भांगरभूंय | प्रतिनिधी
7 वर्सां परस अदीक सेवा दिल्ल्या 3 हजार कर्मचाऱ्यांक फायदो
भांगरभूंय । प्रतिनिधी
पणजी : 7 वर्सां परस अदीक काळ सेवा दिल्ल्या सरकारी खातीं, म्हामंडळां, पालिकेंतल्या दिसवड्या वयल्या कर्मचाऱ्यांक टेंपररी स्टेटस म्हणल्यार तात्पुरतो कर्मचारी दर्जो दिवपाची निर्णय गोंय सरकारान घेतला. मुख्यमंत्री डॉ. प्रमोद सावंत हांणी सोमारा हो म्हत्वाचो निर्णय जाहीर केला. ह्या निर्णयाक लागून कर्मचाऱ्यांक चड पगार, रजा आनी हेर सवलतींचो फायदो जातलो. ही सुदारीत येवजण 1 ऑगस्ट 2025 सावन लागू जातलो. हाचो सुमार 3 हजार कर्मचाऱ्यांक फायदो मेळटलो.
क्लेरिकल कर्मचाऱ्यांक म्हयन्याक 25 हजार रुपयांचो निव्वळ पगार मेळटलो. तातूंत दर वर्सा 3 टक्के वाड करतले. दिसवड्याचेर काम करपी कामगारांक, जर तांणी 2020 मेरेन 7 वर्सां पिराय केल्ली आसत जाल्यार तांचो मूळ पगार 20 हजार रुपया मेरेन थारायतले. 2020 सावन दर वर्सा 3 टक्के वाड दिवन 2025 त तांचो पगार 23,185 रुपया मेरेन वतलो. ज्या कामगारांचो दर म्हयन्याक सरासरी पगार 12,818 रुपया आसा, तांच्या पगारांत सुदारीत येवजणे उपरांत सुमार 52 टक्के वाड जातली.
तात्पुरतो दर्जो मेळिल्ल्या कर्मचाऱ्यांक दर 15 दिसांनी एका दिसाची कॅज्युअल लिव्ह (सामान्य रजा), दर वर्सा 15 दिसांची सीक लिव्ह, बाळंतपणाची रजा (कायद्या प्रमाण लाव) अशे लाव मेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
