भांगरभूंय | प्रतिनिधी
पणजी: गोंयांतल्या विंगड विंगड शाळां, महाविद्यालयां आनी संस्थांनी शिकपी दिव्यांग विद्यार्थ्यांक विद्यावेतन आनी शिश्यवृत्ती दिवपा खातीर दिव्यांग व्यक्ती सक्षमीकरण संचालनालया वतीन कल्याणकारी येवजणेची अंमलबजावणी करपांत येता.
पयली ते आठवी यत्तेच्या विद्यार्थांक म्हयन्याक २०० रूपया आनी यत्ता ९ वी ते १२ वी यत्तेच्या विद्यार्थांक म्हयन्याक ३०० रूपया हे प्रमाण ११ म्हयन्यां खातीर विद्यावेतन दितात. यत्ता ९ वी ते १२ वी वा विद्यापीठ अभ्यासक्रमा प्रमाण तत्सम यत्तेच्या डे-स्कॉलर विद्यार्थ्यांक म्हयन्यांक ५०० रुपया, हॉस्टेलांत रावप्यांक म्हयन्याक २०० रुपया हे प्रमाण ११ म्हयन्यां खातीर शिश्यवृत्ती आनी दृश्टीहिन विद्यार्थ्यांक म्हयन्याक ७५ रुपया हे प्रमाण ११ म्हयन्यां खातीर रिडर भत्तो दितात.
बी. ए., बी.कॉम., बी. एससी., आदी यत्तेच्या डे-स्कॉलर विद्यार्थ्यांक म्हयन्याक ६५० रुपया, हॉस्टेलांत रावप्यांक म्हयन्याक २७० रुपया हे प्रमाण ११ म्हयन्यां खातीर शिश्यवृत्ती आनी अंध विद्यार्थ्यांक म्हयन्याक ११५ रुपया हे प्रमाण ११ म्हन्या खातीर रिडर भत्तो दितात.
बी. ई,. बी. आर्क., एमबीबीएस., एलएलबी., बी. एड., वेवसायीक पद्विका, अभियांत्रिकी अभ्यासक्रम आनी एमए, एमएससी, एम. कॉम., एलएलएम, एम. एड., च्या डे-स्कॉलर विद्यार्थ्यांक म्हयन्याक ९०० रुपया, हॉस्टेलांत रावप्यांक म्हयन्याक ३६० रुपया हे प्रमाण ११ म्हयन्या खातीर शिश्यवृत्ती आनी दृश्टीहिन विद्यार्थ्यांक म्हयन्याक १५० रुपया हे प्रमाण ११ म्हन्या खातीर रिडर भत्तो दितात.
वैजकीय मंडळाच्या दाखल्या प्रमाण उण्यात उणे ४० टक्के आनी त्या परस चड टक्के दिव्यांग आशिल्ले, पयलींचे वर्सुकी परिक्षेंत उण्यात उणे ४५ टक्के आनी ते परस चड गुण मेळिल्लें, पालकांची वर्सुकी येणावळ १,५०,००० रुपया परस चड नाशिल्ले आनी समाज कल्याण खात्याचे वळखपत्र आशिल्ले विद्यार्थी हे येवजणे खातीर पात्र आसात. मान्यताय मेळिल्लें शिक्षण मंडळ वा विद्यापिठांतल्यान संगीत आनी वेवसायीक अभ्यासक्रमाचें शिक्षण घेवपाकय शिश्यवृत्ती दितात.
ह्या येवजण्यां खाला फकत ऑनलायन अर्ज स्विकारतले आनी ऑफलायन अर्जां खातीरची मागणी विचारांत घेवचे ना. २०२५-२६ वर्सा खातीर विद्यार्थ्यांनी cmscholarship.goa.gov.in ह्या मुख्यमंत्री शिश्यवृत्ती पोर्टलाचेर नोंदणी करपाक जाय आनी ती १८ ऑगस्टाच्यान सुरू जाल्ली आसा. नोंदणी आनी अर्ज सुपुर्द करपाची निमाणी तारीख १५ नोव्हेंबर २०२५ आसा.
चड म्हायती खातीर संचालनालयाच्या फोन. न. ०८३२-२९१२६०१ चेर संपर्क करचो वा dir-depwdgoa.gov.in ह्या ई-मेलाक भेट दिवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
