भांगरभूंय | प्रतिनिधी
पावस, वत, शिंयाची, वाऱ्याची दिसपटी, दिका बदलता. बदल 10 वर्सां उरतले अशें हवामान शास्त्रज्ञ सांगतात. पावस, वत, शिंया प्रमाण चलप, भोंवप, फिरप, खावप, जेवपाची ज्येश्ठनीत आवय बापूय, घरांतल्या जाण्टेल्यांची. आयज तीं पुस्तकांत बांदतात. ताका अणभव, विज्ञानाची जोड मेळिल्ली आसता. ती विज्ञानीक भाशे परस सोंप्या उतरांनी बांदल्यार वाचपी वाडटले. थंय नांवाक म्हत्व आसा, जोडिल्लो विस्वास म्हत्वाचो आसता, तो मागीर नात्यांतल्यांचो आसूं वा नव्या वाचप्यांचो.
पावसा- वाऱ्याची, येवपा- वचपाची दिसपटी, ऋतूचक्र कळ्ळ्यार, समजून घेतल्यार शेतां- भातांच्यो रोवपाच्यो, पिकावळीच्यो, बांदकामाच्यो आनी हेर येवजणी करुंक मेळटल्यो. दिसपटी एका वराची, एका दिसाची, वर्सावळीची आसता. तेंपा प्रमाण, पिराये प्रमाण ती बदलपाक जाय, जिणेपद्धत ते प्रमाण बांदची, थारावची. उलोवप, चलप, भोंवप, फिरप, शिकप तरणाटे पिरायेंत जितले बेगीन जाता तें जाण्टेंपणात जायना. जाण्टेपण हें दुसरें भुरगेपण, अशी म्हणणी आसली तरी खरेपणीं तें तशें आसना. रागार जावचे न्हय, जीण, जिणेपद्धती बदलता तशी शार, गांव, राज्यांय बदलतात. बदल वेगीं कळ्ळे, वाचले, कालचे पद्धतींत तंत्रगिन्यान भरशिलें म्हुण जीणेपद्धत सोंपी जायना. तंत्रगिन्यान तरणाट्यांचो मेंदू झरयता, मेंदवाचेर वजें पडटा, थाकाय येता, तिडक मारता, वखदांनी ती वतली? उलोवनय ती वचना तेन्ना अचूक उतरां खूब सांगतात, गिन्यान दितात.
पावस, पावसा बराबरीन, उपरांत पयलीं वारें खंयचे दिकेन आसा ताचो अदमास भारतीय वेधशाळा दिता. सप्तकी अदमासपत्रक रों रों वारें, पावस कांय वेळार व्हांवन वता, वेगीं येवपी बदलां बराबरीन. पिराये प्रमाण ज्येश्ठांची कालची दिसपटी आसताली ती आयज बदलची पडटली, निमणे वेळार तातूंत बदल करचे पडटात. थाकाय तेन्नाय येता, मनाक आनी शरीराक. ती ना एका दिसाची, ना वर्सावळीची, वर्सांवर्सांची. कालचे दिसपटे प्रमाण आमी फाल्यां भोंवक शकचेनात, कालची भोंवतण आयज ना, पूण काल आनी आयज जावपी बदल फुडाराचे अदमास थारायतात. फुडार तिगपी आसतलो? तंत्रगिन्यानांत घुस्पल्ली पिळगी तें सांगूक शकता. तांचे खातीर काल, आयज शेळें जाता, ताज्जें तेन्नाचे तेन्ना मेळ्ळें, कळ्ळें जाल्यार फुडाराची दिसपटी थारावप शक्य जाता.
वेधशाळा पावसांत चड सक्रीय जाता. कालचो, सकाळचो मेजिल्लो पावस, वारें कशें व्हांवता तें चार पांच वरांनी इ मेलाचेर कळयता. मोबायला वयले घड्याळीर बदलाची म्हायती खीणाखीणाक व्हडा राज्यांनी मेळटा. गोंयचे वेधशाळेत मनीसबळ उणें आशिल्ल्यान तें करप शक्य ना. सप्तकी अदमासाचेर नदर माल्ल्यार फुडारांत येवपी संकश्ट दिसता, एकचित्तान अभ्यास केलो जाल्यार तें कळटा.
कालचीं तीन दिसकां निर्मणेची, निमण्या दसकाच्या संशोधनातल्यान फुडारा पासत येवजण थारावंक जाय. तंत्रगिन्यान ते खातीर उपेगी आसलें तरी तें कितलें घेवप, दुसऱ्यांक दिवप, केन्ना पावोवप ताची मांडावळ गरजेची. तंत्रगिन्यानांतल्यान दिवप, घेवप अचूक आसल्यार विश्वास वाडटा.
पावसा, वाऱ्याचो अदमास सांगपी खाजगी संस्था जाल्यात, समेस्तांक तांचें सांगणें भावता? तातूंत भावपण आसता? भावपणातल्यान, जापसालकेंतल्यान उक्तायिल्ले अदमास खरे जातात, तांकां अणभवाची जोड आसता. वाडपी वेपार आनी वेवसाय येरादारीचेर, पावसा- वाऱ्याच्या वातावरणाचेर निंबून उरता तशेंच चलप, भोंवप हें ज्येश्ठांक कळपाक जाय, अणभवी ज्येश्ठ तें सांगूंक शकतात. तातूंतल्यान फुडाराची ज्येश्ठनीत थारतली, वारें पावसाचे अदमास मांडून समेस्तां मेरेन पावपी जल्मतले.
अळम्याचो आषाढ फोव (सिजन) चालू आसतना तीं नुस्त्यावरी व्हडा प्रमाणात काडलीं जाल्यार फुडारांत आसा तेंय ना जातलें. अळम्याचो वेपार वाडटा तितलें मोल वाडलां, ते खातीर सरकारान वेळार दिल्ली शिटकावणी मोलादिक. कोण आडायतले चड अळमी काडप? रातयां नदर दवरपी आसात? यंत्रणेची बांदावळ जाल्या? पावसाचो उटंगार, हुंवार अमासेच्या फाटल्या फुडल्यान आयल्यार अळम्याचो आयज पडपी पावस पडचोना.
विदेसांतल्यान गोंयांत परतल्ल्यांक कालचें गोंय, गोंयकार, गोंयकारपण दिसचेंना, परतून बीं शिंपडायल्यार तें किल्लतलें अशें न्हय. बदलां बराबरीन तांकां, आमकां शिकचें पडटलें. बदल वेगीं जातात, आमी आदलेच फास्केंत रावतात तेन्ना जाल्ल्या बदलांतल्यान येवपी वारें, पावस कळना, दिसना. जांकां तें कळटा तो जैतवंत, ताचेच दिकेन सगल्यांचे पावल. अंदूचो पावस, वारें गोंयांक जैताचे दिकेन व्हरत व्हय? ती दिका व्हडांक ल्हान, ल्हानांक व्हड करुंक शकता. तीच तर ज्येश्ठनीत, व्हडवीकाय, शाणपण.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
