकाळ सावन सिलिंडर घेवपा खातीर रांकेंत रावल्यात, अशें विरोधी पक्ष फुडारी युरी आलेमांव हांणी सांगलें.
गॅस सिलिंडर उणावाची समस्या सुटावी करपा खातीर सरकारान दरेक घरांत फुकट इंडक्शन दिवचें तशेंच फुकट लायट दिवची, अशी मागणी बाणावलेचे आमदार वेन्झी व्हिएगस हांणी केली.
आमी भारत सरकाराच्या संपर्कांत आसात. तांणी तीन सचिवांची कार्यकारी समिती तयार केल्या. आमी हे विशींचो अहवाल मागोवन गॅस सिलिंडाराची समस्या सोडयतात. लोकांनी भियेवन लायनीक रावपाची गरज ना. हो विशय सुटावो जातलो, अशें आस्वासन मुख्यमंत्र्यान दिलें.
सिलिंडर मेळोवपाक पेडण्यां रांक
एके वटेन घरगुती गॅस सिलिंडरांचो उणाव आशिल्ल्यान तो मेळचो हे खातीर पेडणें गॅस कार्यावलया मुखार गिरायकांची रांक लागिल्ली.
अमेरिका- इझ्रायल- इराण हांचे मदीं झूज चालू आशिल्ल्यान कांय प्रमाणांत गॅस सिलिंडरांचो उणाव जाला. आदीं गॅस सिलिंडराची गाडी दारादारांनी येवन सिलिंडरांची पुरवण करताले, पूण आतां ती ये नाशिल्ल्यान गिरायकांक गॅस सिलिंडर मेळना. हे खातीर गिरायकांनी नाराजी उक्तायल्या. दुसरे वटेन वेवसायीक गॅस सिलिंडरांचो व्हड प्रमाणांत उणाव जाल्ल्यान कांय हॉटेल, रेस्टॉरंण्टांचेर ताचो व्हड परिणाम दिसपाक लागला. पेडणेंच्या कांय हॉटेलांनी गरम उदक लेगीत दिवपाचें बंद केलां. तशेंच कांय दर्यादेग वाठांतल्या रेस्टॉरंण्टांत तांचे मेनूंत दिसपट्टे खाद्यपदार्थ, जेवण रांदतात, तातूंतले लेगीत कांय पदार्थ उणें केल्यात, अशें चित्र दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
