भांगरभूंय | प्रतिनिधी
महाराष्ट्राची 19 वर्सां पिरायेची दिव्या देशमूख हिणें बायलांची संवसारीक बुद्दीबळ सर्त जिखली. ही सर्त जिखपी ती भारताची पयली खेळगडी थारली. फायनलींत टायब्रेकरांत तिणें भारताचेच कोनेरू हम्पीक हारोवन वस्तादपण जोडलें. संवसारीक वस्तादपण मेळोवपा सयत ती भारताची वट्ट 88वी ग्रॅण्डमास्टर जाल्यार तिसरी भारतीय ग्रॅण्डमास्टर थारली. तिचे पयलीं कोनेरू हम्पी, हरिका द्रोणावल्ली आनी वैशाली रमेशबाबू हिणें ग्रॅण्डमास्टर नॉर्म मेळयला.
दिव्या देखमूखान सर्तींत आपल्या परस वयले सुवाते वयल्या साबार खेळगड्यांक हारोवन फायनलींत सुवात मेळयिल्ली. फायनलींत तिणें हम्पी आडच्यो दोनूय क्लासिकल मॅची बादाबाद दवरल्यो. ते उपरांत काल जाल्ले टायब्रेकरांत तिणें हम्पीक 1.5-0.5 अशा फरकान हारयली. दिव्यान पयली टायब्रेक मॅच जिखली, जाल्यार दुसरी मॅच बादाबाद दवरली.
12वे चाली उपरांत कितें करपाक जाय हें आपल्याक समजूंक ना अशें मॅच सोंपल्या उपरांत हम्पीन सांगलें. पूण, 54वे चालींत दिव्यान मॅचीचेर आपलो शेक दवरिल्लो. ते उपरात हम्पीन हार मान्य केली. ह्या जैतान दिव्याक सुमार 42 लाख रुपया मेळटले. जाल्यार हम्पीक 30 लाखांचें इनाम मेळटलें.
मजगतीं, दिव्या आनी हम्पी दोगांयनी फुडल्या वर्सा जावपी कॅण्डिडेट्स सर्ती खातीर पात्रताय मेळयली. 19 वर्सां पिरायेची दिव्या फाटल्या 34 वर्सांनी बायलांचे कॅण्डिडेट्स सर्ती खातीर पात्र जावपी सगल्यांत उण्या पिरायेची खेळगडी थारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
