भांगरभूंय | प्रतिनिधी
एलडीसी/स्टेनोग्राफर पदा खातीर कर्मचारी भरती आयोगाचो निर्णय
भांगरभूंय । प्रतिनिधी
पणजी : कर्मचारी भरती आयोगा वरवीं भरती जावपी एलडीसी आनी ज्युनियर स्टेनोग्राफर पदां खातीर जांकां टायपींग करप शक्य ना, अशा प्रकारच्या दिव्यांगांक टायपींग चाचणींतल्यान सूट दिल्या. हे खातीर पात्र आशिल्ल्या दिव्यांगांनी 15 जुलय 2025 मेरेन कर्मचारी भरती आयोगा कडेन वैजकी मंडळ वा सिवील सर्जना कडेन प्रमाणपत्र सादर करप बंधनकारक आसा.
कर्मचारी भरती आयोगान 21 नोव्हेंबर 2024 ह्या दिसा एलडीसी आनी ज्युनियर स्टेनोग्राफर पदां खातीर जायरात दिल्ली. ह्या पदां खातीर सीबीटी परिक्षा जावन निकालूय जाहीर जाल्यात. फकत कुशळटाय चांचणी जावपाची उरलां. कांय दिव्यांगांक टायपींग करप शक्य जायना. जांकां टायपींग करप शक्य नासता, तांकांच ही सूट मेळटली. जांकां आयकूंक येना वा वेवस्थीत दिसना, त्या दिव्यांगांक सूट मेळची ना, अशें आयोगान स्पश्ट केलें. टायपींग चाचणी सोडून हेर पात्रतायेंत कसलेच तरेची सूट मेळची ना. कुशळटाय/ टायपींग चाचणी पयलीं हें प्रमाणपत्र 15 जुलय मेरेन सादर करचें पडटलें. एलडीसी आनी स्टेनोग्राफर पदांच्या स्कील टेस्टी (कुशळटाय चांचणी) खातीर आयोगान पात्र उमेदवारांची वळेरी जाहीर केल्या. ही वळेरी कर्मचारी भरती आयोगाचे वॅबसायटीचेर उपलब्ध आसा. स्कील टेस्टीची तारीख अजून जारी जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
