दिव्यांग श्रेणींतल्या राज्य पुरस्कारां खातीर अर्ज मागयल्यात

भांगरभूंय | प्रतिनिधी

पणजीः दिव्यांगत्व व्यक्ति सशक्तिकरण संचालनालयान दिव्यांग श्रेणींत उत्कृश्ठ मालक (एक पुरस्कार), उत्कृश्ठ बिगर सरकारी संस्था (एक पुरस्कार), उत्कृश्ठ दिव्यांग व्यक्ती (एक पुरस्कार) आनी उत्कृश्ठ कर्मचारी (चार पुरस्कार) राज्य पुरस्कार भेटोवपा खातीर दिव्यांग मालक, बिगर सरकारी संस्थां, दिव्यांग व्यक्ती आनी दिव्यांग कर्मचाऱ्यां कडल्यान विहित नमुन्यांतल्यान अर्ज मागयल्यात.
उत्कृश्ठ दिव्यांग कर्मचारी श्रेणीत दोळ्यांनी न दिसप, आयकुपाक न येवप आनी शारीरिक दिव्यांग अशा वर्गात दरेकी एक पुरस्कार दितले. रोख 50,000/- रूपया, प्रशस्तीपत्र अशें पुरस्कारांचे स्वरूप आसा.
विहित नमुन्यांतले अर्ज दिव्यांगत्व व्यक्ति सशक्तिकरण संचालनालयांत फुकट उपलब्ध आसात. पुराय भरिल्ले अर्ज राजपत्रीत अधिकाऱ्यांन प्रमाणीत केल्ल्या आवश्यक दाखल्यांच्या प्रती सयत 18 नोव्हेंबर मेरेन दिव्यांगत्व व्यक्ति सशक्तिकरण संचालनालयांत पावपाक जाय. हे पुरस्कार 19 डिसेंबराक गोंय मुक्ती दीस सुवाळ्यात मुख्यमंत्र्याच्या हस्तुकीं भेटयतले.