दिव्यांग रितेशान हिमालयांत अन्नपूर्णा बेस कॅम्प ट्रॅक पुराय केलो
भांगरभूंय | प्रतिनिधी
पणजी ः दिवचल तालुक्यांतल्या रितेश वायंगणकार हांणी हिमालयांत अन्नपूर्णा बेस कॅम्प ट्रेक पुराय करून इतिहास निर्माण केलो. 88 टक्के दिव्यांग आसून लेगीत ताणें 75 किलोमीटराचो हो ट्रॅक फकत 4 दिसांत पुराय केलो. 13 ते 24 एप्रील मेरेन ‘टिंकेश ॲबिलिटी फावंडेशन’ आनी ‘अद्वैत आउटडोर्स’ हांच्या फुडाकारान भारतांतल्या सगळ्यांत व्हडल्या इन्क्लूसिव्ह हिमालयीन ट्रॅकाचें आयोजन केल्लें. रितेश हो एकसुरो गोंयकार जाणें हे मोहिमेंत वांटो घेतिल्लो.
ह्या कठीण प्रवासांत रितेश बेस कॅम्पांत पावपाकच समाधानी जालो ना, ताणें पुराय 75 किमीचो प्रवास पुराय केलो. तांचे वांगडा टिंकेश कौशिक (ट्रिपल ॲम्प्युटी व ‘टिंकेश फाउंडेशन’चे संस्थापक), रचित (हँड ॲम्प्युटी आनी तीन फावटीं कॅन्सरांतल्यान बरें जाल्ले आनी मोटिवेशनल स्पीकर), नितीन (हँड ॲम्प्युटी), दीपेंद्र आनी गोविंद (पार्शिअल हँड ॲम्प्युटी) आनी हेर 9 दिव्यांगांनी हे मोहिमेंत वांटो घेतिल्लो.
मनाची शक्त अफाट आसता आनी हे शक्तीनूच अशा शिखरांचेर प्रवास करूं येता. सुरवातेचे दर एक ल्हान पावल म्हत्वाचें. फुडल्या आव्हानांक दर एका पांवड्यार आनंदान तोंड दिवप हें येसस्वी जावपाची गुरुकिल्ली अशें रितेश हांणी सांगलें.
हो प्रवास कठीण आशिल्लो, पूण हांवें तो इत्साशक्तीच्या बळार पुराय केलो. इत्सा बळिश्ट आसल्यार धैर्य आपोआप येता! ताच्या यशस्वी विशीं उलयतना ताणें म्हणलें, “म्हज्या यशाचो म्हाका अभिमान आसा आनी म्हज्या सारकिल्या जायत्या जाणांक प्रेरणा मेळटली अशी आस्त आसा.” रितेशाचें हें येस फकत वैयक्तीक येस न्हय, तर दिव्यांग आशिल्ल्या लोकांक साहसी खेळां आनी पर्वतारोहणाच्या मळार प्रवेश करपाक नवो मार्ग उक्तो करपाचें पयलें पावल.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
