भांगरभूंय | प्रतिनिधी
नवी दिल्ली, खबरां संस्था ः कानपूरच्या 22 वर्सां पिरायेच्या अनंत वैश्यान ‘द स्पेशल स्कूल’ नांवाचो एक खाशेलो ॲप तयार केला. हो ॲप दिव्यांग जशे कुड्डे, भेरे, मोने आनी शारिरीक नदरेन दिव्यांग आशिल्ल्या भुरग्यांक शिक्षण दिवपा खातीर उपेगी पडटा.
अनंताक स्वता आर्थ्रोग्रीपोसिस मल्टिप्लेक्स कॉन्जेनिटा नांवाचो एक दुर्मिळ जल्मल्या पसून आसा. ताका लागून स्नायू आनी सांधे कडक जातात. तो ताच्या नाकाचो उपेग करून दर मिण्टाक 170 अक्षरां बरोवंक शकता.
‘द स्पेशल स्कूल’ ॲप 2022 वर्सा तयार केल्लो
अनंत हांणी जुलय 2022 वर्सा व्हेओलियाचे सहसंस्थापक मोहम्मद मुस्तबा हांचे वांगडा ‘द स्पेशल स्कूल’ ॲप तयार केलो. ह्या ॲपा वरवीं दिव्यांग आशिल्ल्या भुरग्यांक कसलेच मजती बगर अभ्यास चालू दवरूं येता.
अनंतान एनसीईआरटीच्या अभ्यासक्रमाचे रूपांतर केला आनी मायड मॅप्स, पॉडकास्ट, गेम, आनी क्विझ आशिल्लो देशांतलो पयलो ऑनलायन ॲप तयार केला.
ह्या ॲपांत राष्ट्रीय शैक्षणिक संशोधन आनी प्रशिक्षण परिषद (NCERT) चो अभ्यासक्रम यत्ता पयली ते पांचवी आनी यत्ता सवी ते बारावीच्या दिव्यांग भुरग्यां खातीर तांच्या गरजे प्रमाण तयार केला.
‘द स्पेशल स्कूल’ ॲप शिक्षण मंत्रालय प्रमाणीत
‘द स्पेशल स्कूल’ ॲप शिक्षण मंत्रालय, व्हॉयस ऑफ स्पेशली एबल्ड पीपल (VOSAP), ऑल इंडिया काउन्सिल फॉर रोबोटिक्स अँड ऑटोमेशन, आनी एनसीईआरटी कडल्यान प्रमाणीत आसा.
भारतांतल्या पयल्या तंत्रगिन्यानाच्या स्टार्टअप महाकुंभांत बेस्ट ऑडियो ॲप टायटल ह्या ॲपाक मेळ्ळां. ऑल इंडिया काउन्सिल फॉर रोबोटिक्स अँड ऑटोमेशन हे संस्थेन आयोजीत केल्लें.
व्हॉयस कमांड खाशेलपणाचेर काम करता
‘द स्पेशल स्कूल’ ॲपांत व्हॉयस कमांड खाशेलपण आसा आनी तें मायका वरवीं चलता. हातूंत दरेक दिव्यांगा प्रमाण इंटरफेस दवरला. जर कुड्डो भुरगो आसल्यार हो ॲप तांचे खातीर आवाजाचेर काम करतलो.
तेच प्रमाण जांकां आयकुपाक येना वा दिसना अशां खातीर मायड मॅच खाशेलपणूय बिल्ट इन आसा. हो ॲप गूगल प्ले स्टोराचेर उपलब्ध आसा.
सध्या हो ॲप सुमार 400 भुरगीं वापरतात आनी कानपूरांतल्या 3 खाशेल्या शाळांनी चालीक लायला. केंद्रीय शिक्षण मंत्रालयानय अनंताक हो ॲप वाडोवपा खातीर अर्थीक मजत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
